Read Ninia Yali 2 TAWARIKH 25 Bible Online

2 TAWARIKH 25 - Ninia Yali bible

2 TAWARIKH 25

¹Hun Amazia aire isinga unuk Yoadan obam Yerusalem ohwe ai. Ne, at Amazia ebere umur 25 tahun deg li raja inatfagdeg de o Yerusalem fam etmano 29 tahun wereg lit melal-enepuk katfag.

²At Amazia en de At TUHAN enda boruk ale neg duruk katfag famen de, enda foma dorangge fam neg duruk katfag.

³At ebe raja inatfag on anyo omamne atuk kwit de, it akni watfag on autsi pegawai omano unggum enobam folug enowatfag.

⁴ It airoho enowatfag famen de, it enowatfag on ai enomaliki omano fahet neg de, TUHAN awene melaleg buku Musa en balfag on anyo fam baleg lit de, “It enomaliki en siag duruk halug de, it siag duruk on onggo ulug it enaknisi enowaruk fug, ne it enaknisi siag duruk halug de, it siag duruk onggo ulug it enomaliki enowaruk fug. Ap enamu hundomog de enonggwareg en duruk on fam neg ambiangma enowaruhup,” ulug baleg wereg ale anyo higitdoho re, omalik omano enowatfag fug.

⁵It ap homi enunggul unuk Yehuda on mel, Yerusalem on mel, anyo at Raja Amazia en kabog-debesebagdeg de, it enebe enunggul unuk aegdoho deg ale etano domog enebe 1.000 en heheg enowe misig eke helahe roho, ne enebe 100 en oho enowe misig eke helaheroho inamek ulug hweag-esebag. Airoho hweag-esebag ma it anyo inatfag ma re, aren de ap enebe umur 20 tahun en emberim fil deg on neg, inggisim mel, dog mapnu angge perisai wauk on mel, mun enggat deg enap neg momal-enepfag. It momal-enepfag on ai neg de enebe seberoho 300.000 en deg latfag.

⁶It anyo wereg kweleg de aren it ap homi Israel on enautsi tentara onggo baleg no perak ebe anggin de 3.400 kilogram hagdoho fam onggo folug yonggo fesebag on enebe 100.000 en yonggo fesebag.

⁷Aren airoho debag famen de, nabi misig eke raja akit watfagdeg hweag-utuk kwit de, “It ap homi Israel on il emberim utara fil wereg on aire TUHAN en let-enepuk fug anggere, haren it tentara Israel on ai og-enebuk fug.

⁸We Allah amu en neg enalongap debeseheg, enalong elehap debeseheg, durukmu re, hun haren it og-enepmihin mu, hun hat hautsi tentara enomamne deg lit enambong se enap neg deg lamulsa famen ohore, TUHAN en de hun hat halong elehapdoho hobahaukwag ulug hobahaikohoreg,” ulug hweag-etfag.

⁹Airoho hweag-etfag ma re at Amazia en hein og-hauk kwit de, “An den perak it og-isihi on etma re nanggin atmisi?” ulug hein og-hebag ma re, at nabi anyo en onggo uruk kwit de, “Haren it og-esehen on etare horog dot hag deg famen de, At TUHAN en alongdoho eke inim, honggwareg og-hirik wam alereg!” ulug hweag-etfag.

¹⁰Airoho hweag-itil lauk em de, at Amazia anyo en it tentara yonggo baleg og-enepfag on omano henobam lakiek ulug hweag-esebag ma re, it anyo enobam enolok en suahal il lebag.

¹¹At Amazia anyo en de ambong se atfagdeg de autsi tentara og-eneplug de donggo unuk Lembah Asin etma lebagdeg de, etman it ap tentara Edom enap nim weim yapfagdeg de iren ap enebe 10.000 en enowatfag.

¹²Ne, it enebe 10.000 en foma re sabu het-eneplug walug watfagdeg de o kota Sela duk anggolopma helep unggulmu anyo og-eneplug lahafagdeg de, hwik-enebik wambik watfag ma re it anyo mundoho waratfag.

¹³It airoho duruk kweleg anyo re it tentara Israel on at Amazia en nit nininim weim yabik laul fug angge henobam lakiek ulug hweag-esebag on etmano re it ap homi Yehuda on enobam kota o Samaria dulug Bet-Horon dulug bul kwe etmano bin kuruk kwit hebagdeg de iren ap enebe 3.000 en enowareheg, enasum anggen mun hum-hamdoho del deheg, debag.

