Read Ninia Yali 2 TAWARIKH 15 Bible Online

2 TAWARIKH 15 - Ninia Yali bible

2 TAWARIKH 15

¹Hun Obed amloho Azarya anyo Allah Aheime en obam atfagdeg melalduk kweleg de,

²hun Raja Asa wereg ma akit lebagdeg aren uruk kwit de, “Hun Raja Asa nim, hit ap homi Yehuda on nim, Benyamin nim! Henesanggo holiek! Hiren At TUHAN horogma wereg halug de, At oho hit horogma wereg. Hiren nit su keroho dul bolug hweag-nesowag ulug heng uruk halug de, aren hit og-hesauk karuhu. Famen de hiren At anyo henapeleg atlug duruk halug de, Aren oho hit apeleg aruhu.

³It ap homi Israel on anyo re o li anunuroho etma Allah demdoho on anyo obahet duk eleg angge welaheg, enawene melaleg it holoho duruk on oho eleg angge welaheg, it enowesi imam en it hweag-esauk on oho eleg angge welaheg, deg latswa.

⁴Famen de it fam enobam anggin atuk mu etano neg de, it ap homi Israel on enakni TUHAN Allah anyo en let-nenebukwag ulug heng eheg, Aren diroho diek suroho diek hweag-nesowag ulug heng deheg, durukmu Aren og-esauk.

⁵Eta li em de it ap homi o amumu lauk kwit de we enambong seroho la fug alereg, o di kwe su kwe etma mundoho nong-hong deg ale neg durukmu re.

⁶At Allah en it ap homi enesahalimu nong-hong esaukmu re, it enunggul unuk eke on en de it enunggul unuk eke on sebel enusug laheg, o kota eke en de kota ekema on sebel enusug laheg, duruk.

⁷Famen de hit neg, henenda hambuk dalug de henambong se amuk. Hiren duruk kahep on aire ambiangma fano atuk mu hahup anggere,” ulug hweag-esebag.

⁸Airoho ulug de at hun Obed amloho Azarya anyo en urukmu at Asa anyo en holfagdeg de endama mulug-malag debag ma re aren o Efraim dom kwe kota sebeloho fesebag on omano mel, o it ap homi Benyamin on nim, Yehuda on nim, wereg kwe etmano mel en kembu wereg on omano mundoho oko wilipfag. Airoho debebagdeg de aren TUHAN obahet waroho yaldukmu obale mezbah o TUHAN Obam wirigmu anyo en ambe olohotma anyo fam wereg latfag on anyo oho hwaloho febag.

⁹It ap homi Efraim on mel, Manasye on mel, Simeon on mel, anyo en hauk men de TUHAN en at Asa let durukmu hebagdeg de, o wilayah at Asa en melal-enepukmu kerajaan anyo fam welamul ulug it enebe mundoho at Asa akit seberik watfag. Hun Asa anyo at Raja inatfag li en de tahun ohwan welatfagdeg, tahun foab angge bigalem henahaneg on fam de,

¹⁰at Asa en it ap homi Yehuda on mel, Benyamin on mel, o Yerusalem kabog-dik manik ulug hweag-esebag ma re it ap homi anyo kabog-dik watfag.

¹¹Kabogdik watfagdeg de, nukoho ai salim iren TUHAN obahet wam sapi ebe 700 en inim, domba 700 en inim, weim yabik lebagdeg delug watfag on omano waroho yal-etfag.

¹²Airoho yalfagdeg de iren enele sali uruk kwit de, “Niren nenebe nenenda abirangge mundoho fam, nit nenambu nenomba enakni TUHAN Allah anyo enda boruk aleroho neg wereg lamuhuk,” ulug enele sali watfag.

¹³Iren uruk kwit de, “Ap oho, homi oho, sobal on halug sauwe on halug oho, TUHAN enda boruk ale anyo higitdoho wereg fug halug de ebe unggum obam folug binggi waruhup.”

¹⁴Ulug de iren uruk kwit de, “Nit nenele sali ehe on ai furoho seneg lamuhuk,” ulug enele hum fam TUHAN fam hombuk balfag. Airoho ebagdeg de iren enahayegdoho anggiluk duruk kwit bohweap trompet fururuk katfag.

¹⁵Iren de hombuk balehe on ai nenenda demdoho fam dehema ulug de, it ap homi Yehuda on mundoho enahayeg hebag. Airoho duruk kwit de iren TUHAN obahet wene kabog-duruk ale oho enehayeg duruk katfag ma At TUHAN en oho it og-enepuk ale enda ahayeg halug de, it enobam wereg ma wilayah etmano fam enenda youk eleg angge enambong seroho welamag ulug debesebag.

¹⁶Airoho debagdeg de at hun Raja Asa ombalo hwe Maakha anyo en de kembu hwe on unuk Dewi Asyera kwenang di angge su angge hesilduk on ulug uruk katfag on mun hesangge naleg-haleg duruk katfag on anyo ahut ilitdeg witfag ma re hwe ai at eyabuk de hwe raja isinga ulug uk hag Ibu Suri welatfag on anyo eleho febag. Airoho eleho febagdeg de at Asa en kembu ilitdeg anyo irik-erapdoho re o Lembah Kidron etma yalfag.

¹⁷At Asa en de o kwenang at welatfag on fam etman ap homi en kembu apne wauk kwe etmano mundoho erap-ferapdoho embesebag fug famen de, at Asa oluk welatfag huli aire, aren TUHAN fam mun dipdoho neg duruk katfag.

¹⁸Emas, perak mel dog yapuk kwit delfag on omano re akni en on et aren on et TUHAN angge welamag ulug TUHAN Obam wirigmu etmano feik kwebag.

¹⁹At hun Asa en melal-enepuk kwit neg weregman 35 tahun welatfag huli aire o etma fam weim abug oho eke eleg angge welatfag.