Read Ninia Yali 2 TAWARIKH 24 Bible Online

2 TAWARIKH 24 - Ninia Yali bible

2 TAWARIKH 24

¹Hun Yoas anyo isinga re unuk Zibya obam o kota Bersyeba on. Ne, at ebere umur 7 tahun deg kweleg raja inatfagdeg de, o Yerusalem fam etma 40 tahun raja wereg lit melal-enepuk katfag.

²At Yoas en de hun Imam Yoyada anyo oluk wereg lit etare aren TUHAN endama ahayeg hauk ale fahet neg duruk katfag.

³At Yoyada en de, Yoas fahet ulug de ohwesi hwelani biren angge momal-enepfag. It fene en de at Yoas omaliki mel, ahwelani mel, endag-enepfag.

⁴At Yoas anyo tahun minggiroho fam melal-enepuk katfagdeg en de aren TUHAN Obam anyo buhun-duhuk ulug bebag.

⁵Airoho bebagdeg de aren it ap Lewi enap mel, it imam mel fam hweag-esauk kwit de, “O TUHAN Obam wirig anyo buhun-duhuk on fahet, it ap homi holduk on mundoho en uang tahun hundig-hundig kabog-duruk kamuhup en de, o it ap homi Yehuda on weregman kota etma melal-enebik lakiek,” ulug hweag-esebag. Aren hweag-esauk kwit de, wene aire folo-foloroho neg diyug, ulug hweag-esebag famen de it Lewi enap anyo re mun digin-dohwen ale neg duruk katfag.

⁶ Airoho duruk katfag ma re at Yoas en Imam Yoyada anyo wol debagdeg de it anyo og-eneplug lowag ulug hweag-utuk kwit de, “Ketia it ap Lewi enap ai en it ap homi Yehuda on mel, Yerusalem on mel, fene en kwenang, di angge su angge onggo pajak anyo foruk on anyo kabog-dik lakiek ulug de nunggwelug hun haren mingming enepuk kwit folo-foloroho neg diek ulug hweag-esauk kahen fug? At TUHAN amingming angge Musa anyo en ohore o TUHAN Obam Sabo salegma anyo fahet, ap homi uang kwenang onggo foruk on anyo hagdoho kabog-diek ulug hweag-esebag omano hwi?” ulug hweag-etfag. (

⁷Hwe Atalya olok ohwe anyo autsi ele holoho duruk katfag on omano en de di angge su angge Allah obahet ulug eneg wereg on omano kembu Baal mot-dikoho weheg, TUHAN Obam wirig anyo siaho feheg, debag.)

⁸Ai fam de it Lewi enap anyo en e kotak misig eke wiri folug de sokole humon o TUHAN Obam wirigmu kwik waruk on fam etano hwerie foukwag ulug hweag-esebag.

⁹Airoho febagdeg de, at Musa en it ap homi mundoho en duruk kamuhup ulug hweag-esebag ale higitdoho re it ap homi Yerusalem wereg kwe inim, it Yehuda on wereg kwe inim, wene unduhuk foruk kwit de, ap homi abirangge en uang kwenang onggo fahet on anyo TUHAN fahet walug feik waharuk kamuhup ulug hweag-esebag.

¹⁰Wene melaleg airoho wilipsi on anyo re it ap homi holduk on nim, it enowesi melal-enepuk on nim, en enahayeg hebagdeg de, iren enebe anggilukdoho uang pajak anyo e kotak wirig anyo fam kwelapuk katfag.

¹¹Airoho kwelapukmu re it Lewi enap en de nukoho hundig-hundig kotak anyo walug de raja autsi pegawai etmano wereg ma enakit iren kumu howag ulug walug lauk katfag. Walug laukmu, kumu hauk men lahe kotak anyo ele hoporeg halug de at negara fahet sekretaris unduhuk wereg on anyo mel, at Imam Agung apma wereg on anyo mel, en uang omano wilibi feik watlug de, kotak anyo nikangge obalma feik lauk katfag. Iren nukoho hundig-hundig airoho neg duruk katfag ma re uang hum-hamdoho kabog atuk katfag.

¹²Airoho kabog-durukmu re at raja nim at Yoyada nim en de uang etmano it o TUHAN Obam wirig anyo buhun-duruk on fahet kepala hagdoho unduhuk on etmano og-esaukmu re, iren de ap yabuk helep fam wutuk on mel, e on fam wutuk on mel, logam on fam wutuk on mel, wurukwag ulug onggo bal-enepuk katfag.

¹³Airoho debesebag ma re it ap tukang omano en o TUHAN Obam anyo wutuk ale indip debag. Iren de o anyo mun wenggeloho neg witfag re o anyo ebe keram wirig latfag hagdoho mun omamneroho wireheg, mun fano on wireheg debag.

¹⁴O anyo mundoho witfagdeg de, emas-perak, mel foma dindik atfag on omano re it hun raja mel, hun Yoyada mel, og-esebag ma re iren TUHAN Obam anyo ilonggoma wereg angge fahet di angge su angge laloho lahapfag. Ne, iren lalfag angge etma re, di on su on wene kabog-duruk kwit duruk angge fahet mel, wam waroho yalduk kwit duruk angge mel, amben fano angge yalduk duk kwit duruk angge fahet piring mel, mangkuk mel, lalfag. At imam Yoyada anyo ebe oluk wereg li em etare TUHAN obahet wam waroho TUHAN Obam amano yalik kuruk katfag.

