Read Ninia Yali 2 TAWARIKH 22 Bible Online

2 TAWARIKH 22 - Ninia Yali bible

2 TAWARIKH 22

¹Nukoho misig salim de it ap Arab enap o sel kwelapni omano lohwal halug kwik waharuk kwit de, hun Yehoram omaliki at Ahazia elabo on anyo neg de oluk foruk kwit de at owesi lohon etmano mundoho enowatfag. Ai fam de it ap homi Yerusalem on en de hun Yehoram welatfag ma anyo obalmangge re at amloho Ahazia anyo raja unduhuk febag.

²At Ahazia ebere umur 22 tahun [11] deg kweleg raja inatfagdeg, aren tahun we misig fam neg ap homi o Yerusalem fam etma melal-enepuk katfag. At Ahazia isinga hwe Atalya anyo en kwasikdoho neg duruk kamag ulug amloho komo-debag ma re, at Ahazia ohore hun Ahab wereg lit obabut duruk katfag hagdoho neg duruk katfag. Hwe Atalia aire hun Raja Ahab ahaloho raja Israel on Omri anyo ombalo.

⁴At Ahazia akni waratfag li em de it hun Ahab ahain elekwe on omano Ahazia komo-duruk on atfagdeg komo-durukmu re, it Ahab ahain elekwe on etman duruk katfag hagdoho re at Ahazia oho TUHAN il hanim kwasikdoho duruk katfag. Ebere it Ahazia komo-duruk katfag on etman at alema re febag.

⁵Iren at komo-debag aleroho re at Ahazia anyo raja Israel on Yoram anyo nim seberik lebagdeg de, raja Siria on Hazael anyo nim weim yabik lebag. Yabik lebagdeg de it dog o Gilead en, o Ramot kwe etma yapuk men de, at Yoram anyo dog yapukmu etmano en dog en ahap bale febag ma re,

⁶at ebe o kota Yizreel etman hiling-nabukwag ulug watfagdeg wereg ma at Ahazia anyo etma kwelap ha lebag.

⁷At Ahazia anyo hun Yoram kwelap ha laukmu eta wararuhu ulug Allah en mundoho momale febag ma re, at Ahazia en Yoram ha lauk li anyo re at inim, Yoram inim, ap misig eke en at Raja Ahab ahain elekwe on ai mun elehapdoho fesoukwag ulug momalfag on Yehu hun Nimsi amloho anyo en de it etano enowarikoho watfag.

⁸TUHAN en hun Ahab ahain elekwe on fam unggum fohuk bebag on anyo at Yehu en dimin ulug duruk men de, at Ahazia are omaliki mel, it Yehuda on en ap log-log on o sel kwelapil noruk enap omano esan lohwaleg inim waharukmu inim ambi atfag. Airoho ambi atfagdeg de it anyo enebe abirangge binggi enowatfag.

⁹Airoho enowatfagdeg de, eta li em at Ahazia anyo o Samaria etma herahoman de at Yehu en herarik lakiek ulug ap mingming-enepfag. It mingming enepfag on anyo lebagdeg at Ahazia anyo ebe hweahabagdeg de at Yehu akit walug watfag ma at Yehu en binggi watfag. Airoho waratfag famen de, at omba Raja Yosafat en enda abirangge TUHAN fam dipdeg lit duruk katfag ale anyo fam along bolug alahasik de, iren at Ahazia ebe wareg anyo salfag. Airoho debagdeg de it hun Ahazia ahain elekwe on en de ap misig eke ambong deroho raja inatlug melal-enepuk katmin ulug uk ale nong-hong deg latfag.

¹⁰Hwe Atalya amloho Ahazia anyo mundoho waratfag ma, at Atalya en oluk atfagdeg de, it ap homi Yehuda on wereg ma etman ap homi raja ahain elekwe on en wereg on etma mundoho enowariek ulug wene wilipfag.

¹¹Hun Ahazia ai erek hwelani angge ekere unuk Yoseba, ahun de ap imam welatfag ahun unuk Yoyada ai inim hwelebag. At hwe Atalya en raja omaliki mundoho enowatuk li em omano re at Yoseba en hun Ahazia omalik misig eke unuk de Yoas ai webagdeg de ling-long webag. Webagdeg de omalik anyo hwele eke at kulduk kamag ulug on anyo nim o TUHAN Obam wirigmu en ambe misig eke ilonggoma etma heraho fesebag. At hwe Yoseba en airoho debag ai fam de omalik hwe Atalya en watfag fug mu ahap wendaratfag ai.

¹²At hwe Atalya ratu inatfagdeg melal-enepuk li em anyo re tahun folfalik en ai nimi Yoas anyo o TUHAN Obam wirigmu etma heraho latfag.