Read Ninia Yali 2 TAWARIKH 16 Bible Online

2 TAWARIKH 16 - Ninia Yali bible

2 TAWARIKH 16

¹At Asa anyo it ap homi Yehuda on fahet raja inatfagdeg melal-enepuk men neg 36 tahun huli weregman de, it Israel on enowe Raja Baesa anyo o it ap homi Yehuda on enowarik kwik lamin ulug watfagdeg o Rama anyo omamneroho wereg lit de o Yehuda on wereg ma etma kobokwe wilip am kuk durukmu anyo sok latfag.

²Airoho debag ma re at Raja Asa anyo en de, o TUHAN Obam wirigmu etmano en nim, o at raja wereg ma etmano en nim obale di angge su angge oko feik kruk katfag ma etmano en no emas mel, perak mel, wasireg de aren raja Siria on hun Benhadad anyo akit o Damsyik mondotuk kwit de, wene yonggo diroho inim mondotfag,

³“Raja Israel on hun Baesa anyo autsi nim o wilayah an den on fam kwik wahausareg duruk on ai sombandoho enobam lowag ulug, nowe hat hinim hundig welahep ale anyo bale fohun en heng hapuk kwit de, hahayegdoho ulug an den emas, perak mel mondorik wahi ai. Anggere, it nenaknisi hundig latfag hagdoho nit oho airoho seberul en de manu,” ulug mondotfag.

⁴Airoho mondotfag ma re hun Benhadad anyo en de aren eheik on ai fano bebagdeg de, autsi it tentara enowesi perwira omano mel en de o it ap homi Israel on wereg kwe kota omano bin kukwag ulug hweag-esebag. Airoho hweag-esebag ma it anyo kuruk kwit de, o Iyon, Dan, Abel-Bet-Maakha mel, o it ap homi enunggul unuk Naftali on en enangge di angge su angge kabog-da waharuk katfag ma kota etmano mel, mundoho enalong elehapdoho febag.

⁵It airoho debag ale anyo at Raja Baesa anyo en holfagdeg de o Rama omamneroho ulug witul kuruk katfag ale anyo heila debeheg, ne o kota ebe anyo embeseheg debag.

⁶Airoho debag ma re at Raja Asa en de at Baesa en e mel, helep mel, o witfag angge omano fam o kota Rama mel, Geba mel, Mizpa mel, omamneroho wuruhuk en ulug de selmahaik lowag ulug it ap homi Yehuda on omano hweag-esebag.

⁷Eta li em de Nabi Hanani anyo hun Asa akit watfagdeg hweag-utuk kwit de, “It Sudan inim Libia inim de ap sehen foroho on enebe mun hum-ham alereg latswa, ne kereta ilonggoma kulug dog yapil lauk angge mel, no kuda emberimmu hweriako lauk kwit dog apil lauk angge oho re mun humdeg latswa, famen de haren TUHAN fam henda dip debelug duruk katihin mu re, TUHAN en hat halongap hobahasi. Famen de Haren TUHAN Allah anyo fam henda dip debouk fug angge en at raja Siria on anyo fam henda dip debehenma, re haren it tentara Israel[10] on enalong elehapdoho fesouk ale re mun eleg aha ai.

⁹It ap homi enenda TUHAN obam dip debelug duruk halug At TUHAN en omamne og-esamin ulug o kwenangma suma mundoho TUHAN en il hwal-enepuk kwit wereg. Haren de mun morue ale dirihin mu re, ketia huli en de ap en hinim weim abik waharuk kwit neg wereg ma hauk karuhun,” ulug hweag-etfag.

¹⁰Airoho hweag-etfag ma re at Nabi Hanani en ebag on ai fam de at Asa anyo endama mun olok atfagdeg de aren nabi anyo o ap homi sabu hetdoho kwelap-enepukmu etmano kwelapfag. Eta li em de at Asa en it ap homi holduk on fomane nim enobam anggin-fanggin feseruk katfag.

¹¹At Asa raja unduhuk wereg lit melal-enepuk kwit duruk katfag ale indipmen bilinggoho ambiangma aik lebag on anyo mundoho re, buku it ap homi Yehuda on mel, Israel on mel, en duruk katfag ale enebug baloho wereg latfag on ai fam lisu baleg wereg.

¹²At Asa anyo raja wereg lit melal-enepuk katfag on anyo 39 tahun aik lebag ma re at Asa ebe eyog birenet ouk anggolo humon hauk katfag. Airoho ouk wauk kwit de, TUHAN en let-nabukwag ulug At heraruk anggere aren dokter ap ouk hiling-enepuk on fam heng-ik lebag.

¹³Airoho debagdeg weregman tahun debagdeg neg de hun anyo waratfag.

¹⁴Waratfagma re at ebe wareg anyo re it ap en ap homi waratuk halug amben duk no ulug foruk angge, no amben angge fam wirig angge febagdeg de it ap raja sal-enepuk katfag ma o kota Daud obam etmano salik lebag. Airoho sale febagdeg de at ebe along boruk kwit ulug de it ap homi en de indok yaleg ahaindok humon yalfag.