Read Ninia Yali 2 TAWARIKH 27 Bible Online

2 TAWARIKH 27 - Ninia Yali bible

2 TAWARIKH 27

¹Hun Yotam ai isinga re hun Zadok ahaloho hwe Yerusa anyo. Ne, Yotam ebere umur 25 tahun deg lit raja inatfagdeg de ebe 16 tahun wereg lit o Yerusalem fam etma melal-enepuk katfag.

²At Yotam ebere at akni en duruk katfag hagdoho re, TUHAN endama boruk ale neg duruk katfag. We at akni amben fano angge dupa [12] TUHAN Obam olma yalduk katfag hagdoho neg de aren yalik kuruk katfag fug. Airoho deg latfag famen de it ap homi holduk on anyo siag neg duruk katfag.

³O TUHAN obam wirigmu en Sokole Humon Utara fil on aire at Yotam en at witfagdeg de o Yerusalem en o Ofel uruk katfag ma etma fak lehet oho o anyo omamneap debag.

⁴Aren de o it ap homi Yehuda on enobam kota dom kwe omano wireheg, elehet fak omamneroho wireheg, kahaleg wereg ma fahet hwenangge ohwei kwe etmano wireheg, debag.

⁵Aren de Raja Amon on nim autsi tentara nim fam weim yabik lebagdeg de enalong elehapdoho folug de, it enebe aren enalong elehapdoho fesebag ma at fam onggo feik lauk kamag ulug ele omamneroho hweag-esauk katfag. Ai fam de iren tahun hundig-hundig etmano perak de anggin 3.400 kilogram deg on nim, gandum anggen orohole biren on amu-amu re anggin 1.000 ton en deg angge feik lauk katfag.

⁶Aren de akni TUHAN Allah anyo fam dipdoho duruk kwit, ele holoho neg duruk katfag fam de at Yotam ebe omamne hum atuk katfag.

⁷At Yotam ebe raja unduhuk lit melal-enepuk li em, dog yapuk katfag ale mel, ap enowarikoho enda wenggelduk katfag ale mel, mundoho re buku it raja Israel on mel, Yehuda on mel, en duruk katfag ale baleg wereg on anyo fam baloho febag.

⁸At Yotam ebere umur 25 tahun wereg li raja inatfagdeg de, o Yerusalem fam etma 16 tahun wereg lit melal-enepuk katfag.

⁹Airoho duruk katfagdeg waratfag ma re o kota Daud obam etmano salfag ma re at obalmangge at amloho Ahas anyo raja inatfag.