Read Ninia Yali 2 TAWARIKH 11 Bible Online

2 TAWARIKH 11 - Ninia Yali bible

2 TAWARIKH 11

¹Raja Rehabeam anyo o Yerusalem aik lebagdeg de, it ap homi enunggul unuk Israel on il emberim utara fil wereg on enowarik laheg, it ap homi Israel on fam at ebe omamne sahareg wereg ale anyo hwale feheg, dimin ulug de, aren ap it Yehuda on mel, Benyamin on mel, en sehen foroho on neg mun finik-fano on neg enebe wenako 180.000 en andog debesebag.

²Famen de TUHAN en Nabi Semaya anyo fam de,

³“At TUHAN en at Rehabeam inim it ap homi enunggul unuk Yehuda mel, Benyamin on mel, fam diroho eheik, ulug wene su hweag-esa lakin.

⁴Mundoho atfag ale etma re An nenda berihik ale higitdoho anggere, hit henori Israel on ai hinim weim abik lauk eleg, henobam lakiek, ulug hweag-esa lakin,” ulug hweag-etfag. Airoho ebag ale anyo it omano hweag-esebag ma re, iren Yerobeam inim weim apul bebag ale anyo eleg atil lauk em de it enebe abirangge en TUHAN en ebag ale anyo neg hole febag.

⁵At Rehabeam anyo o Yerusalem wereg lit de, o kota wilayah it ap homi Yehuda on wereg ma inim, Benyamin on wereg ma inim omano elehet omamneroho wirukwag ulug mingming-enepfag. Ne, o elehet wirukwag ulug mingming enepfag kwe aire:

⁶Kota Betlehem mel, Etam mel, Tekoa mel,

⁷Bet-Zur mel, Sokho mel, Adulam mel,

⁸Gad mel, Mares mel, Zif mel,

⁹Adoraim, Lakhis, Azeka,

¹⁰Zora, Ayalon, Hebron mel.

¹¹Aren de o kota ai elehet fam mun omamne debeil lebagreg de, o kota ebe domog siburu nauk on nim, zaitun ahalue nim, anggur ahalue nim, dog mapnu angge perisai nim, inggisim inim, mundoho fouk debeil lebag.

¹²Airoho debebagdeg de o kota domog fahet de ap it sehen foroho on melal-enepuk on komandan misig heheg feil lebag. Airoho debesi ai fam de o wilayah Yehuda inim Benyamin inim anyo re at omamne apma welatfag.

¹³Hun Yerobeam nim it raja at obalma inatfag on nim en de, it ap imam TUHAN obahet yabuk duruk on inim letdoho duruk kamul fug ulug, il lauk en de, it Lewi enap anyo re iren enenggela lei mel, eneyabuk mel, embeselug de o oko re o Yehuda fam mel, Yerusalem fam mel, aik watfag.

¹⁴It ap imam mel, it Lewi enap mel, wilayah it ap homi Israel on wereg kwe etmano en de at Rehabeam nim seberik lauk katfag.

¹⁵ At Yerobeam en de kembu sapi on eke wiri febag on ai apne weheg, kembu ai obahet deheg, oluk-oluk angge muruahun mel hag angge omano apne weheg, duruk kamag ulug de hwal-enap onggwareg en in-enepil lebag.

¹⁶Airoho durukmu re it ap homi enunggul unuk Israel on enenda demdoho fam it ap homi Israel on enakni TUHAN Allah anyo apne wauk katfag on halug de, it ap Lewi enap anyo o oko Yerusalem laukmu etmano, iren de Allah it enambu-enombasi en apne wauk katfag on ai fam, wam waroho TUHAN og-utuk kamul ulug de, iroho o Yerusalem waharuk katfag.

¹⁷It airoho watfagreg de tahun henahan ai hoporoho re hun salomo amloho Rehabeam anyo en melal-enepuk ale anyo fahet fano bolug durukmu re, it enebe re at Raja Daud mel, Raja Salomo mel, en melal-enepuk li welatfag omano hagdoho wereg latfag. Ai fam de kerajaan Yehuda anyo omamne hum atuk katfag.

¹⁸At Rehabeam de ohwe unuk Mahalat anyo hwelebag. Hwe Mahalat ai akni re hun Yerimot, hun Daud amloho isinga hwe Abihail, hun Eliab ahaloho, hun Isai omba anyo.

¹⁹It de enomaliki ap enebe henahan welatfag, on de: Yeus, Semarya, Zaham nim eta.

²⁰Ai en de at Rehabeam anyo hun Absalom ahaloho hwele Maakha anyo hwelesireg de, iren de enomalik ap enebe ohwan angge endag-enepfag, on de: Abia, Atai, Ziza, Selomit ha eta.

²¹Hun Rehabeam aire ohwesi enebe 60 en welatfag, ne ohwesi enamingming angge famen at ohwe hweimohwe debag on de enebe 28 en welatfag, ne omaliki et ahwelani et de enebe 60 en endag-enusug latfag. At ohwesi ebe on nim, hware on nim etman de hwe Maakha ai neg de mun enda hundig deg latfag on.

²²Ai fam de at omaliki fomane omano wereg kweleg de at hwe Maakha amloho Abia ai neg de mun endareg latfag ma, at Abia anyo at obalmangge raja inamag ulug momalfag.

²³At Rehabeam en de enda mun wenggeleg fam de, at omaliki omano o kota it wilayah Yehuda wereg kwe mel, Benyamin on wereg kwe mel, elehet mun omamneroho oho kwe etmano yabuk yohwan-doho feseil lebag. Airoho fesebagdeg de aren nauk angge mun bulel-balaldoho og-eseheg, it enohwesi oho hum-hamdoho og-eseheg, debag.