Read Ninia Yali 1 TAWARIKH 25 Bible Online

1 TAWARIKH 25 - Ninia Yali bible

1 TAWARIKH 25

¹Ap homi en TUHAN obahet dukoho wene kabog-duruk kwit melal-enepuk on fahet de, at Raja Daud anyo inim, it Lewi enap nim en de it enunggul unuk Lewi enap anyo fam en neg momal-enepfag on de su: Asaf, Heman, Yedutun inim ai momal-enepfag. It aire Allah en uruk ale anyo ap homi hweag-esauk kwit suni wiliboho enambinggong kecapi, gambus, simbal mel, etma watuk kwit hweag-esauk katfag. It wene TUHAN fahet kabog-durukmu anyo, kabog-duruk ale domog melal-enepuk on fahet momaloho kabog-debeseil lebag on de su:

²Hun Asaf omaliki ohwan etano re: Zakur, Yusuf, Netanya, Asarela ha. It aire Allah en uruk ale anyo at raja en diek ulug feserukmu hweag-esauk kamag ulug welatfag, ne it melal-enepuk katfag on de Asaf ai.

³Hun Yedutun omaliki ap enebe folfalik en etare: Gedalya, Zeri, Yesaya, Simei, Hasabya, Matica ha. It enakni en melal-enepukmu apma wereg lit de, iren de Allah en uruk ale anyo walug, enambinggong kecapi kong-duruk kwit, suni Allah motdeg suni eheg, dang deg suni eheg, duruk kwit hweag-esauk katfag.

⁴Hun Heman omaliki re enebe 14 en anggere: Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hotir, Mahaziot ha, eta.

⁵At Heman aire Allah en ele uruk ale anyo walug at raja hweag-utuk kamag ulug, at raja onggwareg fahet on welatfag. TUHAN en de at Heman omaliki ap enebe 14 en inim ahwelani enebe henahan inim og-etfag aire, At TUHAN en wene abug hweag-utuk kwit, “Hat heyabuk leho on duruk karuhun en hwerie hobahakuk,” ulug sali wat-etfag ma atlug og-etfag.

⁶Hun Heman omalikisi abirangge aire iren binggong unuk simbal, kecapi, gambus mel, etma it enakni en melal-enepuk kweleg, TUHAN Obam wirigmu etmano TUHAN fahet wene kabog-durukmu watuk katfag. It Asaf ha, Yedutun ha, Heman ha, etare at raja en uruk kwit, “It yabuk diroho duruk kamlusa,” ulug uruk aleroho neg duruk katfag.

⁷It enomaliki enebe 24 en eta mel, it enori fomane mel, aire binggong watuk ale fahet mun milil-melal deg latfag enap. It ap enebe abirangge re 288 en welatfag.

⁸Iren yabuk dukoho lit, sa mel atam kulusa, sa mel, fobik kulusa ulug de, enenggik wal hauk katfag — aire it sauwe on fahet inim, it ap sobal on fahet inim, it mun endam et duruk katfag ma enoluk enap inim, ket mamulduk katfag enap fahet inim, airoho duruk katfag.

⁹It ap enebe 288 en anyo re, it enahain elekwe deg ale domog de, youwa 24 en yohwan deg latfag. Yohwan deg on hundomog de ap enebe 12 en heheg deg ma re ap misig eke en melal-enepuk katfag. It ai enenggik wal hauk men atfag aleroho enunuk baleg de su: 1. Yusuf hun Asaf ahain elekwe on anyo — 13. Subael 2. Gedalya — 14. Matica 3. Zakur — 15. Yeremot 4. Yizri — 16. Hananya 5. Netanya — 17. Yosbekasa 6. Bukia — 18. Hanani 7. Yesarela — 19. Maloti 8. Yesaya — 20. Eliata 9. Matanya — 21. Hotir 10. Simei — 22. Gidalti 11. Azareel — 23. Mahaziot 12. Hasabya — 24. Romamti-Ezer