Read Ninia Yali 2 TAWARIKH 23 Bible Online

2 TAWARIKH 23 - Ninia Yali bible

2 TAWARIKH 23

¹Tahun folfalik en welatfagdeg sabirangge fam de hun Imam Yoyada anyo en de an oho ketia dikoho lahi ulug wene katukdoho balfag. Airoho debagdeg de aren ap sehen foroho on enowesi perwira etmano hun Azarya, Yehoram amloho anyo mel, Ismael hun Yohanan amloho anyo mel, Azarya, Obed amloho anyo mel, Maaseya, Adaya amloho anyo mel, Elisafat, Zikhri amloho anyo mel, ininim enele misig airoho duhuk ulug matfag.

²Airoho matfagdeg de it etano ap homi Yehuda on wereg kwe o kota etmano mundoho lauk kwit de, it Lewi on mundoho inim, it ap homi enunggul unuk domog etmano fahet kepala wereg on omano nim, kabog-enepil lebagdeg de og-eneplug de o Yerusalem kabog-dik watfag.

³ It anyo watfagdeg de o TUHAN Obam wirigmu etmano kabog-debagdeg, at Yoyada anyo en it fomane omano fam uruk kwit de, “TUHAN hun Daud fam sali warutuk kwit de, Hat hambiangma on de li mundoho-mundoho etma raja wereg lit melal-enepuk kamuhup, ulug sali waritsi anggere, hun Raja Ahazia waratsi on anyo amloho Yoas anyo re su. Ketiare at hweriatuk angge takhta fam hweria aik lahamisi, ulug de iren hun raja amloho Yoas anyo inim sali watsi.

⁴Airoho watsimu, niren duhuk alere diroho: Hit ap Lewi on nim imam inim nukoho Sabat anyo fam yabuk dulug halug de, it enobam lauk kamuhup fug, iren on foma bul minggiroho re o sokole TUHAN Obam wirigmu kwik waharuk on fam oma kahaleg lamuhup,

⁵fomane minggiroho eke re at raja ebe wereg ma omano kahaleg lamuhup, ne foma aik lahu on etare sokole unuk Pintu Gerbang Dasar anyo fam kahaleg lamuhup. Ne, it ap homi holduk on mundoho re TUHAN Obam wirigmu en oluluk etma kabogdeg lamuhup.

⁶O TUHAN Obam wirigmu aure TUHAN en it ap Lewi on nim it imam inim etma yabuk duruk kamuhup ulug eneko fesebag ma re, it ap homi hesangge on ulug oho we dik-dem misig eke kwik wamuhup fug. Ite it Lewi enap mel, imam mel etma yabuk duruk kwit wereg on neg kuruk kamuhup. It ap homi amu en TUHAN en wene melaleg ebag ale holohore dagma neg welamuhup,

⁷Ap eke en TUHAN Obam wirigmu au kwik watmin ulug leil watuk halug de binggi wariyug. Hit ap Lewi on de at raja aluluk eta karog fangdoho unduhuk lamuk, ne at ekema lauk halug ohore along baloho neg lauk kamuk!” ulug hweag-esebag.

⁸Airoho hweag-esebag ma re it ap Lewi enap mel, it ap homi Yehuda on anyo mel, en de at Yoyada en hweag-esebag ale anyo higitdoho neg debag. It ap nukoho Sabat salim yabuk eleg angge welatfag on omano ohore henobam laluhup fug ulug hweag-esauk katfag. Ai fam de it ap perwira omano en de ap yabuk mundoho dulug wereg on et, it ket yabuk dul ulug waharuk on et, diroho diek ulug hweag-esauk katfag.

⁹At Yoyada en de kisim mel, dog mapnu angge mel, Raja Daud en TUHAN Obam wirigmu febag on omano it perwira omano fam yohwan-enepfag.

¹⁰At raja anyo along baloho welamag ulug de at Yoyada en de ap fomane karog enggat fangdoho o TUHAN Obam Wirigmu en olohotma etma welamag ulug fesebag.

¹¹Airoho mundoho debebagdeg de at Yoyada en de hun Yoas anyo hondoholug wilibik watfagdeg de Yoas unggulmu kware-kware hag angge mahkota anyo bug debeheg, enggikmu buku TUHAN Awene Melaleg baleg anyo og-ereheg, debag. Ai debelug de at Imam Yoyada nim at omaliki nim en de nukoho at raja unduhuk foruk salim anyo fam de ahalue obam hilili febag ma re, it ap homi mundoho anyo en enele uruk kwit de, “Nenakni Raja Holuk!” uruk katfag. Iren de airoho at Yoas anyo raja unduhuk febag ai.

