Read Ninia Yali 2 TAWARIKH 20 Bible Online

2 TAWARIKH 20 - Ninia Yali bible

2 TAWARIKH 20

¹Il eke welatfagdeg de it Moab enap enautsi tentara inim, Amon enap enautsi tentara inim, it foma ininim sebe ulug weim yapuk katfag on Meunim enap inim, en de it ap homi Yehuda on wereg ma enowarik kwik laul ulug watfag.

²Airoho waharukmu re ap en wene yonggo walug de at Raja Yosafat anyo hweag-irik lauk kwit de, “It Edom enap tentara hum-hamdoho re o Hazezon-Tamar anyo del dehesareg de, hun hat wereg ma kwik wamukoho re ik Laut Mati wirig-am fug angge yenggeleg on anyo foma fil etmano en kwik wahesa,” ulug hweag-irik lebag. (O En-Gedi ai fahet de unuk eke Hazezon-Tamar uruk katfag ai.)

³Airoho hweag-irik lebag ma re at Yosafat anyo enda akol atfagdeg de, TUHAN en diroho din hweag-nomag ulug somban ebag. Ai en de it ap homi mundoho anyo siburu na fug angge enambilik hweang welamag ulug hweag-esebag.

⁴Airoho hweag-esebag ma re it ap homi Yehuda on o kota wereg on omano re, TUHAN let-nenebukwagdoho heng dul ulug o Yerusalem lebag.

⁵It anyo lebagdeg de o TUHAN Obam wirigmu en ambe lilimol keron wirigmu etmano ap homi Yerusalem on nim seberoho kabogdeg ma re, at Raja Yosafat anyo it enalukwema in atfagdeg de,

⁶ele omamne fam somban uruk kwit de, “It nenambu-nenombasi enakni TUHAN Allah, nenakni, Allah Hat hebe boholma wereg lit o kwenangma suma di ap homi su ap homi mundoho melal-enepuk kahen. Hat hebe homamne humon wereg lit di on su on hat hapma neg wereg ma, ap homi misig eke en Hat hele sahaloho fouk fug alereg.

⁷ Nit nenakni Allah re we hat neg welahen. It Hat homaliki enunggul unuk Israel on o kwenang suma fam waharuk li em etanore, Haren ap homi o suma welatfag on omano muko wilibi feserihin. Airoho wilibi feserihindeg de o kwenang su at Abraham Hat hare anyo ambiangma on li mundoho-mundoho etma it enengge atlug welamag ulug og-esauihin.

⁸Airoho og-esauihin mu re iren o suma wereg lit Hat hapne waukmu ulug o misig eke wutswa. It lahe,

⁹siag durukmu onggo re ap en weim enowarik waheg, ouk amben siagdoho enobam aik waheg, siburu obok lahakeg, debeserukmu iren Hat hakit watlug o wene kabog-durukmu fahet wirig on su olohotma inaik waharuk ale ai fahet de it oho enoluk deg. It fam anggin atuk halug de, Hat hobam somban urukmu, Hat hesanggo holug let-enepuk kahen.

¹⁰ It nit nenambu-nenombasi o Mesir en waharuk li em de, it ap homi enunggul unuk amu on wereg ma enobam etma welamuhup fug, irihin mu re, it nenambu-nenombasi en it ap homi enunggul unuk Amon on mel, Moab on mel, Edom on mel, enowaruk eleg angge kwe amu kwe en maseroho ohwal-ohwal watfag. Famen de ketiare it enunggul unuk Amon on, Moab on, Edom on mel, anyo en nit nenowarik waharuk.

¹¹Nit nenowarukoho waharuk kwit de, iren duruk alere diroho nenepuk. Iren de Haren kwenang nit og-nesauihin on au famen muko wilibi nenobahaukoho duruk.

¹²Nenakni nit nenakni Allah re we Hat neg o! Nit de, niren duk fug ale neg aha ma re, Haren let-nenebin ulug Hat hakit wahema re, niren ap tentara hum-ham alereg enap etman nit nenowarukoho durukmu nit de nenomamne eleg dehen de, Haren it unggum og-esakin,” ulug somban ebag.