¹⁴Ne, at Amazia anyo re it ap tentara Edom on enowarik lebagdeg anyo obam waharuk kwit de, it Edom enap enanggemu ilit deg angge walug watfagdeg de, aren o it ap homi Yehuda on wereg ma etmano feik watfag. Airoho feik watfagdeg de, aren amben fano angge kembu anyo fahet, yaleheg, apne weheg, duruk katfag

¹⁵At airoho durukmu re, aren duruk ale anyo fahet TUHAN mundoho olok atfagdeg de, TUHAN en nabi misig eke Amazia akit mondorik watfag ma, nabi anyo en uruk kwit de, “Hun hat halong wereg lit sebel-enusug wereg ma it ap homi enunggul unuk amu on ai enanggembu dewa ai en fiselaroho wilip-enepuk eleg on famen aire nunggwelug hun haren apne wauk kahen?” ulug hweag-etfag ma re,

¹⁶At Amazia en uruk kwit de, “At raja komo-duruk on welamag ulug niren hat unduhuk hobaharuhuk fug! Hele eleg amin, Ne, hele imihin halug de niren hat howarukoho lahe!” ulug hweag-etfag. Airoho hweag-etfag ma re, at nabi anyo ele eleg atfag, famen de owan ele eleg am fug angge etano, ele uruk kwit de, “An den komo habihi on ai hole fehen fugdeg, hun haren hobabut dirihin on ai fam de, Allah en de hun hat hebe mun elehapdoho hobahamin ulug de mundoho fik-fouk debeheikdeg wereg,” ulug hweag-etfag.

¹⁷At Amazia it ap homi Yehuda on enowe raja anyo mel, it ap raja komo-duruk ahun mel en de, it Israel on mel, weim yabuhuk ulug, weim abug wilipfagdeg de, at Amazia en de hun Yoas it ap homi Israel on enowe raja, Yoahas amloho, hun Yehu omba anyo fam ap yonggo mondotuk kwit de, Nit lang-lang amul angge manu, ulug wene monde febag.

¹⁸Airoho monde febag famen de at Raja Yoas en wene onggo mondorik waharuk kwit de, “Nukoho misig salim de alog ahan o Libanon dom fam wilibig on omano en o sin fam wene obam foruk kwit de, E sin ao, hat hahwelani duhum on etma an namloho eke ohweap dowagdoho re og-nimin abi, ulug mondoreheik. Famen de fobik en maro enggelama on eke kwe ai lauk kwit de, alog ahan anyo unggul waroho sobit-sabat eseheik.

¹⁹Hat Amazia ao, haren de it Edom enap enowatihik ulug hawonog hauk kahen a? Hat honggwareg hebe nim, it homaliki holduk on nim, henebe alema re fahat-da hag de, wene hweag-hweag duruk eleg, we hat hobam olma welamuk,” ulug mondorik watfag.

²⁰Airoho mondorik watfag famen de, at Yoas raja Israel on anyo en de at Amazia raja Yehuda on en ebag ale anyo furebebag fug. At furebebag fugmen de, at Amazia en it edom enap enanggembu ilitdeg apne wauk katfag anyo en, At TUHAN en boruk kwit de, at Amazia aire along elehapdoho fohup fano, bebag.

²¹Ai fam de at Yoas anyo autsi nim de o Bet-Semes lebagdeg de at Amazia nim etma weim yabik lebag.

²²Weim yapuk kwit de, it tentara Yehuda on etmano re enalong elehapdoho fesebag ma re, it enebe enobam domog linggik-longgo ik watfag.

²³At Yoas en de hun Amazia anyo senetfagdeg de walug o Yerusalem lebagdeg de, o kota ai fak lehet oho on anyo, sokole Pintu Gerbang Efraim kwik waharuk on ulug baleg on anyo fam en de, sokole eke Pintu Gerbang Sudut anyo huli, il yatdoho 200 meter hagdoho moluluk debebag.

²⁴Airoho debelug de, o TUHAN Obam wirigmu anyo en emas mel, perak mel, hweahabag on nim, hun Obed-Edom en hwalduk kwit welatfag on omano mel, o raja obam wirigmu di angge su angge wereg on omano mel, ap onggo feik waharuk halug og-esahuk on ulug sen-enepfag on mel, anyo at Yoas en mundoho feleleng eneplug de, obam Samaria lebag.

²⁵Hun Yoas it ap homi Israel on enowe raja anyo waratfag man de, at Amazia it ap homi Yehuda on enowe raja anyo re 15 tahun eke nim oluk welatfag.

²⁶At Amazia anyo TUHAN embeselug duruk katfag li em en de it ap en at waruhuk ulug abug balfagdeg de, o Yerusalem omano warik kwik wamul ulug duruk angge famen de, akol en o Lakhis wilibik lebag. Famen de it aselei on omano en etma mutlug lebagdeg warik lebag. At ebe waratil laukem de ebe wareg anyo kuda lahapfagdeg walug o Yerusalem watfagdeg de, o kota Daud obam it ap raja sal-enepuk katfag ma etmano salfag. Ne, at Raja Amazia en keram inatfag lien duruk katfag ale mel, ahae fotog atuk kweleg duruk katfag ale mel, de mundoho buku it raja Israel on mel, Yehuda on mel, duruk katfag ale baleg on anyo fam baloho wereg.