Read Ninia Yali 1 TAWARIKH 29 Bible Online

1 TAWARIKH 29 - Ninia Yali bible

1 TAWARIKH 29

¹ Airoho hweag-etfagdeg at Daud en it ap homi enowesi kabogdeg on anyo fam uruk kwit de, “It an nomiliki mundoho omano en de we at Salomo neg TUHAN en momalsi. Famen de mun ebe sauwe reg lit kauk deg, ne yabuk su re mun along deg. Ne, ekere o ebe wuruhu on aire ap hesanggo enobam bumbuk wuruhu fug, ite o TUHAN Allah Obam wuruhu.

²O TUHAN Obam ai fahet o angge inim, ilonggomangge inim de an den duk alereg on fam de mundoho fouk deberihik. An den de emas, perak, perunggu, besi, helep onggo wereg on, helep unuk permata ai on, helep orohole il amu-amu on, ebene labelduk on fahet, inim helep pualam inim mun hum-hamdoho kabog fouk deberihik.

³An den TUHAN Obam ai fahet nenda hundig boruk kwit de, emas, perak mel an nonggwareg nangge on oho ferihik.

⁴Emas mun fano on neg de 100 ton eke mangnoroho inim, perak mun finik-fano on de 240 ton hagdoho o TUHAN Obam anyo obahat fene labeloho wurukwag ulug ferihik, ne ai di on su on it lalduk ale enoluk enap en lalukwag ulug et ferihik. Ne, ketiare ap san eke enda fano fam TUHAN obahet og-irik watmisi?” ulug hweag-esebag.

⁶Airoho hweag-esebag ma re ap enahain elekwe fahet kepala omano mel, kepala suku mel, it sehen foroho on enowesi perwira omano mel, it at raja angge onggwareg on fahet hwalduk enap etmano mel, en uruk kwit de, niren oho kabog-dul neneda behe, ulug ebag.

⁷Airoho ebagdeg de, TUHAN Obam wutuk on anyo fahet iren og-etfag angge re apma su: emas de 170 ton dahandoho, perak de 340 ton dahandoho inim, perunggu re 620 ton, ne bosie on de 3.400 ton dahandoho inim, kabog-debag.

⁸It ap homi helep permata ai enenggikmu wereg on en de o TUHAN Obam wirigmu anyo di angge su angge foruk on kwelapuk etmano foukwag ulug og-etfag. (At Yehiel aire ap Lewi ahun unggul unuk Gersom on welatfag.)

⁹Ap homi holduk on en de enendaman bolug og-etfagdeg, iren humdoho febag ai fam it enenda mun enahayeg hebag. At Raja Daud anyo oho ahayeg hebag.

¹⁰It ap homi humdoho inil hanim anyo re at Raja Daud en TUHAN mot-duruk kwit de, diroho ebag, “TUHAN Allah nenomba Yakub en hapne wauk katsi on, nakni. Hat de mundoho-mundoho motdeg neg welaruhun!

¹¹ Hat de mun humon wereg lit halong welahen. Hat de hombagbag wereg lit, halong welaheg, Haren duruk kahen alere ambiangma mundoho aheg, hebe mun leho welaheg, deg lahen. Di angge su angge bohol fam inim, kwenang fam inim etma Hat honggwareg hangge neg. Hat de raja mun leho hahun wereg lit, di angge su angge mundoho Hat homamne apma wereg.

¹²Di angge su angge enenggik dung on wereg ale inim, di angge su angge mundoho wereg ma neg wereg ale nim, aire Hat fam en neg. Di angge su angge re Hat homamne apma wereg ma, Hat it enemberimmu we misig neg welahen. Haren de ap nangginig on famen oho ap humon atlug omamne welamag ulug, homamne fam debehen halereg.

¹³Ketiare, Nenakni TUHAN Allah, niren Hat dang-habeheg, Hat hunuk mun leho on ai mot-habeheg, duruk kahe, nakni.

¹⁴Di angge su angge re Haren neg og-nesauk kahen, ne niren og-herehe angge sure Hat hangge neg deg ma, an ninim, it nomaliki holduk on su inim en demdoho Hat og-herehe ha fug alereg.

¹⁵Nenakni TUHAN, Hat de mundoho holuk deg, nit nenombasi-nenambusi hagdoho re nit ohore nenoluk welahe sure ap bohon hagdoho inim, ap nohweikmu watlug wereg anyo hagdoho inim, welahe. Nit nenoluk aire ap homi enapumag baloho lauk anyo hag deg ma, waratuk on fam en nit lil atlug lahe fug alereg.

¹⁶Nenakni TUHAN Allah, di angge su angge onggo wereg angge neg niren dia kabog dehe on aure, niren o Hat hobahet misig eke wiri folug, Hat hunuk mun eneg horeg wereg on anyo along bolug leho hobaharuk kamuhuk en, kabog dehe. Famen de mundoho su re Hat henggik fam en nit hwelauhuk on deg ma Hat hangge on neg.

