Read Ninia Yali 2 TAWARIKH 26 Bible Online

2 TAWARIKH 26 - Ninia Yali bible

2 TAWARIKH 26

¹Hun Uzia ai isinga re o Yerusalem hwe unuk Yekholya ai welatfag. In de at Amazia waratfag ma anyo re it ap homi Yehuda on abirangge en de at Uzia momaloho raja unduhuk febag. Eta li em de at Uzia ebe umur 16 tahun deg kweleg inatfag.

³Airoho inatfagdeg de aren 52 tahun wereg lit o Yerusalem fam etma melal-enepuk katfag. O kota Elot aire aren at delfagdeg de nikangge obalma aren witfag.

⁴At Uzia re akni en duruk katfag hagdoho TUHAN enda ahayeg boruk aleroho neg duruk katfag.

⁵At hun Zakharia anyo ebe oluk wereg li em de, at Uzia enda Allah fam dip-deberuk kamag ulug komo-duruk on de at Zakharia wereg ma re, aren dipdoho neg duruk kwit TUHAN obahet neg durukmu, TUHAN en at fam fanoap deberuk katfag.

⁶At Uzia en de it ap Filistin enap mel, weim yabik lebagdeg de, aren o kota Gat, Yabne, Asdod mel, elehet fak omamneroho oho on etmano moluluk-malalakdoho lahabe febagdeg de, aren obalma fak lehet hambuk angge omamne on o Asdod horogma etma nim, o it ap homi Filistin on wereg ma amumu etma nim witfag.

⁷Aren de it ap Filistin enap mel, Arab enap mel, o Gur-Baal welatfag on etma nim, it Meunim enap mel, enalong elehapdoho fesoukwag ulug TUHAN en let duruk katfag.

⁸At mundoho ap along on atuk kwit de, unuk de bogdoho neg o Mesir huli etman oho holduk katfag. It ap homi Amon on en ohore it at apma welahe angge ulug de onggo hagdoho at Uza akit feik waharuk katfag.

⁹Aren de o kota Yerusalem anyo omamneroho ulug de, ap kahaleg wereg ma hwenangge wutuk hagdoho sokole unggut fam etano eke, Pintu Gerbang Lembah fam etano eke, obahat wirigmu maseroho kurukmu etano eke witfag.

¹⁰Aren de yabuk wutuk ale fahet mun enda ai fam fureberuk katfag ma re, dom kwe etmano anggur yabuk wurukwag ulug inim, kwenang hesilig kwe etmano wutuk kamag ulug mel, de aren ap yabuk duruk on humdoho kwelap-enepfag. Aren de o leimu etmano helep mun omamneroho yaron witil lahakeg, at owam endetuk katfag on humdeg ma fanggong kwe nim, duk kwe nim en mo obuk uruk fil etman nim aren ik bohwe humdoho habuleheg debag.

¹¹It sehen foroho on dog yabik lauk ale mun melal-felal deg enap hun Uzia autsi enebe humdoho welatfag. It enebe abirangge wereg ale anyo re, esan lohwal heheg, wereg ma re at raja apma wereg on omano en misig eke hun Hananya anyo en melal-enepuk kweleg, at raja autsi sekretaris enebe biren on hun Yeiel nim, Maaseya nim, en baloho foruk katfag.

¹²It tentara dog yapuk enap aire, aroho it tentara enapma on de enebe 307.000 wereg ma re it enowesi perwira enebe 2.600 en wereg lit melal-enepuk katfag. It ap aire dog yabik lauk ale fahet inim, raja letdoho it enaselei on enalong elehapdoho foruk ale fahet inim, fahet it fam mun alongdoho deg latfag.

¹⁴Airoho deg ma re at Uzia en autsi it tentara omano sehen mel, dog angge mel, sum bosimanggen on fam yihig on mel, enunggul topi no baja on fam wirig angge mel, dog mapnu angge inggisim hag on mel, helep hwik helep enowatuk angge fahet ulug mel, mun fik-foukdoho debeseruk katfag.

¹⁵It autsi sehen wutuk ale mun enggat enap en de o Yerusalem fam etma hwenama nim, o kota unggut kwe etmano wereg lit inim, dog mel, helep humon mel, leheik lauk angge eke lalfag. Airoho At Allah en let durukmu re at omamne ahun atuk kwit de, at Uzia abug di kwe su kwe bogdeg welatfag.

¹⁶At Raja Uzia anyo ebe omamne ahun atuk kwit de mun enda leho fahat-dauk katfag. Aren de Allah wene melaleg wereg on anyo sahale folug de, o TUHAN Obam wirigmu anyo amben fano angge no mezbah amben fano angge dupa yalduk katfag on anyo fam yalmin ulug kwik lebag. Ai fam de at ebe mun nong-hong ebag.

¹⁷Airoho kwik lebag famen de at Imam Azarya anyo mel, it imam foma enomamne deg lit enambong sereg enap neg enebe 80 en de aren duruk ale anyo fahet niren kwe balukoho lahe ulug at ombolim kwik lebag.

¹⁸ Kwik lebagdeg de iren uruk kwit de, “Nenowe kain leho welahen hahun! Hun hat de TUHAN Allah ele sahale fehendeg, Aren mel airoho dimihin hweag-hereheik fug men kwik wahen anggere, hun haren TUHAN fahet amben fano angge dupa ai yalmihin fug. Yabuk ai duruk kamag ulug de it imam Harun ambiangma on etmano eneko fesebag anggere, sure it eneyabuk. Hun hat de o mun amu enegma su embeselug ketia wilipuk kamin!” ulug hweag-etfag.

¹⁹Eta li em de at hun Uzia anyo re amben fano angge dupa yalduk kwit yohwatuk angge anyo enggikmu keiroho o TUHAN Obam wirigmen, mezbah amben fano angge yalduk on wereg ma aluluk etano unduhuk men hweag-etfag. Airoho hweag-etfag man de aren it imam etmano fam olok enobam febagdeg duruk men de, fetagdoho etano at orohole anggenma yebil hwenanggo on enam atfag.

²⁰It imam etmano inim, at Azarya nim en hauk men de aireg ma inil halug youk lebagdeg de, o TUHAN Obam wirigmu etmano en folo-folo wilibik lowag ulug hweag-etfag. TUHAN en unggum og-etfag ma re at anyo folo-folo wilibik lebag.

²¹At anyo ebe raja welatfag on anyo famen lole febagdeg de, o TUHAN Obam wirigmu etmano kuruk katmihin fug ulug de, o amumu febag ma re o misig eke fam febag ma de at amloho Yotam anyo at apma wakil hagdoho melal-enepuk kwit welatfag. Ouk anyo fano am eleg angge neg weregman de at Raja Uzia anyo ebe waratfag.

²²At Raja Uzia anyo en melal-enepuk katfag ale fomane re at Nabi Yesaya hun Amos amloho anyo en balfag.

²³ At ebe waratfag ma re, at ebe ouk hwenanggo on deg en de it raja sal-enepuk katfag ma etmano embeselug de dag fil aluluk etmano salswa. At sale folug de obalma re at amloho Yotam anyo raja inatfag.