Read Ninia Yali 2 TAWARIKH 21 Bible Online

2 TAWARIKH 21 - Ninia Yali bible

2 TAWARIKH 21

¹At Yosafat anyo waratfag ma re o kota Daud obam it raja sal-enepuk katfag ma etmano salik lebag. Ne, at obalmangge re at amloho Yehoram anyo raja inatfag.

²It ap homi Yehuda on enowe Raja Yosafat anyo amloho aire ori enebe folfalik en welatfag, ne it etare: Azarya, Yehiel, Zakharia, Azariahu, Mikhail, Sefaca inim.

³It enebe eta wereg ma re it enakni en de emas mel, perak mel, di angge su angge onggo hum angge mel, humdoho og-esebagdeg de, o Yehuda on weregma etman o elehet fak omamneroho oho on omano misig heheg og-isil lebag. Famen de at Yosafat en de amloho Yehoram anyo neg de wandeba on deg en de, at raja inaruhu ulug momale febag.

⁴Airoho debebag ma re at Yehoram anyo en an nebe raja nomamneroho welahi bebagdeg de, aren ori omano mel, it autsi apma yabuk duruk on, eneyabuk mun leho welatfag on omano foma inim enowarik ulug hweag-esebag.

⁵At Yehoram ebere umur 32 tahun deg kweleg raja inatfagdeg de o Yerusalem fam etma 8 tahun melal-enepuk kwit welatfag.

⁶Aren de ohwe hwele hun Ahab ahaloho eke hwelebag fam de, at ebere Raja Ahab mel, it Israel on enowesi raja-raja mel, welatfag ale enobabut higitdoho duruk kwit de, aren de TUHAN il hanim kwasikdoho neg duruk katfag,

⁷ famen de At TUHAN en Daud sali wat-utuk kwit, “Hat hambiangma on de mundoho-mundoho etma ap homi Israel on melal-enepuk kwit neg welamuhup,” ulug sali ebag anyo en de, At TUHAN en raja anyo elehapdoho fouk eleg angge welatfag.

⁸ At Yehoram en melal-enepuk li em de it Edom enap en Yehuda enap fam de niroho kerajaan nenemu unduhuk lamul, ulug ik watfag.

⁹Airoho ik watfag ma re at Yehoram anyo autsi it sehen foroho on enowesi panglima etmano mel de kereta emberimmu lahalug dog yapuk on omano fam wilibik lebagdeg de o Edom bin kwik lebag. It airoho kwik lebagdeg duruk men de at Yehoram anyo it tentara Edom on en hukdoho kwelabe febagman de o hup angge it aselei on en hukdoho kwelabeg kweleg foldongdoho wilibik watfagdeg longgo ik watfag.

¹⁰At Yehoram anyo en it ambu-ombasi en enakni TUHAN Allah apne wauk katfag on anyo embeselug duruk katfag ma re, anyo huli en de, it Edom anyo Yehuda fam apma sebe uruk katfag fug. Ne, it Libna enap ohore nenemu welamul ulug dik-wag waharuk katfag.

¹¹At Yehoram en de it Yehuda enap wereg kwe en dom fene omano kembu mot-durukmu witil lebagdeg it ap homi Yehuda on mel, Yerusalem on mel, TUHAN il hanim siag debag.

¹²Ai en at Yehoram anyo surat eke hun Nabi Elia anyo oluk wereg lit balfag angge og-etfag ma webagdeg kumu hauk men de, surat aire diroho baleg latfag, “Hun hat de it ap homi Israel on enowesi raja welatfag hagdoho wereg lit duruk kahenma it ap homi Yehuda on mel, Yerusalem on mel, Allah fam dipdoho wereg fug. Hun haren etma re Raja Ahab inim, at obalma unduhuk latfag on inim en duruk katfag ale omano duruk kahen. Ai neg fug famen de hun haren de it howesire mun leho wereg kweleg famen haren mundoho enowatihindeg it homba mel,

¹³hakni mel, duruk katfag ale mug-eneplug la fug angge en ahamdoho neg duruk kahenma re TUHAN Allah at Daud en apne wauk katfag on ai hun hat unggum og-homag.

¹⁴TUHAN en unggum anggin on de it ap homi holduk on fam inim, hat homaliki fam inim, hohwe fam inim, hat hangge di angge su angge fam inim aik waruhu.

¹⁵Hun hat hebere ouk hasem baldil kuruk on nukoho hundig baldil kurukmu neg hauk karuhun!” ulug baleg wereg ma hebag.

¹⁶Eta li em de it ap Filistin enap mel, Arab enap mel, de o ik elanma it ap homi Sudan on wiroho fesebag ma wereg ma etman horogdoho eta welatfag. Airoho wereg ma re iren hun Yehoram inim dog yabik log ulug de TUHAN en enendama kahal-enepfag.

¹⁷Airoho enepfag ma re iren o Yehuda huhul kwik waharuk kwit de, o hun raja wereg ma anyo huhul kweheg, Yehoram ohwe omaliki dog ambiangma on hagdoho sabu het-enebeheg, duruk kwit de, at amloho elabo on Ahazia anyo neg de embeselug lebag.

¹⁸Anyo airoho debagman de at Yehoram anyo TUHAN en ouk al sem febag ma hilingguk fug alereg on deg latfag.

¹⁹Airoho deg lit neg weregman tahun biren welatfagdeg de ambiangma en de ouk boukdoho halug waratfag. At waratfag ma re it ap homi holduk on anyo en it enambu-enombasi waratuk halug duruk katfag hagdoho at ebe wareg anyo along bolug obahet il lauk kwit indok yaleg ahaindok yalfag fug.

²⁰At ebe waratfag ma re ap misig en oho eke enenda wat-debag yehei bebag fug. At ebe wareg ohore o kota Daud obam etmano salik lebag famen de it ap raja sal-enepuk katfag ma etmano salfag fug. Hun Yehoram ebere umur 32 tahun deg li raja inatfagdeg de tahun ligin en fam o Yerusalem hwal-enepuk katfag.