Read Ninia Yali 2 TAWARIKH 14 Bible Online

2 TAWARIKH 14 - Ninia Yali bible

2 TAWARIKH 14

¹At Raja Abia anyo waratfagma o kota Daud obam it ap raja sal-enepuk katfag ma etmano sale febagdeg, at obalmangge re at amloho Asa anyo raja inatfag. At Asa inatfagdeg melal-enepuk li em etare o ap homi Yehuda on wereg ma etma tahun 10 en ai fam di wene su wene eleg angge we enape wongdoho welatfag.

²At hun Asa en de mun fano ale neg deheg, wene katukdeg ale neg deheg, duruk katfag ai fam de aren TUHAN Allah enda ahayeg deg ale neg duruk katfag.

³It ap homi enunggul unuk amu on en wam waroho yalduk katfag angge mel, iren kembu wutuk katfag ma mel, oko dagma embeseheg, kembu dewa ahut wirig on omano halik-halogdoho lahabe feheg, kembu enesinga unuk Dewi Asyera ai wirihi unduhuk febag angge anyo domako belabe feseheg, debag.

⁴Aren it ap homi Yehuda on fam uruk kwit de, Hit henambu-henombasi enakni TUHAN Allah ai enda boruk aleroho neg welaheg, At ele hweag-hesauk on anyo mel, At awene melaleg wereg on anyo mel, holoho deheg, duruk kamek, ulug hweag-esebag.

⁵Aren de kembu wutuk mu obale omano mel, enanggembu fahet amben fano angge ulug yalduk katfag kwe omano mel, o Yehuda fam etmano en mun oko wilipfag. Airoho debag ma re o kerajaan Yehuda fam etma aren melal-enepuk li mun youk eleg angge welatfag,

⁶ai fam de o it ap homi Yehuda fahet on kota etma fahet elehet fak omamne on witil lebag. TUHAN en o etma youk eleg angge enobam fanoroho wereg ale on og-esebag ma re tahun foma minggiroho weim abug eleg angge welatfag.

⁷Airoho wereg lit de at Asa en it ap homi Yehuda on fam uruk kwit de, “Niren nenakni TUHAN Allah anyo enda boruk ale higitdoho duruhuk fam de o su niren sebeleg lit welahe. Ne, aren de nit hwal-nenebeheg, o kwenang su fam abirangge di wene su wene eleg angge welamag ulug fahat-nenesug lit welaheg, duruk. Anggere niren o it ap homi Yehuda on wereg kwe kota omano fak lehet maseroho weheg, ap lahalug fururuk kwit wereg ma wireheg, sokole humon kwik waharuk on anyo e lang owag mel, nunggulig on mel, omamne on belabeheg, dukohon lahe,” ulug hweag-esebag. Airoho hweag-esebag ma re iren yabuk anyo duruk ale indip debagdeg de, duruk men neg de ambiangma mun fanoroho neg debag.

⁸Hun Raja Asa ai autsi tentara welatfag ale re, it Yehuda on en ap dog mapnu angge mel, inggisim mel, enenggikmu wereg on de enebe 300.000 en, ne it Benyamin on en ap dog mapnu angge mel, sehen mel, dog angge mel, enenggik seneg latfag enap de enebe 280.000 en welatfag. It enebe abirangge re ap mun milil-melal deg ma enambong et mun si-sereg latfag enap.

⁹Nukoho misig salim de ap obam Sudan ahun eke unuk de Zerah ai en de autsi tentara re enebe 1.000.000 en nim, kereta emberimmu kulug dog yapil lauk on de 300 en nim, de o Yerusalem bin kwik watfag. Airoho kwik watfagdeg de watfag-watfag re o Maresa huli etma aik watfag.

¹⁰Airoho wahail lauk em de hun Asa anyo ohore at Zerah mel dog abikoho re wilibik lebagdeg de, it enebe enamu domog enautsi o Zefata donggoma o Maresa en horogma etma eratfag.

¹¹Airoho eratfagdeg de at Asa en TUHAN fam somban uruk kwit de, “TUHAN Allah nenakni, ap homi enomamne wereg on fam de it enomamne eleg on de we Haren neg let-enepuk kahenma, ketia Haren neg nit let-nenebin nenakni TUHAN. Nit de Hat hobam neg lomboreg lit, Hat hunuk fam neg, it ap esan hum enap su mel weim yabik wilipuk kahe. TUHAN, nit nenakni Allah we Hat hamu welahenma re, Hat hebe ap homi en halong elehapdoho hobahakup fug, nakni,” ulug somban ebag.

¹²Airoho somban ulug de, Asa nim autsi tentara nim anyo it Sudan enap mel, weim yabik wilipfag man de, TUHAN en it tentara Sudan on enalong elehapdoho fesebag ma re enakol en mun bu ba ebag.

¹³It bu ba urukmu re at Asa autsi tentara mel, en de it anyo mug-eneplug lebagdeg de o Gerar huli etma muko feseik lebag. At TUHAN en nim, it tentara Yehuda enap en nim mun enowaroho fesebag ma re it Sudan enap fil de ap enebe humdoho waratfag, nit it enengge di angge su angge oho humdoho deldebag. Ai en de At TUHAN en it ap homi o kota wilayah Gerar fam welatfag on etma mun enakol humon debesebag ma re, it enobam mundoho siahap-biahapdoho febag. Airoho debesebagdeg de it tentara Yehuda on en de o kota ai fam en enangge di angge su angge humdoho del debag.

¹⁵Nikale iren de ap wam endetuk kwit enobam sabo sal heheg wereg on omano fam bin kwik lauk kwit de enowam domba mel, unta mel, humdoho hohouk dalug watfag. Mundoho airoho debagdeg neg de it anyo enebe enobam Yerusalem watfag.