Read Ninia Yali 2 TAWARIKH 1 Bible Online

2 TAWARIKH 1 - Ninia Yali bible

2 TAWARIKH 1

¹Hun Raja Daud amloho Salomo anyo re, it kerajaan Israel fam omano raja mun omamne on inatfag. Airoho inatfag ma re akni TUHAN Allah en at ebe fam fanoap debeheg, at ebe mun omamne humon welamag ulug debeheg, debag.

²It ap homi Israel on en esan enebe 1.000 en heg, 100 en heg, fahet enowesi kepala inim, it pemerintah fam yabuk duruk kwit ap kain on unduhuk wereg enap inim, it enahain elekwe on fahet kepala wereg on fahet inim, de at Raja Salomo anyo en,

³at inim o Gibeon somban urukmu etmano laul en ulug mingming-enepfag. It etma lebag aire, o etma at Musa TUHAN amingming angge anyo en o leimu wereg lit TUHAN Obam Sabo witfag on anyo etma wereg ma atlug lebag. (

⁴ Famen de Peti TUHAN en Sali wene wareg yohwareg anyo re at Raja Daud anyo en o Kiryat-Yearim en oko walug o Yerusalem aren Peti ai fahet o sabo sale febag ma etmano feik watfag ma welatfag.)

⁵ Wam waroho yalduk angge obale mezbah hun Besaleel, hun Uri amloho, hun Hur omba anyo en no perunggu fam witfag angge anyo ohore o Gibeon TUHAN Obam Sabo saleg on olohotma etma welatfag. Airoho wereg ma re at Raja Salomo anyo mel, it ap homi holduk on mundoho mel, de etma wene kabog-duruk kwit somban uruk katfag.

⁶TUHAN Obam Sabo anyo wirigmu en e mezbah perunggu fam hilinggig on fam etano re, at raja en wam TUHAN obahet ebe 1.000 en waroho yal-etfag.

⁷Airoho yal-etfag ma hup anyo salim de Allah at Salomo akit enam aik watfagdeg hweag-utuk kwit, “Salomo ahwi, hat henda angge ai heng nabin o, ai An den hat og-hitmin anggere!” ulug hweag-etfag.

⁸Airoho hweag-etfag ma re at Salomo en onggo uruk kwit de, “Allah nakni o, Haren an nakni Daud fam henda hundig boruk kwit deberuk katihindeg, Haren an at obalma raja unduhuk nobaharihin.

⁹ TUHAN Allah nakni, Haren an ap homi enunggul unuk humon mun wenahauk fug alereg on au enobahet raja welamag ulug unduhuk nobaharihin mu re, Haren an nakni fam sali hweag-itihin on anyo dipdoho nobahayuk.

¹⁰Ai halug de an den ap homi su melal-enepuk karuhuk on fahet anggoloreg lahi angge ai, nakni Haren nenda enggar on mel, wenggeleg on mel, og-nimin. Ne, airoho nobahamihin fug halug de, an den ap homi Hat homaliki humdoho su re nangginoho melal-enepuk karuhuk?” ulug hweag-etfag.

¹¹Airoho hweag-etfag ma At TUHAN en onggo Salomo fam uruk kwit de, “Haren de henggik dungon welaruhuk ulug mel, hangge di angge su angge fahet mel, raja welamag ulug mel, it ap haselei on waramag ulug mel, hat honggwareg hebe holuk yatdoho welaruhuk ulug mel, heng-nabehen fug, ite ap homi An nomaliki haren hwal-enepuk kamag ulug hobam domohe ferihik on ai melal-enepuk karuhuk en ulug, henda enggaron mel, wenggeleg on mel, heng-nabehen. Ma re haren heng ehen angge aire fano.

¹²Aireg ma re henda enggaron ai mel, wenggeleg on ai mel, de An den Hat og-hitmindeg, ai en foma amu on de hat hangge mun hoporoho welamag ulug hobahakeg, dungap hobahakeg, ap raja atam unduhuk welatswa on mel, fobik welamuhup on mel, etma enunuk we sebeleg hag deg kweleg, hat hunuk mun leho hobahakeg, duhuk,” ulug hweag-etfag.

¹³Airoho hweag-etfag ma re at Salomo anyo o Gibeon TUHAN Obam Sabo wereg ma wene kabog-debag ma etma embeselug de nikangge o Yerusalem watfag. Etman de it ap homi Israel on anyo aren melal-enepuk kwit welatfag.

¹⁴ Aren de autsi sehen foroho on tentara omano dog yabil lauk on fahet kereta emberimmu kulug dog yapil lauk on de ebe 1.400 en, ne wam kuda anduhunmu lauk kwit dog yapil lauk on de 12.000 en fouk debebag. Airoho debebagdeg de it enebe foma re o Yerusalem welamag ulug fesebag, ne nin foma alongdoho omano re o kota amu kwe etmano mundoho welamag ulug feseil lebag.

¹⁵ At hun Salomo anyo en melal-enepuk li etare o Yerusalem fam etma re no emas mel, perak mel, de hum-ham alereg ma re amu angge we hesangge welatfag angge, helep mel, e lak o Libanon etma mel, e ara hesangge on deg etma mel hag deg latfag.

¹⁶ It ap di angge su angge onggo balik waharuk kwit at raja let duruk katfag enap etman de wam kuda re o Mesir mel, Kewe mel, en walug kwelabik waharuk katfag,

¹⁷ne kereta dog yapil lauk on fahet de o Mesir en walug kwelabik waharukmu, re ai en de it o Het enap raja fam mel, Siria enap raja fam mel, kereta misig fahet onggo re uang perak on 150 en fam hundutuk katfag, ne, wam kuda re onggo 600 uang perak fam hundutuk katfag ma oko dag fil wilipuk katfag.