Read Ninia Yali 1 TAWARIKH 26 Bible Online

1 TAWARIKH 26 - Ninia Yali bible

1 TAWARIKH 26

¹It ap Lewi enap o TUHAN Obam wirigmu anyo kahaleg lamag ulug yabuk yohwandoho og-esebag on de su. It enunggul unuk Korah on fam en de hun Meselemya, hun Kore amloho, hun Ebyasaf ahain elekwe on fene en anyo febag.

²Hun aire at omaliki ap enebe sabiren welatfag on de it enebe endag-atfag ale umur higitdoho re su: Zakharia, Yediael, Zebaja, Yatniel,

³Elam, Yohanan, Elyoenai.

⁴ Ombolim de at Obed-Edom enenggik dum ware febag. At aire TUHAN ebe fanoap deberuk kwit de omaliki enebe ligin en og-etfag anggere, it enebe endag-atfag ale umur higitdoho re su: Semaya, Yozabad, Yoah, Sakhar, Netaneel,

⁵Amiel, Isakhar, Peuletai ha eta.

⁶Hun Obed-Edom amloho wandeba on Semaya anyo re omaliki ap enebe folfalik en welatfag on de: Otni, Rafael, Obed, Elzabad, Elihu, Semakhya ha; it ap enebe re mun enambong sisereg lit eneb enomamne deg latfag ma re it enebe re mun leho enap neg welatfag, famen de it Elihu nim, Semakhya nim eta neg de mun along deg latfag.

⁸Ap o kahaleg wereg on ai fahet de at Obed-Edom unggul unuk on en de ap enambong sisereg on neg enebe 62 en og-esebag.

⁹At Meselemya unggul unuk fam en de ap enambong se on neg enebe 18 en og-esebag.

¹⁰At Merari unggul unuk fam en de hun Hosa enenggik dum ware febag. Hun aire omaliki ap enebe ohwan welatfag on etare: Simri (At aire amloho wandeba on fug famen de akni en melal-enepuk on welamag ulug unduhuk febag on) ai ha,

¹¹Hilkia ha, Tebalya ha, Zakharia ha. At Hosa ai ahain elekwe en de ap enebe 13 en TUHAN Obam wirig anyo kahaleg lamag ulug fesebag.

¹²It TUHAN Obam wirig anyo kahaleg lamag ulug fesebag on anyo ohore it enunggul unuk deg aleroho kabog heheg yohwan deg latfag. It aire, it ap Lewi enap foma deg latfag anyo hagdoho yabuk TUHAN Obam wirig ilonggoma etmano mel duruk kamag ulug et og-esebag.

¹³It aire enebe enunggul unuk lohon et, doron et, sokole ke on fam kahaleg lamul ai nenoluk amag, ulug de enenggik wal hauk katfag.

¹⁴Wal-hebagdeg de at Salemya anyo re sokole mo lahaik waharuk fil on anyo atfag. Ne, at amloho Zakharia awene komo mun fano deg latfag ahun anyo re sokole il emberim utara fil atfag.

¹⁵Obed-Edom de sokole il apma selatan fil atfag, ne at omaliki omano re o TUHAN Obam wirigmu di angge su angge feik kuruk katfag ma etmano kahaleg lamag ulug fesebag.

¹⁶It Supim ha, Hosa ha, re sokole, o obuk urukmu barat fil etmano nim sokole eke Syaklekhet kwe lahogdoho lahaik waharukmu welatfag on ai fil etma hwelebag. Ap yabuk o TUHAN Obam wirig sokolma ai kahaleg welamag ulug ai, mun finik-fanoroho hwale forukmu, hundig ap etma kahaleg welatfag.

¹⁷Nukoho hundig-hundig de, timur fil de ap folfalik en kahaleg latfag, utara fil de ap enebe ohwan kahaleg latfag, selatan fil de ap enebe ohwan kahaleg latfag. Di angge su angge forukmu gudang omano oho ap enebe ohwan kahaleg latfag, ne gudang misig fahet de ap enebe biren heheg neg welatfag.

¹⁸O TUHAN Obam wirig ai ombandu fil o dotdoho barat fil wirig latfag on fam laukmu kwema etare ap enebe ohwan kahaleg latfag, ne o ebe dotdoho wirig on ai fam de ap enebe biren kahaleg latfag.

