Read Ninia Yali 1 TAWARIKH 5 Bible Online

1 TAWARIKH 5 - Ninia Yali bible

1 TAWARIKH 5

¹ Hun Yakub amloho wandeba on de Ruben anyo. Famen de at Ruben en akni en ohwesi enamingming anggeap debag on omano eke inim nohobag fam o ilonggo siaho febag ma re, at omalik wandeba on deg ma di angge su angge akni en on at hwela on anyo re oko re at Yusuf og-etfag. Airoho debag famen de at Yakub en ondohoma on etman omamne on de at Yusuf de fug, ite at Yehuda deg latfag. It ap homi Israel enap mundoho etmano fam en kirim-keram unuk bogdeg inatfag on ohore it enunggul unuk Yehuda on ai fam en.

³At Yakub amloho wandeba on Ruben aire omaliki ap enebe ohwan angge ondoho latfag on de, Nimi Henokh ha, Palu ha, Hezron ha, Karmi ha.

⁴ At Yoel ambiangma on ondoho latfag on indipmen bilinggoho re su: Semaya, Gog, Simei, Mikha, Reaya, Baal, Beera inim. At Beera aire hun unuk bogdeg Asyur ahun hun Tiglat-Pileser anyo en senetlug hwik-enebik laukmu etmano lauk li re, at ai it enunggul unuk Ruben on fahet enowe melal-enepuk on welatfag.

⁷It endag-ail watfag ale anyo fam de it enowesi kepala it enunggul unuk Ruben fam en on baloho wereg latfag on de su: Yeiel, Zakharia,

⁸Bela hun Azas amloho hun Sema it Yoel enap anyo ahun anyo omba ai, welatfag. It enunggul unuk Ruben on de o Aroer mel, o wilayah o Aroer huli en angge re o Nebo il emberim utara fil etmano en o Baal-Meon huli etma welatfag.

⁹It ap homi aire enowam di angge su angge endetuk on de o Gilead etma humdoho welatfag. Ai fam de it enebe o wilayah mo lahaik waharuk fil omano en de o Ik Efrat wirig atuk on huli etmano it hwelag-kwebagdeg wereg latfag.

¹⁰At hun unuk bogdeg Saul anyo unduhuk wereg li re it enunggul unuk Ruben on ai en de ap homi Hagari enap o Gilead en mo lahaik waharukmu timur fil welatfag on etma enowaroho enalong elehapdoho fesebagdeg it o etma sebelik kwebagdeg welatfag.

¹¹It enunggul unuk Ruben on weregman il emberimmu utara fil de it enunggul unuk Gad on anyo o Basan kwenang fam etman de, o Salkha en mo lahaik waharukmu timur fil etma huli welatfag.

¹²It enunggul unuk Gad enap ai fam en de hun Yoel aire it ap homi olohoream enap etma enomba atam on ne, Safam de it ap homi olohotma enap fam en de enembolma on enomba. Ne, at hun Yaenai mel, Safat mel, de it ap enunuk foma amu on enombasi welatfag.

¹³It ap homi enunggul unuk Gad on fam en amu on it ap enunuk sabiren su fam seberoho kwelabeg latfag on de apma su: Mikhael, Mesulam, Syeba, Yorai, Yakan, Ziya, Eber inim ai.

¹⁴It aire hun Huri amloho Abihail anyo en ondohoma on. It endag-atil watfag ale apma fil en lahabeg de diroho wenaho latfag: Huri, Yaroah, Gilead, Mikhael, Yesisai, Yahdo, Bus, mel.

¹⁵It ap enunuk domog ai enowe kepala re hun Ahi, Abdiel amloho hun Guni omba anyo.

¹⁶It aire o wilayah Basan on fam etma inim, o kota o wilayah etma fam wereg kwe inim, o Saron en lei enggelangge wereg kwe etma inim, welatfag.

¹⁷It endag-atfag ale wenahabag on aire at Yotam it ap homi Yehuda on enobahet unuk bogdeg wereg kweleg, ne at Yerobeam it ap homi Israel on fahet unuk bogdeg wereg kweleg wenahabag.

¹⁸It enunggul unuk Ruben on inim, Gad on inim, Manasye on Ik Yordan foma timur fil welatfag on anyo inim, fam de ap weim sehen anggen enap, mun eneluk-benelukdoho, melaleg enap, sehen mel, dog kwe balni mel, karog mel, wauk ale eneluk enap de, enebe 44.760 en welatfag.

¹⁹It enebe airoho wereg lit de, iren ap enunggul unuk Hagri on fam en it enunggul unuk eke, Yetur mel, Nafis mel, Nodab mel, etma inim dog yapuk katfag.

²⁰It ap dog yapuk ale enoluk deg latfag enap etman de, Allah Haren let-nenebin, ulug heng-debag ma, Allah en de iren heng-ebag aleroho esanggo holfagdeg, it ap Hagri enap mel, it foma enebe misig seberulug inibil dog yabik waharuk katfag on omano mel, enowaroho enalong eleho feseruk kwit de, it enalongap debsebag.

²¹Dog yapfag on aire At Allah enda bebag ale higitdoho deg ma re ap eneselei on humdoho enowatfag. Airoho enowatfagdeg de iren ap foma enebe 100.000 en het-eneplug waharuk kwit de, enowam unta ebe 50.000 en inim, enowam domba 250.000 en inim, wam keledai 2.000 en inim del-debag. Airoho debagdeg de ap homi Israel on og-eneplug sabu hetdoho hwik-enebik lebag[6] huli anyore it enebe o etmano wereg latfag.

²³It enunggul unuk Manasye on anyo re foma fil minggiroho re o wilayah Basan en de lahakeik deg il emberim utara fil o Baal-Hermon mel, Senir mel, Dom Hermon mel, huli yit-yatdoho etlema huli welatfag. It enebe airoho wereg lit de, enebe log welam dot welam de enebe hum atuk katfag.

²⁴It ai en enowesi kepala unduhuk latfag on de su: Hefer, Yisei, Eliel, Azriel, Yeremia, Hodawya, Yahdiel nim eta. It enebe abirangge re ap sehen foroho ale neben-heben enap welatfag.

²⁵It ap homi Israel on de it enombasi en Allah apne wauk katfag anyo hagdoho apne wa fug angge At Allah fam dipdoho duk eleg angge duruk katfag. Iren de At embeselug de kembu unuk dewa Allah en o Kanaan fam en muko wilibi fesebag on omano obahet duruk kwit apne wauk katfag.

²⁶ Airoho duruk katfag ma re At Allah en de hun unuk bogdeg Asyur ahun Pul anyo endama debag ma, at anyo lebagdeg o it Israel on wereg ma omano bin kwik lebag. Hun Pul aire unuk ekere Tiglat-Pileser ulug enoluk deg latfag. Airoho kwik lebagdeg de it enunggul unuk Ruben, Gad, Manasye Ik Yordan foma mo lahaik waharuk fil welatfag on anyo mundoho feleleng-eneplug de, o Halah mel, Habor mel, Hara mel, obale eke amumu Ik Gozan horogma etma mel, hwik-enebik lebag. Etma hwik-enebik ebag ma re ketia huli en inim etma yugdoho wereg.