¹⁷Haren ap enenda abut bal-esalug, it enenda mun healeg on halug Hat hendareg lahen anyo, an noluk. An nenda healeg fam inim, nenda nahayeg fam inim, mundoho su Hat hobahet walug og-hirik wahi. It Hat homaliki suma kabogdeg on su en, enenda fano fam enengge Hat og-humukoho walug waharuk kahesa ale an mundoho nil isihi.

¹⁸Nenakni TUHAN Allah, it nit nenombasi-nenambusi Abraham, Ishak, Yakub mel, en hapne wauk katfag on, Hat homaliki su enenda Hat hobam hundig deg lit, ketia deg eta hagdoho neg welamag ulug debeseruk kamin, ne iren mundoho-mundoho Hat fam dipdoho duruk kamag ulug let-esakin.

¹⁹An namloho Salomo fam de, Haren wene melaleg anyo endaman dik-demdoho furebelug duruk kamag ulug og-ereheg, o wene kabog-durukmu wurukwag ulug an den o angge mun fik-fouk deberihik on ai witmin nenda boruk kamag ulug og-ereheg, duruk kamin, nakni,” ulug somban ebag.

²⁰Airoho mundoho somban ebagdeg, at Daud en ap homi humdoho etma kabogdeg latfag on anyo fam uruk kwit de, “Henakni TUHAN Allah ai mot-diek!” ulug hweag-esebag ma, re it ap homi mundoho anyo en, enakni TUHAN Allah it enombasi en apne wauk katfag on anyo mot-debag. Mot-duruk kwit de, iren At TUHAN leho foruk kwit ulug inim, at raja anyo leho foruk kwit ulug inim, de enelenggen dimi-debelug sahaun-debag.

²¹Nukoho ombolim on fam de iren wam TUHAN obahet waroho og-umul ulug watfagdeg, iren yohwandoho re ap homi mundoho etmano og-esebag. Ai foma wam sapi yohombuk on 1.000 en inim, wam domba yohombuk on 1.000 en inim, domba ket sauwe on 1.000 en inim de watfagdeg abirangge, waroho yalduk angge obale mezbah wirig anyo fam yalfag. Iren ohore anggur airoho waroho yalduk kwit ai walug waharuk kamag ulug deg on omano og-irik watfag.

²²Ai salim de it enasiburu nenggeg, enahaik nenggeg, duruk kwit, TUHAN il hanim enahayegdoho debag. Airoho debagdeg de nikangge enenggik bireneg on at Salomo at raja inaha ulug enele unduhuk febag. TUHAN unuk fam de at Salomo raja unduhuk febagdeg Zadok de imam unduhuk febag.

²³ Airoho unduhuk febag ma re at akni Daud anyo obalmangge re at Salomo anyo akni hwerieg latfag ma anyo At TUHAN en wene febag higitdoho hweria aik lahabag. At ebere ap raja di ale su ale durukmu mun fano neg atuk katfag ahun, ne it enunggul unuk Israel on abirangge en ohore along bale foruk katfag ahun welatfag.

²⁴It ap pemerintah fam yabuk duruk katfag on et, it sehen foroho latfag on et, at Daud omaliki mundoho omano et, anggere at Salomo demdoho raja omamne wereg on ulug fag-duruk katfag.

²⁵It ap homi holduk on mundoho en at Raja Salomo anyo yanderuruk kwit, at Salomo ebe raja it atam wereg lit Israel enap melal-enepuk katfag on mel, it en raja amu kwe welatfag on mel, horog hareg kweleg at neg de mun nik ahun wereg ulug, yanderuruk kamag ulug TUHAN debesebag.

²⁶Daud hun Isai amloho anyo re it ap homi Israel on mundoho melal-enepuk katfag on de,

²⁷ 40 tahun melal-enepuk katfag, ne tahun sabiren de o Hebron wereg lit melal-enepuk katfag, ne tahun 33 en de o Yerusalem wereg lit melal-enepuk katfag.

²⁸At ebere dung ahun deg ma ap homi en along boruk katfag ahun. At ebe kungguk sobal atfagdeg waratfag. Airoho waratfag ma at amloho Salomo anyo raja obalma inatfag.

²⁹At Raja Daud endag-atfagdeg yabuk duruk katfag ale, indipmen onggombimu mundoho re, buku Nabi Samuel, Nabi Natan, Nabi Gad fam baleg wereg.

³⁰Buku eta fam de at Daud raja wereg lit melal-enepuk katfag ale inim, at omamne welatfag ale inim, at ebe fam atfag ale inim, it ap homi Israel on fam atfag ale inim, kerajaan amu on it Israel on wereg ma horog kwe welatfag on etma fam atfag ale inim, bilinggig wereg.