¹⁹It enunggul unuk Korah on mel, Merari on mel, fam de yabuk airoho yohwandoho og-esebag ai.

²⁰It enunggul unuk Lewi on anyo fam en ap fomane omano re o TUHAN Obam wirig on ai angge wereg on omano mel, ap homi Allah obahet walug feik lauk katfag on omano mel, hwalduk kamag ulug welatfag.

²¹Ladan aire hun Gerson anyo amloho on eke welatfag; ne aren de ap enunggul unuk esan lohwaleg angge endag-enepfag, ne eke re at amloho Yehiel ai unggul unuk on welatfag.

²²Hun Yehiel ai omaliki re: Zetam inim Yoel inim, iren gudang di angge su angge forukmu etmano inim, TUHAN Obam wirigmu uang foruk on hwalduk kamag ulug inim, og-esebag.

²³At Amram ambiangma on de, Yizhar, Hebron, Uziel inim, oho yabuk duruk kamag ulug og-esebag.

²⁴Hun Sebuel unggul unuk Gersom hun Musa amloho anyo fam en aire, TUHAN Obam wirig ai angge ilonggoma wereg on omano hwalduk kamag ulug welatfag.

²⁵At ebere hun Gersom are Eliezer anyo fene en de hun Selomit ahain elekwe on inim hundig latfag. Ne, at Eliezer fam en endag-ail watfag on anyo en Selomit huli re diroho su: Eliezer, Rehabya, Yesaya, Yoram, Zikhri, Selomit.

²⁶At Selomit inim, it ori nim de hun Raja Daud inim, it enahain elekwe domog fahet kepala welatfag on omano en inim, it enunggul unuk domog fahet melal-enepuk on welatfag on omano en inim, it sehen foroho on enowesi leho on perwira leho on omano inim en TUHAN obahet feik waharuk katfag on etmano hwalduk kamag ulug welatfag.

²⁷Ne, iren walug og-irik waharuk katfag angge aire foma re iren weim yabik lalug delduk on omano mel, ne iren TUHAN Obam wirigmu etma amu eneko duruk angge ulug feik waharuk katfag on omano mel, hwalduk katfag.

²⁸Lebegdohore, at Selomit inim, at ahain elekwe on inim de di angge su angge TUHAN Obam wirigmu etman amu eneko duruk angge ulug feik waharuk katfag angge ai mel, foma at Allah ele hweag-esauk katfag on Nabi Samuel fene en at Raja Saul en feik watfag on mel, Abner en mel, Ner en mel, hun Zeruya amloho Yoab anyo en feik lowag ulug og-utuk katfag ma feik waharuk katfag on mel, etmano hwalduk katfag.

²⁹Hun Yizhar ambiangma on, hun Kenanya inim at omaliki inim de, negara fam lisu baleheg, enunuk baloho feheg, duruk on ai duruk kamag ulug inim, it ap homi Israel on wereg ma etma ap homi siag durukmu wene katukdoho baleheg, duruk kamag ulug fesebag.

³⁰Allah wene fahet duruk on anyo fahet inim, it pemerintah enawene fahet duruk on anyo fahet inim, it Israel enap o Ik Yordan baloho mo obuk uruk fil welatfag on anyo enobahet duruk kamag ulug de hun Hasabya inim, at ori enebe 1.700 en inim fam og-esebag. It enebe mundoho re hun Hebron ambiangma on ap enowesi log enap neg welatfag.

³¹At Hebron ambiangma on ai melal-enepuk katfag on de hun Yeria ai welatfag. At Raja Daud anyo en melal-enepuk li tahun 40 on fam de hun Hebron en ondohoma on anyo fahet bilinggebag. Ai fam bilingguruk men de ap sehen foroho on enambong se enap neg de o Yazer wilayah Gilead fam etma wereg ma esebag.

³²Allah wene fahet duruk on anyo fahet inim, it pemerintah enawene fahet duruk on anyo fahet inim, it Israel on Ik Yordan baloho mo indip fil wilayah it enunggul unuk Ruben, Gad, ai en enunggul unuk Manasye on foma minggiroho inim welatfag on anyo enobahet duruk kamag ulug de, at Yeria anyo ahain elekwe en kepala welatfag on enebe 2.700 en fam og-esebag. Ap enebe mundoho re ap lohon neg at Raja Daud en momal-enepfag enap welatfag.