¹³At airoho somban uruk kweleg de it ap homi Yehuda on etmano enohwesi, enomalik nim de o TUHAN Obam wirigmu unduhuk latfag.

¹⁴It ap homi humdoho kabogdeg ma etma enesahalimu re ap Lewi on eke unuk Yahaziel ai welatfag. At aire hun Zakharia amloho it enunggul unuk Asaf on anyo fam en de, it endag-ail watfag ale re hun Benaya, Yeiel, Matanya ai enambiangma on welatfag. Ne, etano li em de at Yahaziel anyo Allah Aheime obam atfagdeg melalduk kweleg,

¹⁵ aren uruk kwit de, “Nenowe kain leho on nim, nori nerekwi nim, TUHAN en uruk kwit de, it ap tentara humdoho ai nim de hiren weim hinim yapluhup fug, we At Allah en neg yapmisi anggere, hiren henekol dulug henenda si uk fug.

¹⁶It ai nim hit nim de donggo ambiangman leimu o Yeruel horogma etano ambi amuhup anggere, it ai o sono kwe o Zis en lahogdoho lahaik waharuk fil anyo en waharukmu eta enowarik wilibiyug.

¹⁷Yaho, hit ap homi Yehuda on mel, Yerusalem on mel, hit henenda firatlug henakol duk fug. Weim aure hit et yabuhup fug anggere, hit eta lalug welamuk ihimu eta lakiek. Hit fam TUHAN en henalong on henobaharukmu haluhup. TUHAN en de hit let-henepmisi anggere weim ai yabik kwiek!” ulug hweag-esebag.

¹⁸Airoho hweag-esebag ma re at Raja Yosafat anyo nim, it ap homi holduk on omano abirangge inim de enelenggen dimirebelug TUHAN apne webag.

¹⁹Airoho debagdeg de it ap Lewi enap anyo enunggul unuk Kehat enap mel, Korah enap mel, inatfagdeg de enahayeg en duruk kwit it ap homi Israel on enakni TUHAN Allah anyo mot-debag.

²⁰Airoho debagdeg likia sekandoho re o mun hubet deg kweleg it ap homi anyo wilibik lebagdeg de o Tekoa horogma leimu etmano lebag. It laukmu re at Yosafat en wene enobam foruk kwit de, diroho hweag-esebag, “Yaho hit ap homi Yehuda on mel, Yerusalem on mel, hit lauk kahep on ai ambiangma fano atuk mu hahup en de it henaknisi nabi en hweag-hesauk on ai furoho wakiyug. Ne, it heneselei on waharukem henenda hambuk halug welamuhup en de hit henakni TUHAN Allah fam henenda dip-debeiyug!” ulug hweag-esebag.

²¹At raja anyo it ap homi holduk on nim ele seberoho maho febagdeg de, aren it ap enele misig seberoho suni wilipil lauk enap anyo it enewene fam nukoho lohon halug enesum orohole misig on neg wan-duruk on anyo wan-dukwag ulug hweag-esebag. Airoho hweag-esebag ma re it suni enele misig seberoho wilipuk katfag enap anyo re it tentara eraroho lauk on anyo enalukwema mun anggilukdoho eraroho lauk kwit de, suni diroho uruk katfag, “TUHAN en enda hundig-nenepuk aire mundoho-mundoho aham-duhu fug mu, TUHAN ai neg motdeg welamag!” uruk katfag.

²²Airoho it suni uruk enap anyo en wilipuk li re, it ap eneselei on enesahalimu etmano TUHAN en naleg-haleg esebag.

²³Airoho naleg-haleg esebag ma re it anyo endenoho lauk kwit de, eke en eke ware foruk men eke en eke ware foruk men mun anggoloroho wat-wat atuk katfag. Airoho duruk kwit de, it tentara Amon on nim, Moab on nim en de it tentara Edom on mun al bereloho enowatfag.

