Read Ninia Yali 1 TAWARIKH 9 Bible Online

1 TAWARIKH 9 - Ninia Yali bible

1 TAWARIKH 9

¹It ap homi Israel on mundohore inindip enahain elekwe domog heheg enunuk baloho welatfag. Baloho welatfag on aire buku it Israel enap enowesi raja anyo fam baleg latfag. It enesiag duruk katfag on anyo ambiangma unggum de ap homi Yehuda on og-eneplug hwik-enebik laukmu o Babel etmano feseik lebag.

² It enesahalimu etma kirim-keram it enonggwareg enanggwenang fam enobam kota etmano fam sombandoho watfag on de, it ap homi holduk on hesangge on mel, imam mel, it Lewi enap mel, TUHAN obam wirigmu yabuk duruk katfag on mel, watfag.

³It enunggul unuk Yehuda on en foma mel, Benyamin on foma mel, Efraim on foma mel, Manasye on foma mel, nikangge watfagdeg o Yerusalem etma welatfag.

⁴It enunggul unuk Yehuda on mel, at Yehuda omaliki Peres mel, Syela mel, Zerah mel, en ondohoma on omano mel et, o Yerusalem welatfag on enebe seberoho re 690 en welatfag. At Peres ambiangma en ondoho on de at hun Utai en melal-enepuk katfag. Hun Utai ai endag-atfag ale indip fil en onggombi fil de, Utai, Amihud, Omri, Imri, Bani inim eta. At Syela ambiangma en ondoho on de at hun Asaya en melal-enepuk katfag. At aire enowe enunggul hagdoho welatfag. At Zerah ambiangma en ondoho on de at hun Yeuel en melal-enepuk katfag.

⁷Ap homi enunggul unuk Benyamin on o Yerusalem welatfag on de enebe 956 en welatfag. It enahain elekwe anyo fahet enowesi enunggul hagdoho anyo unduhuk latfag on de: Salu hun Mesulam amloho, hun Hodawya omba, hun Hasenua ambu ai ha, Yibnia hun Yeroham amloho ai ha, Ela hun Uzi amloho hun Mikhri omba ai ha, Mesulam hun Sefaca amloho, hun Rehuel omba, hun Yibnia ambu, ai ha unduhuk latfag.

¹⁰It imam fomane sure o Yerusalem welatfag on anyo su: Yedaya, Yoyarib, Yakhin inim Azarya hun Hilkia amloho ombasi re, Mesulam mel, Zadok mel, Merayot mel, Ahitub mel. (Azarya re it TUHAN obam olma duruk katfag on pegawai anyo enowe enunggul hagdoho re at unduhuk latfag.) Adaya hun Yeroham amloho at ambusi re hun Pasyhur mel, hun Malkia mel anyo ha. Masai hun Adiel amloho at ambusi re hun Yahzera mel, hun Mesulam mel, hun Mesilemit mel, Imer mel anyo ha unduhuk latfag.

¹³It imam omano it enahain elekwe fahet enowesi enunggul hagdoho unduhuk latfag on enebe re 1.760 en welatfag. It ap aire At TUHAN Obam wirigmu etmano yabuk di ale su ale duruk on fahet de enggat-fenggat deg latfag.

¹⁴It Lewi enap enunuk apma su re o Yerusalem welatfag on anyo: Semaya hun Hasub amloho anyo; at ambusi re hun Azrikam mel, Hasabya unggul unuk Merari ahun anyo mel etma. Barbakar, Heres, Galal Matanya hun Mikha amloho anyo; at ambusi re hun Zikhri mel Asaf mel etma. Obaja hun Semaya amloho anyo; at ambusi re hun Galal mel, Yedutun mel etma. Berekhya hun Asa amloho hun Elkana omba at ebe o kota Netofa fam etma welatfag on anyo ha welatfag.

¹⁷It ap o TUHAN Obam wirigmu kahaleg foroho enap enohwesi enomaliki inim seberoho o Yerusalem welatfag on de: Hun Akub ha, Talmon ha, Ahiman ha, hun Salum it o foroho etmano enowe enunggul hagdoho welatfag ahun anyo ha, welatfag.

¹⁸It ap ai on fam en de ketia huli en oho re o mo lahaik waharuk fil Pintu Gerbang Raja[16] kurukmu ulug etma kahaleg lit wereg. Atam de it ap ai on de sokole it ap Lewi enap enobam sabo salegma lauk fil etma kahaleg latfag.

¹⁹TUHAN Obam Sabo salegma kwik laukmu sokolma etma kahaleg lamag ulug de at Salum it ap at indip on, it Korah enap anyo mel fesebag. (At Salum aire hun Kore amloho, hun Ebyasaf omba.) Atam de it enambusi en oho re TUHAN obam sabo salegma etma duruk kwit de yabuk ai on at duruk katfag.

²⁰Pinehas hun Eleazar amloho At TUHAN en mapnuroho neg foroho welamag! aren it fahet enowe enunggul hagdoho unduhuk welatfag ahun.

²¹Hun Zakharia hun Meselemya amloho ai ohore TUHAN Obam Sabo salegma kwik lauk on sokolma etma kahaleg welatfag ahun.

