Read Ninia Yali 2 TAWARIKH 13 Bible Online

2 TAWARIKH 13 - Ninia Yali bible

2 TAWARIKH 13

¹At hun Yerobeam anyo raja it ap homi Israel on enobahet in atfagdeg hwal-enepuk katfag lien de 17 tahun debagdeg de, tahun 18 on deg li at hun Abia it ap homi Yehuda on enobahet raja inatfagdeg de,

²o Yerusalem fam etma tahun henahan fam melal-enepuk katfag. At isinga unuk de hwe Uriel obam o kota Gibea on anyo. Airoho weregman de it hun Abia dulug hun Yerobeam dulug anyo weim liolfag.

³Airoho dil lauk kwit de, at Abiam en de autsi sehen foroho on de enebe 400.000 en kabog esebag, ne Yerobeam en de autsi sehen foroho on enebe 800.000 en kabog esebag.

⁴Airoho debeswareg de ap esan biren angge etano o Efraim dom kwe etma nalukwema-halukwema atuk kwit dog yapuk katfag. Airoho yapuk kwit de, at Abiam anyo Dom Zemaraim fam lahasireg at Yerobeam inim, it ap homi Israel on fam inim ele hwiruruk kwit de, “Holiek!

⁵It ap homi Israel on enakni TUHAN Allah anyo en de Daud nim sali wat-wat atuk kwit de, Hat hambiangma on en de it ap homi Israel on su li mundoho-mundoho etma melal-enepuk kamuhup, ulug hweag-itsi, anggere sali aire mun dahan debouk fug alereg aire hit oho henoluk.

⁶Aireg famen de at Yerobeam hun Nebat amloho aire akni Raja Salomo anyo ele sahale folug duruk katsi.

⁷Hun Salomo amloho Rehabeam ai etali em de di ale su ale mun apeleg deg ma re at Yerobeam anyo en ap enobabut mun siag on, it enenda boruk ale omano dukwag ulug kabog-debeswa ma re aren it kwe bal-enebuk fug ale atsi.

⁸Hit henebe esan logdeg ma hit henowam sapi emas on kembu dewa ulug at Yerobeam en wit-hesasi on ai et wereg ai en de, TUHAN en at Daud ambiangma on fam enomamne enap welamag ulug og-esasi on au sahaloho foul ulug duruk kahep a?

⁹Hiren de it TUHAN fahet imam hun Harun ambiangma on omano mel, it Lewi enap omano mel, mundoho mukoh wilip-enepuhup omano re? Airoho enepuhupdeg enobalma fahet ulug de, hiren ap sa en wam sapi misig oho eke, ne domba sabiren oho eke walug waharuk halug ai mundoho, ap ai on imam unduhuk foul, ulug hesangge it ap homi enunggul unuk amu on en duruk anyo hagdoho hiren apne wauk kahep angge aire ebe demdoho Allah fug famen, hiren imam unduhuk feseruk kahep. Famen de nit de airoho duruk kahe fug.

¹⁰Nit de it Harun ambiangma on halug aire mundoho-mundoho imam atuk kamuhup, ne it Lewi enap halug de, it imam etma let-enepuk. Nit de nenakni TUHAN Allah anyo o fotog-esalug la fug angge At obam neg apne wauk kahe.

¹¹O hubet hupmu inim nukoho hundig-hundig iren TUHAN obahet amben fano angge yal-ereheg, wam waroho yaldukmu omano yal-ereheg, roti unuk wareg[9] anyo werako feseik laheg, duruk. O hup angge re lampu owag bosie emas fam buhundeg angge anyo ombagbag deberuk kwit neg wereg. Hit de TUHAN anyo mun o fotog-esalug lauhup famen de, nit neg de, At TUHAN ele melaleg anyo holoho neg duruk kahe.

¹²Yaho hit Israel henap, it henambu henombasi enakni TUHAN Allah ai ele sahaloho foruk eleg! Nit de melal-nenepuk on At Allah amu neg deg ma it At obahet duruk on imam omano re, niren hit henowarik wamul en eneg aleroho ulug bohweap trompet ele furukoho suma wereg su. Hit de henalong ahep fug halereg!” ulug hweag-esebag.

¹³Airoho uruk kweleg anyo re at Yerobeam en de it ap Yehuda enap anyo enowarik lowag ulug de, it foma enambol fil walinggik lalug kwik wamag ulug hweag-esebag, ne it foma re enalukwe fil en inim yabukwag ulug hweag-esebag.

¹⁴It Yehuda enap anyo en hauk men de it anyo hukdoho kwelabe fesebag ma esabagdeg de, TUHAN en let-nenebukwag ulug obam hwirebag. It imam omano en de trompet ele furil lauk em de,

¹⁵it Yehuda enap anyo re weim amimit sup ebagdeg de, it anyo hun Abia en og-eneplug de weim yabik lebag. It Yehuda enap anyo Allah en let-nenebukwag ulug hwiruruk kweleg anyo re, At Allah en at Yerobeam mel, it Israel enap mel, enalong elehapdoho fesebag ma re,

¹⁶it enakol en wilipfag, ne Allah en de it Yehuda enap fil enalongap debeseruk kwit de, it Israel on anyo enalong elehapdoho fesebag.

¹⁷Hun Abia mel, autsi sehen foroho enap mel, ai en it Israel enap fil de mun alongdoho enowatfag ma it Israel enap en ap sehen foroho on mun finik-fano on neg enebe 500.000 en enowatfag ma waratfag.

¹⁸It Yehuda enap en de it enambu enombasi enakni TUHAN Allah anyo omamne fam enenda hembisi folug debag fam de it fil enalong atfag.

¹⁹At hun Abia en at Yerobeam autsi mel anyo mug-eneplug lauk kwit de, aren o kota foma o sili horog kwe etma welatfag on delfag. Ne, o aren delfag on etare, o Betel mel, Yesana, mel, Efron mel.

²⁰Hun Abia raja wereg lit melal-enepuk li re at Yerobeam anyo re at omamne welatfag on anyo hwaluk fug ale atuk katfag. Ambiangma en de at ebe TUHAN en binggi watfag.

²¹Famen de at Abia neg de ekenim omamne along atuk katfag. Hun ai ohwesi re enebe 14 en welatfag, ne omaliki re enebe 22 en, ne ahwelani re enebe 16 en welatfag.

²²Hun Abia ai en duruk katfag ale fomane mel, at ele uruk katfag ale mel, at duruk katfag ale mel, de buku Nabi Ido en it endam duruk katfag ale balfag on ai fam baleg wereg.