Read Ninia Yali 2 TAWARIKH 12 Bible Online

2 TAWARIKH 12 - Ninia Yali bible

2 TAWARIKH 12

¹At Rehabeam raja inatfag deg anyore ebe unduhuk wereg on anyo omamneap deberuk kwit de, at inim it ap homi Israel on mundoho inim en de TUHAN awene melaleg baleg wereg on anyo duk fug angge deheg,

²at fam dipdoho duk eleg angge welaheg, duruk katfag. Ai fam de TUHAN en it unggum og-esebag. At Rehabeam raja inatfagdeg melal-enepuk katfag lien de tahun ohwan welatfagdeg foab on fam de, at raja Mesir on hun Sisak anyo autsi kereta fam dog apil lauk on de enebe 1.200 en, ne tentara kuda

³fam lahalug dog abil lauk on de enebe 60.000 en inim, it sehen foroho enap esan-esan angge mun wenahauk fug aleroho inim, it Libia enap sehen foroho enap inim, Suki, Sudan enap inim, watfagdeg o Yerusalem bin kwik watfag.

⁴Kwik watfagdeg de it ap homi Yehuda on en o kota elehet omamneroho oho on omano mundoho deldil de o Yerusalem huli feik lebag.

⁵Etali em de it ap homi Yehuda on melal-enepuk on enowesi inim, at Raja Rehabeam inim, at Sisak anyo enakol en de wilipfagdeg o Yerusalem kabog-dik lebag. It airoho kabogdeg wereg ma re at Nabi Semaya enekit watfagdeg uruk kwit de, “TUHAN elere diroho eheik, Hiren oho An nobahalug neg lauk katuhupmu re, ketia re hit An den fotog-henobahakimu at Sisak apma amukoho lahep ai, eheik,” ulug hweag-esa lebag.

⁶Airoho hweag-esa lebag ma re at raja nim it ap homi melal-enepuk on anyo en de, nit de mundoho siag duruhukmu ulug fag-debagdeg de, iren uruk kwit de, “At TUHAN en deheik ale on aire mun katuk deg ale deheik,” ulug ebag.

⁷Iren airoho ebag on fam At TUHAN en il esauk men de iren enenda mun sebele fahat dalug urukmu esebagdeg de, Aren Semaya fam uruk kwit de, “Iren nit siag duruhuk ulug mundoho fag-dehesama re An den it folo-folo del-enebikoho lahi. Ne, an den it enebe elehapdoho fesemin fug. Yerusalem ohore siahap atmisi fug.

⁸Aireg famen de, iren An nobahet neg deheg, ai en it ap o kwenangma suma enomamne humon wereg enap enobahet duruk ale ai aham deg anyo enegdoho howag ulug de, at Sisak en it apmaap henobahaku, eheik ulug hweag-esakiyug,” ulug hweag-etfag.

⁹ Airoho ebagdeg duruk men de at Raja Sisak anyo o Yerusalem bin kwik waharuk kwit de, o TUHAN Obam wirigmu mel, at raja obam wirimu mel, en di angge su angge onggo mun hum angge mel, at hun Raja Salomo en dog mapnu angge perisai emas on fam hilinggebag on omano mel, mundoho huhul hwelag-watfag.

¹⁰Airoho hwelebag ma re at Rehabeam en de no perunggu on fam obalmangge ulug hilinggebagdeg de it ap sehen foroho on enowesi perwira o hun raja obam bumbuk fam kwik laukmu sokole humon fam etma kahaleg wereg on en hwalduk kamag ulug og-esebag.

¹¹Airoho og-esebag ma re nukoho hundig omano at raja anyo TUHAN Obam wirigma laukmu re it ap at along baloho lauk katfag on omano en dog mapnu angge omano walug lalug de nikangge o ap en kahaleg wereg ma anyo feik waharuk katfag.

¹²TUHAN il hanim de at raja anyo TUHAN apma enda sebele fahat dalug deheg, it ap homi Yehuda on wereg ma etma foma fano ale deheg, durukmu esebagdeg de At TUHAN en Rehabeam fam olok besi on anyo eleg aheg, ne at ebe mun elehapdoho foruk ale anyo embeseheg, debag.[8]

¹³Hun Rehabeam isingare hwe Naama o Amon hwe anyo. At Rehabeam ebere umur 41 tahun deg li raja inatfagdeg de, aren o wilayah it ap homi enunggul unuk Israel on wereg kwe omano en o kota Yerusalem ap homi en wene kabog-duruk kamuhupmu ulug At TUHAN en momaloho febag ma etmano, 17 tahun raja unduhuk wereg lit melal-enepuk katfag. Airoho o Yerusalem fam etma at Rehabeam en melal-enepuk kwit wereg ma re at omamne humon welatfag.

¹⁴At Rehabeam en de TUHAN enda boruk ale anyo higitdoho duruk katfag fug mu, aren kwasikdoho neg duruk katfag.

¹⁵At Rehabeam wereg lit indipmen dil onggombimu aik lebag ale aire buku sejarah it endam etma duruk katfag ale ulug on hun Nabi Semaya ambuku fam inim, buku sejarah duruk katfag ale hun Nabi Ido ambuku fam inim etma baleg wereg. At Rehabeam dulug Yerobeam dulug etare hundig-handig weim yap-yap neg uruk katfag.

¹⁶At Rehabeam anyo waratfag ma re o kota Daud obam omano it ap raja neg sal-enepuk katfag ma etma salfag. Ne, at obalmanggere at amloho Abia anyo raja inatfag.