¹⁵Yoyada ebere umur 130 tahun atfagdeg ebe mun kungguk debelug waratfag.

¹⁶At ebe waratfag ma re, aren Allah fahet duruk katfag on nim, TUHAN Obam wirig anyo fahet duruk katfag on nim, It ap homi Israel on fahet duruk katfag on nim, anyo wenggel-halug de iren o kota Daud en on fam etmano salik lebag.

¹⁷At Yoyada mundoho waratfag ma anyo re, it Yehuda enap enowesi melal-enepuk on omano en at Yoas anyo endama kwelabeheg, enda liseheg, durukmu re, at Yoyada en wene hweag-utuk katfag on anyo furoho hole febag fug.

¹⁸Ai fam de it ap homi holduk on anyo, it enambu-enombasi enakni TUHAN Allah anyo fam wene kabog-duk fug angge, iren kembu mot-deheg, kembu hwe on Dewi Asyera anyo ilitdeg fam apne weheg, duruk katfag. It enesiag duruk katfag on ai fam de TUHAN en it ap homi Yehuda on mel, Yerusalem on fam mel, olok enobam febag.

¹⁹Airoho boruk kwit de, At TUHAN en it At ele hweag-esauk katfag on nabi omano en de it ap homi en TUHAN obahet neg duruk kamag ulug komo enebik lowag ulug mon-enebik waharuk katfag famen de, it ap homi holduk on omano en enesanggo holduk ale enerim deg latfag.

²⁰ Airoho deg latfag ma re, at Zakharia hun Imam Yoyada amloho anyo Allah Heime obam atfagdeg, Aren melalduk kweleg, at ebe it ap homi etmano weregman inaik lebagdeg ele uruk kwit de, “Hiren oho An fubi nobahauk fug angge neg duruk kahepma re an den oho hit fubi henobahakuk fug. An den nawene melaleg hweag-hesauk kahi on anyo holoho duk eleg angge, henebe henonggwareg en alema re fahat-dauk kahep etma nunggwelug?” ulug hweag-esebag.

²¹Airoho hweag-esebag famen de, at Raja Yoas anyo it ap homi holduk on nim wene misig seberoho maho febagdeg de, at Zakharia ele anyo bosilikapdoho febag. Airoho debebagdeg de at Zakharia akni Yoyada en duruk katfag ale mel, aren di on su on bok am fug angge duruk katfag ale mel, omano wenggel-ha fug anggere, at raja en de Zakharia anyo ebe wariek ulug hweag-esebag ma re, at Zakharia anyo o TUHAN Obam wirigmu en ambe lilimol doalegma etano en helep fam fukdoho binggi ware febag. Airoho ware febag ma etano ebe waraik ulug nenek duruk kwit de, at Zakharia en ele diroho ebag, “Haren dehen ale aire At TUHAN amu en neg il heheikma re, Aren neg hat henggik ambiangma hobaharuk kamag!” ulug hweag-etfag.

²³Tahun nika on anyo fam neg de li aham duruk salim anyo it tentara Siria on O Yerusalem inim, o Yehuda inim fam bin kwik waharuk kwit de, iren ap enowesi melal-enepuk on omano mundoho enowatuk kwit de enangge di angge su angge mundoho delswa on omano mundoho hohouk dalug de o Damsyik lebag.

²⁴It ap homi Yehuda on en de it enambu-enombasi enakni TUHAN Allah anyo ele uruk on furoho hole fouk fug angge duruk katfag ma re, it ap homi Yehuda on en tentara re enebe humdeg latfag famen de At TUHAN en de it tentara Siria on enebe dorangge etan enalong elehapdoho fesoukwag ulug il febag. Airoho debag ai fam de At TUHAN en Raja Yoas anyo unggum og-etfag ai.

²⁵At Yoas anyo dog ware folug it tentara enaselei on anyo mundoho lebag ma re, at Yoas autsi pegawai enebe biren on ap watul ulug enele misig matfagdeg de, aren hun Imam Yoyada amloho watfag on anyo unggulmu re at ebe obam nohorukmu etmano yinggigmu warik kwebag. At raja anyo waratfag ma re o kota Daud obam etmano salik lebag famen de at de it raja sal-enepuk katfag ma etmano salik lebag fug. (

²⁶Ap it enele misig maho folug hun Yoas warik kwebag on etare hun Zabad hwe Simea obam Amon on anyo amloho ai ha, hun Yozabad hwe Simrit obam Moab on anyo amloho ai ha, en warik kwebag.)

²⁷At Yoas omaliki en duruk katfag ale mel, at obahet hein og-angge en siag ale ebag on mel, aren TUHAN Obam wirig anyo buhun-debag ale mel, mundoho re buku it raja duruk katfag ale ulug dindiloho baleg on anyo fam baleg wereg. At raja anyo obalma re at amloho Amazia anyo raja inatfag.