Read Ninia Yali 2 TAWARIKH 10 Bible Online

2 TAWARIKH 10 - Ninia Yali bible

2 TAWARIKH 10

¹It ap homi Israel on il utara fil wereg on anyo mundoho en de at Rehabeam raja unduhuk foul ulug kabog-debag ma re at Rehabeam etma lebag.

²Eta li em de at Yerobeam hun Nebat amloho anyo re hun Raja Salomo akol en o Mesir lebagdeg wereg lit esanggo holduk men de, At Yerobeam anyo it ap homi Israel on fahet raja unduhuk fehesa, urukmu esanggo holfagdeg de, at ebe nikangge o it ap homi Israel on wereg ma omano watfag.

³At watfagmu re it ap homi il utara fil welatfag on anyo en ayonggo febagdeg de inim seberoho at Yerobeam wereg ma akit kwik laul ulug lebag. Lebagdeg iren uruk kwit de,

⁴“Nenakni hun hat hakni Salomo anyo en de anggin mun anggoloroho nenobam febagma welatuhuk. Anggere nenakni hun haren nit anggin hauk kahe ale on au seap dimihin halug neg de, niren hun hat sebe ulug duruk kamuhuk,” ulug hweag-etfag.

⁵Airoho hweag-etfag ma re at Rehabeam en uruk kwit de, “An atam nenda wenggeluhuk deg anggere, nukoho henahan welatlug manu,” ulug hweag-esebag ma re it ap homi anyo enobam buhulfag.

⁶It airoho buhulduk kweleg de at Rehabeam anyo en de it ap lohon atam at akni Salomo wene komo hweag-utuk kamag ulug welatfag on omano hweag-esauk kwit de, “Ap etma an den onggo keroho hweag-isihi halereg?” ulug ebagdeg de, “An fam keroho din ulug hweag-numluhup?” ulug hein og-enepfag.

⁷Airoho heng og-enepfagma re iren onggo uruk kwit de, “It ap homi holduk on ai en li mundoho-mundoho etma an fam dipdoho neg duruk kamuhup boruk kahen halug de, hun haren it enendama boruk ale debeseheg, fano ale debeseheg, dulug de, it fam hele onggo fanoroho hweag-esakin,” ulug hweag-etfag.

⁸Airoho hweag-etfag famen de at Yerobeam en de, iren komo-dusa on anyo sebeloho furebouk fug angge embeselug de, aren it ap ketia at inim yabuk duruk on, at inim ambine on sauwe malik etmano enekit lebag.

⁹Lasireg aren it fam uruk kwit de, “It ap homi holduk on en an nobam uruk kwit, Anggin fanggin nenobam foruk on ai seap nesakin, ulug, heng nabik wahesa on ai fahet de, an den keroho hweag-isihi halereg boruk kahep?” ulug heng og-esebag.

¹⁰Airoho heng og-esebag ma re iren uruk kwit de, “Hun haren de it ap ai diroho hweag-esakiyug, An de nobabe eleg lahi ale etare deg kweleg de, an naknire mun maben deg kweleg[7] an neg de mun nomamne deg lahi.

¹¹An nakni en de hit henobam kumbi yihig en fetnangge henowatuk katfag famen de an den de kumbi bosiemanggen on fam yihig mu aeg sibing-sobang deg angge fam lalfisog henowatuk karuhuk. An nakni en de hit henobam anggin-fanggin mun anggoloroho henobaharuk katfag, famen de an den de eke nim mun anggin anggolo ngogdoho henobaharuk karuhuk!” ulug hweag-esakiyug, ulug hweag-etfag.

¹²Airoho komo-duswama weregman de it Yerobeam inim ap fomane anyo mel nim de at Rehabeam en hweag-esebag ale anyo higitdoho nikangge at Raja Rehabeam akit kwik watfag.

¹³It anyo watfagdeg duruk men de it ap sobal on anyo en komo-debag ale anyo bosilikap debelug de, ap watfag on anyo obam hape fam og-enepfag.

¹⁴Og-enepfagdeg de it ap ket sauwe on en komo-debag ale anyo higitdoho re, aren ap omano fam uruk kwit de, “An nakni en de hit henebe kumbi yihig en fetneangge henowatuk katfag, famen de an den kumbi bosiemanggen on fam yihig mu aeg sibing-sobang uruk angge fam lal-fisog henowatuk karuhuk. An nakni en de anggin-fanggin mun anggoloroho henobaharuk katfag, famen de an den anggin-fanggin ai mun anggolog ngogdoho henobaharuk karuhuk!” ulug hweag-esebag.

¹⁵It ap homi holduk on en heng uruk katfag on anyo hole fouk fug angge ape wong deberuk katfag. Famen de TUHAN Allah endama boruk ale higitdoho duruk katfag. Ne, TUHAN en hun Nebat amloho Yerobeam ai fam, diroho aruhu, ulug ebag ma at Nabi Ahia o Silo on anyo ebag ale higit amag ulug duruk katfag.

¹⁶ It ap homi Israel on omano en hauk men de, it ap homi en uruk ale anyo at raja en esanggo holuk fug ale neg durukmu hausareg de iren enele amitmit sup uruk kwit de, “Yaho ap homi Israel henap, aure nunggwelug ele onggondil kuruk kahep? Embeseiyek, nit de nenobam lakohon! At Daud mel, aren ondohoma on mel oman de nit fahet nunggwe ale eke nenepswa ma? At Rehabeam aire onggwareg en neg dauk kamagdoho embeseiyek!” ulug amitmit duruk katfag. Airoho debagdeg de it ap homi Israel on anyo enobam lebag ma re,

¹⁷at Rehabeam anyo re it ap homi wilayah Yehuda fam wereg on fahet neg raja welatfag.

¹⁸Airoho deg latfag famen de, at Raja Rehabeam en hun Adoniram it ap yabuk enele omamne fam hweag-esaukmu duruk katfag on anyo fahet kepala welatfag on anyo fam de, It ap homi etma onggon enebik lakin, ulug hweag-utuk katfag. Famen de it ap homi anyo en helep hwik hun anyo binggi watuk kweleg de, at Rehabeam amu neg de oluk wilipfagdeg folo-folo kereta wirig angge anyo emberimmu lahalug de buroho o Yerusalem lebag.

¹⁹Airoho debag huli anyo en de it ap homi il emberim utara fil welatfag on anyo en de at Daud en ondohoma on raja welatfag on fam de wene owag loleg ale neg ik waharuk katfag.