Read Ninia Yali 2 TAWARIKH 28 Bible Online

2 TAWARIKH 28 - Ninia Yali bible

2 TAWARIKH 28

¹Hun Ahas anyo re at ebe umur 20 tahun deg li raja inatfagdeg de, o Yerusalem etma 16 tahun unduhuk wereg lit melal-enepuk katfag. At ebere at ambu hun Raja Daud en fano ale duruk katfag hagdoho dil lauk katfag hagdoho duk fug angge re TUHAN endama siahap deberuk ale on neg duruk katfag.

²At de it ap homi Israel on fahet enowesi raja unduhuk latfag on etma hagdoho wereg lit de, aren kembu Baal anyo ahut ilitdeg logam on fam wurukwag ulug hweag-eseheg,

³it ap homi Israel on o Kanaan kwik lauk kwit, ap homi etma welatfag on At TUHAN en muko wilibi fesesi on omano en eneitogdoho kembu fahet enomaliki waroho yal-utuk katfag hagdoho higitdoho, aren onggwareg amloho anyo waroho kembu fahet yal-ereheg, amben fano angge o Hinom Donggoma etma yaleheg, debag.

⁴At Ahas en de wam wareg inim, amben fano angge inim, dom kwe inim, e humon wilibig on enggik doaleg on apmane inim kembu dewa anyo apne wauk kwe etma feik lauk katfag.

⁵ It ap homi Yehuda on en de At TUHAN awene melaleg anyo furebouk eleg angge deheg, it enambu-enombasi enakni TUHAN Allah anyo embeselug deheg, duruk ale en de, At TUHAN en hun Pekah at Remalya amloho raja Israel on anyo en enalong elehap debesoukwag ulug il febag ma re, nukoho misig fam neg de it tentara Yehuda enap enambong si sereg enap neg enebe 120.000 en enowatfag. Ne, at Raja Ahas anyo siag kwasikdoho neg duruk ale en de, raja Siria on en along elehapdoho foukwag ulug TUHAN en debebag ma re, at along elehapdoho folug de, ap homi Yehuda on hum-hamdoho dog ambiangma on ulug feleleng eneplug de o Damsyik lebag.

⁷Airoho duruk kwit de, hun Ahas amloho nimi Maaseya anyo ohore hun Zikhri ap Israel on enowe perwira eke en watfag. At nikahun ai en de ap o raja wereg ma fahet wene balduk ahun Azrikam anyo mel, at raja enggik bekit fil unduhuk wereg on hun Elkana anyo mel, enowatfag.

⁸It ap homi Yehuda on aire it Israel on nim de enunggul unuk misig on famen de, it tentara Israel on en de it Yehuda on homi nim omalik doron nim de enebe seberoho 200.000 en het-enepfagdeg de, enangge di angge su angge del debag on etmano mel, hohouk eneplug de o Samaria lebag.

⁹O kota Samaria fam etma nabi misig unuk Obed ai welatfag. At weregman de it tentara Israel on anyo re weim yabik lebagdeg de ap homi Yehuda on het-eneplug watfagdeg de, it anyo o kota kwik wamul hagman de at Obed anyo it enolohotma lebag. Lebagdeg de aren uruk kwit de, “Hit henambu-henomba enakni TUHAN Allah anyo en it ap homi Yehuda on fam olok fesi mu re, hiren it ap homi Yehuda on enalong elehapdoho feseik lahep ai. Famen de hiren it tentara Yehuda on ai mun orohole siagdoho enowatuk mu At TUHAN en esanggo holsi.

¹⁰Ap homi Yehuda on mel, Yerusalem on mel, anyo ketia hiren henamingming anggeap enebehep deg oma re, hiroho At henakni TUHAN Allah il hanim siag dehe fug ulug behepdeg duruk kahep a? Siag dehep neg.

¹¹Henesanggo holiek! ap homi het-eneplug wahep on sure hit henonggwareg henori, anggere enobam lowagdoho ulug hweag-esakiek. Ne, hiren airoho duluhup fugmen de At TUHAN olok hit henobam folug unggum og-hesarohoreg,” ulug hweag-esebag.

¹²Aren airoho hweag-esauk kweleg anyo re it ap homi Israel on enowesi olohoream on enebe ohwan enap, hun Yohanan amloho Azarya anyo mel, hun Mesilemot amloho Berekhya anyo mel, hun Salum amloho Yehizkia anyo mel, hun Hadlai amloho Amasa anyo mel, en de it tentara Israel on en dulug watfag ale ai fahet de mun kwe bal-enepfagdeg,

¹³iren uruk kwit de, “Nit de TUHAN il hanim siag dehema, nenesiag humdeg en unggum nenobam fouk alereg anggere, ap sabu het-eneplug wahep on aire suma og-eneplug waharuk eleg! Ketia hiren duruk kahep on aire niren duruk ale siag on ekenim dopno ukwag ulug duruk kahep,” ulug hweag-esebag.

¹⁴Airoho hweag-esebag ma re, it ap tentara omano en de it hweap mel, omalik mel, het-eneplug watfag on omano mel, enangge del-dalug watfag on etmano mel, de ap homi holduk on mel, it enowesi melal-enepuk on mel, enenggikmu og-esebag.

¹⁵Airoho og-esebag ma re it ap ohwan etano inatfagdeg de it hweap sabu het-eneplug watfag on etmano hwal-enepuk katfag. Iren hwal-enepuk kwit de, di angge su angge delug watfag angge etmano re it hweap enanggo anggoloroho eleg on omano yohwan eseheg, enasiburu, enahaik, enesepatu mel, yohwan eseheg, it het-eneplug watfag on etmano en enebe yebil wereg on omano e zaitun ahalue fam hiling enebeheg, eneyog kwe la ale lilipna enepfag on omano, no keledai anduhunmu lahabe feseheg, debesebagdeg de, it enebe enobam indipmu o Yehuda fam etmano lowag ulug de hweap sabu het-eneplug watfag on anyo re mundoho og-eneplug de o Yerikho e kurma indip obam urukmu ai feseik watfag. