Read Ninia Yali 1 TAWARIKH 28 Bible Online

1 TAWARIKH 28 - Ninia Yali bible

1 TAWARIKH 28

¹At Raja Daud anyo wene melaleg wilipuk kwit de, it ap homi enowesi melal-enepuk on o Yerusalem mundoho kabog-dik wamag ulug hweag-esebag. Airoho hweag-esebag ma re it kepala suku mel, ap yabuk pemerintah fam duruk kwit wereg latfag enap mel, it enunggul unuk domog omano fahet kepala welatfag enap mel, it hun raja angge onggwareg on mel, owam mel, at omaliki mel, fahet kahaleg welatfag enap omano mel — katukdoho re at raja ebe wereg ma ap log-log enap welatfag on omano mel, it sehen foroho on enowesi perwira omano mel, ap mun leho enap yain-kain omano mel, abirangge o Yerusalem kabog-dik lebag.

² Airoho kabog-debag ma re at Daud anyo it enolohotma inatfagdeg ele hweag-esauk kwit, “Nori nenunggul unuk misig on, henesanggo holiek! An o endamet angge o Peti Sali Wene anyo fam, nenakni At TUHAN Allah eyog sobig lit wereg angge ai fahet o mun ebe on eke wuruhuk ulug nenda wenggeldihik. Airoho wenggeldihikdeg de o At apne waukmu misig eke witmin ulug de o angge mun fik-fouk dirihik.

³Famen de an de ap nebe sehen foroho on wereg lit ap enamep humdoho belapil lauihik mu re, At TUHAN en de, Aire haren duhun fug, ulug alele wasi.

⁴TUHAN Allah it ap homi Israel on en apne wauk on ai en de an inim an nambiangma en endag-amuhup on inim, ap homi Israel on mundoho-mundoho melal-enepuk kamag ulug momal-nenepsi. Ne, ap melal-enepuk on ai fik-fouk debeikoho re Aren it enunggul unuk Yehuda on momalsi, ne enunggul unuk ai fam de, Aren an nakni ahain elekwe on momal-enepsi. Ne, an nakni ahain elekwe on mundoho ai en de At TUHAN en endama besireg an momale nobahalug, it ap homi Israel on famen raja unduhuk lamag besi.

⁵Aren de an nomaliki humdoho og-nitsireg, an nomaliki mundoho etman de at Salomo TUHAN raja wereg lit melal-enepukmu etma ap homi Israel on enobahet unduhuk wereg lit melal-enepuk kamag ulug unduhuk fesi.

⁶TUHAN en an nobam uruk kwit de, diroho hweag-nitsi, Hat hamloho Salomo ai en o An Nobam ai wit-nuruhu. At ebere An namloho amag ulug, An den momaldihik, ne An de at akni aruhuk.

⁷Ne, aren lahe An nawene melaleg inim, wene diroho diyug suroho diyug ulug inim wereg on anyo hundig fik-furoho higitdoho, ketia duruk eta hag duruk karuhu halug de, at raja wereg melal-enepuk karuhu on ai mundoho-mundoho fahet An den omamne debehuk, ulug hweag-nitsi,” ulug hweag-esebag.

⁸Airoho hweag-esebagdeg ambiangma lisoho eke uruk kwit de, “Aireg ma ketiare, yaho nomaliki, At nenakni Allah il hanim inim, it ap homi TUHAN omaliki Israel on abirangge kabogdeg su inil hanim inim, At nenakni TUHAN Allah en awene melaleg hweag-nesasi on ai mundoho fik-furebelug duruk kamuhup en heng-henepuk kahi. Airoho duruk kamuhup halug de, hiren o kwenang mun fanoma su sen-dalug lit de, hit henambiangma en endag-amuhup on fam mundoho-mundoho henabinggi angge hagdoho og-esahup,” ulug hweag-esebag.

⁹Airoho hweag-esebagdeg at Salomo fam de Daud en uruk kwit de, “Namloho, Allah hat hakni en apne wauk kahi on ai neg fahet demdoho an nakni Allah ulug fag-duruk kamuk. At Allah re niren wenggeleduk kahe ale nim, nenenda nauk ale inim de At mundoho oluk deg ma re, haren de henda bekit fam hwenaroho mel fug men, henda fano fam inim At obahet neg duruk kamuk. Ne, haren At heraruruk halug de At ebe hweag-dahun, famen de haren At embeselug lauk halug de, Aren mundoho-mundoho fahet hat nerim ulug fotog-heahu.

