Read Ninia Yali 2 TAWARIKH 19 Bible Online

2 TAWARIKH 19 - Ninia Yali bible

2 TAWARIKH 19

¹It Yehuda on enowe Raja Yosafat anyo koloroho nikangge obam wereg ma o Yerusalem etmano watfagdeg duruk men de,

²ap nabi misig eke unuk de Yehu hun hanani amloho anyo raja akit watfagdeg hweag-utuk kwit de, “Haren ap olok deg lit TUHAN erim boruk ahun famen ibil atihindeg let-dirihin etma re duk ale dirihin a? Hun log haren airoho dirihin ai fam de TUHAN en olok hat hobam besireg wereg.

³Haren airoho dirihin ai deg kweleg famen de, hun log haren kembu hwe on Dewi Asyera anyo it ap homi holduk on nim, hun hat nim en apne wauk kahep on anyo oko wilibi feselug, Allah enda boruk ale anyoroho neg welahen ai fam de, hun haren fano ale dirihin on oho wereg ai,” ulug hweag-etfag.

⁴At Raja Yosafat ebere o Yerusalem welatfag, famen de aren di o su o etmano ap homi wereg esa lalug de, it sombandoho it enambu-enombasi enakni TUHAN Allah anyo fam waharuk kamag ulug hweag-esauk katfag.

⁵Aren de o ap homi Yehuda on wereg ma elehet fak omamneroho oho kwe etmano hundomog fahet de, it hakim omano in enepil lebagdeg de,

⁶wene melaleg de diroho hweag-esebag, “TUHAN en hit unggum wutdoho kong-duruk li em il kumu henusug laruhu anggere, henenda enggat fam diyug, ne hiren de ap homi enunuk fam ayo wiroho biling-enepuk kamuhup fug anggere.

⁷Nit nenakni TUHAN Allah ai en de ap en hwenaroho deheg, foma fil neg inibil aheg, enenggik apmane hweleheg, duruk on aire mun erim boruk anggere, hiren TUHAN fam henakol bolug henenda wenggel-wenggel duruk kamuk,” ulug hweag-esebag.

⁸Airoho debebagdeg de nikangge at Yosafat en de o Yerusalem fam omano it ap enunggul unuk imam on mel, Lewi enap mel, it ap homi holduk on enowesi mel, hakim mel unduhuk fesebag. It aire ap homi en TUHAN awene melaleg diroho diyug, suroho diyug ulug baleg wereg on anyo mel, wene amu on mel, bilinggoho kong-duruk kamag ulug unduhuk fesebag.

⁹It ai unduhuk fesebag enap anyo fam de at Yosafat en wene melaleg hweag-esauk kwit de, diroho ebag, “Hit heneyabuk unduhuk henobahaki on aire At henakni TUHAN henakol bolug duruk kwit deheg, hiren di ale su ale duruk kwit at ele melaleg hweag-hesauk on anyo higitdoho deheg, duruk kwit diyug.

¹⁰Wene ap wareg fahet mel, wene melaleg wereg on anyo sahale foruk halug fahet mel, wene diroho duruk kamuhuk ulug baloho wereg on omano dahandoho duruk halug fahet mel, it henori on o kota amumu en hit henakit walug kwik waharuk halug de, At TUHAN en hit inim, it inim olok henobam fouk nore hiren duruk ale finik-fanoroho unug esakiyug. Airoho duhup fam de iren TUHAN fam siag duhup fug. Hiren wene melaleg su duruk kamuhup halug de hiren kwasikdoho duhup fug.

¹¹Allah wene melaleg wereg on omano sahaloho foruk halug bilingguruk on fahet de hun Amarya ai eyabuk leko foruk kahi. Ne, Ismael amloho Zebaja o Yehuda fam gubernur wereg on anyo fam de, di wene su wene amu on atuk ale anyo wut duruk on fahet eyabuk lehoma on unduhuk fehi. Wene katukdoho balduk obam anyo en wene kong-duruk on anyo higitdoho duruk kamag ulug, inil wereg on fahet it ap Lewi enap ai en duruk kamuhup. An den diroho suroho duruk kamuhup ihi ale su higitdoho duruk kwit de, koko duk fug ite henalong-benalongdoho duruk kamuk. We it ap wene katukdoho neg duruk fam TUHAN ininim enaluluk welamag!” ulug hweag-esebag.