Read Ninia Yali 2 TAWARIKH 17 Bible Online

2 TAWARIKH 17 - Ninia Yali bible

2 TAWARIKH 17

¹At Asa anyo mundoho waratfag ma re obalma at amloho Yosafat anyo it ap homi Yehuda on fahet raja inatfagdeg it ap homi Israel on nim weim yapuk kaikoho aren omamneap dobahat-dauk kwit de,

²o it ap homi Yehuda on weregman elehet fak omamneroho oho kwe etma o kota mundoho mel, o it Yehuda on wereg ma etman dag fil etma kota wereg on omano fam mel, kota o wilayah Efraim fam on akni en delfag on omano fam mel, tentara feseil lebag.

³At Yosafat ebere akni en duruk katfag hagdoho duruk kwit, kembu apne wa fug angge,

⁴Allah obahet neg deheg, it ap Israel on enowesi raja wereg lit duruk katfag omano hagdoho duk eleg angge, aren Allah wene melaleg anyo furoho holoho deheg, durukmu TUHAN en at Yosafat fanoap deberuk katfag.

⁵TUHAN en de at Yosafat ebe raja ai omamne on it ap homi Yehuda on fahet welamag ulug debeseruk katfag. Airoho deberukmu re it ap homi holduk on en de di angge su angge at ahayegdoho ulug og-utuk mu at enggik wereg on atuk mu ap homi en along bolug leho foruk katfag.

⁶At enda anyo fam de kembu hwe on unuk Dewi Asyera it Yehuda on wereg ma kwe etma welatfag on omano mel, kembu wutuk katfag kwe omano mel, aren mun erap-ferap debebagdeg de, aren TUHAN ele furoho holoho neg duruk katfag.

⁷Airoho duruk kwit de, at ebe raja inatfagdeg melal-enepuk katfag on anyo tahun henahaneg on atfag li em de, o kota it ap homi Yehuda on wereg kwe etmano TUHAN en wene melaleg diroho diyug suroho diyug ulug baleg wereg on anyo hweag-esa lowag ulug it pemerintah yabuk lehoma hwerieg enap omano mon-enepfag. It mon-enepfag enap aire: Benhail, Obaja, Zakharia, Netaneel, Mikha ha.

⁸It ai mon-enepfag ma laukmu re it ininim de it Lewi enap enebe soho en inim, it imam enebe biren inim, seberoho lebag. It Lewi enap ininim lebag on etare: Semaya, Netanya, Zebaja, Asael, Semiramot, Yonatan, Adonia, Tobia, Tob-Adonia nim lebag. Ne, it ap imam biren etare: Elisama nim de Yoram nim.

⁹Iren de buku TUHAN awene melaleg baleg wereg on anyo walug de o kota it ap homi Yehuda on wereg kwe di kwe su kwe etmano hweag-esa lebag.

¹⁰TUHAN en de it ap homi kerajaan amu on it ap homi Yehuda on weregman horog kwe welatfag on omano en Raja Yosafat nim weim yapuk ale fahet enakolap debesesi.

¹¹It ap homi Filistin enap en at ahayegdoho ulug de perak mel amu angge mel hum-hamdoho og-irik watfag, ne it ap homi o Arab on en de wam domba ebe 7.700 en inim, kambing ebe 7.700 en inim og-irik watfag.

¹²At Yosafat en de o it ap homi Yehuda on wereg ma etmano elehet fak omamne humon nim, di angge su angge foukdoho forukmu fahet inim, mundoho witil lebag. Ai fam de at Yosafat anyo eke salim eke nim omamne humon atuk katfag.

¹³Aren de o etmano airoho wiri febagdeg de siburu di angge su angge nauk on fahet olma etma hum-hamdoho kwelabik kuruk katfag. Ne, o Yerusalem fam etma re ap tentara enowesi leho on perwira omano mun sehen anggen on neg,

¹⁴enautsi it enunggul unuk enggikdoho deg ale domog feseil lebag. Hun Adna aire it Yehuda fam etman enunggul unuk enggikdoho deg latfag on omano fahet enowe panglima leho welatfag. Aren de it ap tentara enebe 300.000 en melal-enepuk katfag.

¹⁵Ap bireneg on ekere unuk Yohanan ai; aren de it ap tentara enebe 280.000 en fahet enowe kepala welatfag.

¹⁶Ap henahaneg on de, hun Amasia hun Zikhri amloho ai; (Hun Amasia ebere we enda fano en TUHAN obahet duruk katmin ulug duruk katfag ahun.) Aren de it ap tentara enebe 200.000 en fahet enowe kepala welatfag.

¹⁷Ne, it ap homi enunggul unuk Benyamin on en famen misig sebereg on anyo enobahet enowe leho on panglima anyo re, ap misi eke amurururoho duruk katfag ahun, hun Elyada ai. Aren de it ap tentara enasehen et, enandog mapnu angge et angge enenggikmu wereg on neg enebe 200.000 en melal-enepuk katfag.

¹⁸It enunggul unuk misig sebereg welatfag on ai fam en ap bireneg on de hun Yosabad ai; Aren de it ap tentara enasehen et mun lik-loukdeg angge enebe 180.000 en on melal-enepuk katfag.

¹⁹It ap etare o Yerusalem etma wereg lit yabuk duruk katfag enap, famen de it wereg kweleg ap foma re o wilayah Yehuda on fam en o elehet fak omamneroho wirig kwe etmano enautsi esan lohwal heheg, feseil lebag.