¹⁰TUHAN en hat momal-hapuk kwit, Haren o At Obam eneko amu wirukwag ulug, momal-hapsi ale ai furoho wenggel-hakiyug. Anggere, ketiare o ai hendama mun wiruhuk ulug deg lit wiriyug,” ulug hweag-etfag.

¹¹Airoho hweag-etfagdeg de at Daud en de, o TUHAN Obam anyo ebe wuruhuk ale ulug mel, gudang wuruhuk ale ulug mel, ambe ilonggoma etmano mundoho fahet mel, o ambe eke Ambe Mun Amu Eneg ap homi enesiag elehapdoho forukmu anyo wuruhuk ale ulug mel, enda wenggeloho ulug balfag angge anyo Salomo og-etfag.

¹²At Daud en de o lilimol wuruhuk ulug wenggelfag ale mel, ambe maseroho etma fahet mel, gudang o TUHAN Obam ai ilonggoma wereg yohwareg laruhu mu ulug mel, gudang di angge su angge TUHAN obahet walug feik waharuk on welaruhu mu wuruhuk ulug wenggelfagdeg baloho febag angge anyo oho og-etfag.

¹³Ekere it imam anyo mel, it Lewi enap mel, yohwandoho fesehuk ale ulug wenggelfag on anyo mel, iren yabuk o TUHAN Obam wirigmu duruk kamuhup ale ulug wenggelfag on anyo mel, TUHAN fahet wene kabog-duruk kwit duruk kamuhup angge ulug welatfag on omano hwalduk kamuhup ale ulug mel, wenggelfag on anyo oho og-etfag.

¹⁴Og-etfagdeg de aren amloho fam de, emas lalduk ale mel, perak on en di on su on laloho lahapuk ale mel,

¹⁵esahe pelita anyo hwalduk ale mel, esahe anyo eyog wutuk ale mel,

¹⁶e doaleg meja perak on fam wutuk ale fahet mel, meja emas on fam wirigmu roti unuk wareg anyo werako Allah fahet foruk ale mel, fahet diroho duruk angge ulug milil-melal debesebag.

¹⁷Ai en emas mun fano on aling eleg angge aeg soap hag angge garpu mel, mangkuk ik hwenangguruk angge mel, waruk dot-doron wutuk ale mel, piring doal angge wurukoho emas, perak wauk kamuhup ale ulug mel,

¹⁸amben fano angge dupa anyo yaldukmu obale mezbah anyo wurukwag ulug emas, perak wauk kamuhup ale ulug mel, Peti TUHAN en Sali Wene wareg yohwareg anyo emberimmu, boholma yonggo famen enunggul unuk kerub ai on enebe ilit angge enahwerabul langdoho wereg on fahet, kereta hag angge emberimmu wereg lamag ulug wuruhup en emas mun fano on neg wahup ale ulug mel, oho melale-fesebag.

¹⁹Airoho mundoho melale febagdeg de, at Raja Daud anyo en uruk kwit de, “Mundoho abirangge aire, TUHAN en diroho duhup ulug wene melaloho an den dukwag ulug og-nitsi mu duhup ale ulug baleg on fam mun kwelabeg wereg ai,” ulug hweag-etfag.

²⁰Ai en at Daud en amloho Salomo fam uruk kwit de, “Hat de henda hambuk dalug de hambong se amuk. Amu on fam eke hakol duk fug, yabuk aire indip diyug. TUHAN Allah an den apne wauk kahi on ai en de hat let-habuhu anggere. Ne, Aren de hat fotog-heaulug lahu fug, we Hat haluluk weregman neg yabuk ai abirangge mundoho wiruhun.

²¹Yabuk o TUHAN Obam wirigmu duruk ale fahet de, it Allah il hanim duruk on inim, it Lewi enap inim, en duruk kamag ulug mun eneg heheg wereg ai. Yabuk etma durukmu it enoluk deg ale on omano duruk halug de, it deg aleroho enenda fano fam let-heauk kamuhup, ne it ap homi Israel on melal-enepuk on mel, it ap homi holduk on abirangge mel, en de haren diroho diyug suroho diyug ulug melale feseruk ale anyo hele holoho duruk kamuhup,” ulug hweag-etfag.