¹²Airoho unduhuk febagdeg de it ap homi anyo enahayeg duruk kwit raja anyo fahet ngaik-ngog durukmu at hwe Atalya anyo en holfagdeg de, at anyo folo-folo o TUHAN Obam wirigmu en it enele anggiluk durukmu etmano lebag.

¹³At anyo lebagdeg duruk men de, raja keron anyo re o TUHAN Obam kwik laukmu en sokolma at ebe unduhuk febag ma etano unduhukmu re, it bohweap trompet fururuk on mel, it sehen foroho on enowesi perwira omano mel, de maseroho kwelabeg lit unduhuk latfag. Ne, it TUHAN Obam wirigmu etma binggong kong-duruk enap anyo re, wene kabog-debagdeg airoho durukmu anyo re, it enengge binggong etmano fam enahayehap duruk katfag. Airoho durukmu re it ap homi omano trompet fururuk kwit enahayeg duruk katfag. Airoho durukmu esebagdeg de at Atalya anyo asum wandeg latfag on anyo nonggoloho miogdoho hwik-esebagdeg de ele hum fam hwiruruk kwit de, “Hwaleg eleg hwaleg eleg,” ulug hwiruruk katfag.

¹⁴Airoho urukmu re at Yoyada anyo en de it ap en at Atalya anyo o TUHAN Obam wirigmu etmano en waruk no ulug it perwira etmano fam uruk kwit de, “Ap along baloho ulug eraroho unduhukmu ai en hwe ai walug dagma wilibik lakiek, ap eke en lahe at ebe ahap wendatmin ulug duruk halug de ap ai ebe binggi wariyug,” ulug hweag-esebag.

¹⁵Airoho hweag-esebag ma re it etmano en senetlug wilibik lebagdeg de o raja obam wirigmu etmano walug lebag. Etman de o sokole eke unuk Pintu Gerbang Kuda uruk katfag ma etan watfag.

¹⁶Airoho debagdeg de at Yoyada en it ap homi holduk on omano mel, at Raja Yoas anyo mel, fam uruk kwit de, Nit TUHAN omaliki atlug welamuhuk ulug sali wariek, ulug hweag-esebag.

¹⁷Airoho debagdeg iren de kembu Baal mot-durukmu anyo bin kuruk kwit de, daloroho feheg, kembu obahet wam waroho yaldukmu mezbah anyo mel, ap ilit angge wereg on etmano mel, erap-ferapdoho feheg, ne mezbah olohotma etano en hwal-ahun kembu fahet on Imam Baal anyo waroho feheg, debag.

¹⁸Airoho debelug de at Raja Daud en hwale febag aleroho re, at Yoyada en de it ap imam mel, Lewi enap mel, anyo yabuk o TUHAN Obam wirigmu etmano yohwandeg aleroho duruk kamag ulug hweag-esebag. Musa en wene melaleg anyo fam wereg hagdoho re at Daud en fik-fouk deberuk kwit de, wene kabogdoho suni eheg, duruk kwit wam waroho TUHAN obahet yaleg angge yaleheg, dukwag ulug hweag-esebag.

¹⁹Ap homi emereg on omano TUHAN apne waukmu kwik lano ulug de, at Yoyada en de it ap o wirigmu kahaleg welatfag on omano, kahaleg lamag ulug TUHAN Obam kwik laukmu sokole humon fam etmano ap unduhuk feseil lebag.

²⁰Airoho feselug de it ap homi enowesi ap log-lohon anyo mel, it perwira omano mel, it pemerintah fam yabuk leho on duruk enap omano mel, O TUHAN Obam etmano en hun raja anyo walug onggwareg ebe wereg ma feik laukmu, iren at Yoyada anyo ombolim lebag. Lebagdeg de it enebe sokole keram on anyo fene en kwik lebagdeg de at raja anyo obale hwerieg angge unuk singgasana anyo fam hweriatfag.

²¹At Atalya anyo mundoho ware febag ma re o kota fam etmano enakol elegdoho welaheg, ap homi mundoho enahayeg aheg, debag.