²²It ap o sokole kwik waharukmu kahaleg welamag ulug unduhuk fesebag enap ai enebe re 212 en welatfag. It enebe re enobam sili deg aleroho enunuk baleg welatfag. It enombasi endam welatfag enap etma at Raja Daud mel, at Allah ele hweag-esauk katfag on Nabi Samuel mel en it eneyabuk ai on welamag ulug og-esebag.

²³Airoho og-esebag huli ai en angge it enebe inim, ne iren ondohoma on inim de yugdoho TUHAN Obam wirigmu kwik lauk on sokole ai fam kahaleg welatfag.

²⁴Sokole ebere ohwan yendeg latfag: Misig de il emberim utara fil, ekere il apma selatan fil, ekere mo lahauk waharuk fil timur fil, ekere mo obuk uruk higitdoho barat fil yendeg latfag. Airoho yendeg ma re sokole omano domog de it ap Lewi on misig heheg it sokolma kahaleg wereg on omano enowe enunggul hagdoho welamag ulug feseruk katfag.

²⁵It enori foma olma dag fil wereg on ohore enebe atam deg fobik deg enori hundig-hundig minggu misig hunduko let-enepuk katfag.

²⁶Famen de it enebe ohwan enowesi enunggul hagdoho kahaleg welatfag on etano neg de yugdoho yabuk duruk katfag. It ai en de o TUHAN Obam wirigmu ilonggoma ambe baleg on omano hwaloho feheg, di angge su angge o ilonggoma etma wereg angge etmano hwaloho feheg, duruk katfag.

²⁷It ap ai en de o hubetdoho sokole kwik waharuk on omano huseheg, o ebe wirig anyo kahaleg welaheg, duruk katfag ma it enebe re TUHAN Obam wirigmu en horogma etma welatfag.

²⁸It ap Lewi enap foma minggiroho re wene kabog-duruk kwit duruk katfag angge etmano hwalduk katfag. It ai en neg de wilibi feik waharuk kwit wenaho feheg, kwelabe feik lauk kwit wenaho feheg, duruk katfag.

²⁹It fomane re o TUHAN Obam wirigmu en ilonggo wene kabog-duruk kwit obale duruk katfag angge omano hwaleheg, tepung, anggur, e zaitun ahalue, kemenyan, ambenangge, mel hwaleheg duruk katfag.

³⁰Famen de amben angge etmano menenduk katfag on de it ap Allah il hanim duruk katfag on etmano en neg duruk katfag.

³¹Di angge su angge werako foruk[17] angge walug TUHAN obahet forukmu etmano feik lauk on fahet de, ap Lewi on misig eke unuk Matica hun Salum amloho wandeba on unggul unuk Korah on fam en unduhuk latfag.

³²It enunggul unuk Kehat enap de it somban uruk salim hari Sabat anyo fam nukoho hundig-hundig roti unuk wareg[18] werako foukdoho feik lauk on fahet welatfag.

³³It Lewi enap anyo en fomane amu on de TUHAN Obam wirigmu anyo en suni uruk on fahet welatfag. It enahain elekwe on fomane re o TUHAN Obam wirigmu anyo ambe baleg foma amu on fam etma welatfag. It enebere yabuk nukoho hundig hup hundig duruk katfag ma re yabuk amu on eke it og-esauk katfag fug.

³⁴Ap enunuk emberim fil baleg on aire it Lewi enap enahain elekwe en enowesi enunggul hagdoho unduhuk latfag it enebe endag-atil watfag aleroho. It aire enowesi melal-enepuk wereg lit o Yerusalem welatfag enap.

³⁵Hun Yeiel de o Gibeon witfagdeg de etma wereg latfag. At ohwe unuk de Maakha,

³⁶at amloho ap wandeba on ai unuk de Abdon; ne eke ombolimu on de Zur, Kis, Baal, Ner, Nadab,

³⁷Gedor, Ahyo, Zakharia, Miklot,

³⁸hun Simea akni anyo. It enambiangma on de ap homi foma it inindip on inim o Yerusalem etma welatfag.

³⁹Hun Raja Saul anyo akni unuk de Kis ne omba unuk de Ner. At Saul de omaliki ap enebe ohwan angge welatfag on de, Yonatan, Malkisua, Abinadab, Esybaal[19] inim.

⁴⁰At Yonatan de amloho ap misig eke welatfag on de, unuk Meribaal[20] hun Mikha akni ai.

⁴¹Hun Mikha ai omaliki re ap enebe ohwan welatfag on de, Piton, Melekh, Tahrea, Ahas inim.

⁴²Hun Ahas amloho re nimi Yoada at omaliki enebe henahan endag-enusug latfag ahun ai. Ne, at omaliki etare, Alemet, Asmawet, Zimri nim eta. Hun Zimri ai ambiangma en endag-atil watfag ale re, Moza,

⁴³Bina, Rafa, Elasa, Azel inim ai.

⁴⁴Hun Azel ai omaliki re ap enebe folfalik en welatfag angge re, Azrikam, Bokhru, Ismael, Searya, Obaja, Hanan eta.