²⁴It airoho wat-wat atfagdeg deg ma it ap homi Yehuda on anyo o leimu en ap kahaleg wereg ma fahet o bela wirigmu etano aik lebagdeg it eneselei on fil anyo fubi enepuk men de, tentara it enaselei on etma we misig oho eke oluk wereglam fug angge ap wareg neg kwenang kwe ying beya uruk katfag.

²⁵Airoho deg ma esebagdeg de at Yosafat nim autsi nim en de it enaselei on enasum anggen omano del daul ulug lebag. Lebagdeg kumu hauk men de, wam mel, enangge fik-fouk dalug noruk angge mel, enasum wan-duruk on mel, enangge fano angge fomane mel, wereg ma hweahabag. Airoho hweahabag de iren de nukoho henahan hunduko sum anggen omano kabog-duruk katfagdeg de sum anggen fomane humdoho wereg ale en de embeselug watfag.

²⁶Nukoho ohwaneg anggere, At TUHAN debag ale omano fahet de TUHAN mot-dukohon o Mot-durukmu Donggoma etma kabog-debag. Ai fam de donggo aire unuk, “Mot-durukmu,” soalfag.

²⁷Airoho debagdeg de, it eneselei omano TUHAN en mundoho enalong elehapdoho fesebag ma re, at Yosafat anyo en it tentara omano abirangge og-eneplug de enahayeg en dil o Yerusalem watfag.

²⁸It anyo watfagdeg o kota aik watfagdeg de, it enebe eraroho neg lauk kwit binggong kecapi mel, trompet mel, ele fururuk kweleg o TUHAN Obam wirigmu etmano lebag.

²⁹At TUHAN en it ap homi Israel eneselei on enalong elehapdoho foruk kwit enowatfag ale anyo fahet it ap homi o negara amu kwe en enesanggo hol hebagdeg de it mundoho enakol neg atfag.

³⁰Ai fam de at TUHAN en Yosafat fam aren melal-enepuk kwe etmano mundoho ap youk eleg angge fanoroho welamag ulug debesebag ma re at Yosafat anyo weim abug eleg angge melal-enepuk katfag.

³¹Hun Yosafat ai isinga re hwe Azuba hun Silhi ahaloho ai. At Yosafat ebere umur 35 tahun deg li it Yehuda enap enobahet raja inatfagdeg de o Yerusalem fam etma 25 tahun melal-enepuk katfag.

³²At akni Asa en duruk katfag hagdoho re at Yosafat en oho Allah il hanim mun bekit deg ale neg duruk katfag.

³³Famen de aren it ap homi etman kembu mot-duruk kwe anyo mundoho welelenggendoho febag fug mu, it ap homi Yehuda on anyo en it enambu-enomba enakni Allah anyo fam enenda abirangge en kabog-duruk katfag fug.

³⁴At Yosafat raja wereg lit melal-enepuk katfag ale indipmu en ambiangma huli duruk katfag ale fahet de, at Yehu hun Hanani amloho anyo endag-atfag liem duruk katfag ele baleg wereg on anyo fam ini enembuku it Israel on enowesi raja en duruk katfag ale buku baleg wereg on anyo fam inim baleg wereg.

³⁵Nukoho misig salim de it Yehuda on enowe at Raja Yosafat anyo it Israel on enowe Raja Ahazia mun kwasik deg ale neg humdoho duruk ahun anyo nim bali watfag.

³⁶Airoho debagdeg de it etano e kapal fam de o Tarsis laul ulug de, kapal kwik watlug yarik waharukmu o Ezion-Geber etmano iren kapal witfag.

³⁷Airoho witfag famen de at nabi eke o kota Maresa on unuk Eliezer hun Dodawa amloho ai en Yosafat fam olukap deberuk kwit de, diroho hweag-etfag, “Hun haren at Ahazia nim bali warehepdeg seberehepma re hun haren e kapal witmin ulug duruk kahen on ai moluluk debemisi,” ulug hweag-etfag. Airoho hweag-etfag ma duruk men de kapal wutuk katfag angge anyo mun luluhun debesebag ma re it anyo kapal fam kulug nindig-am fug ale atfag.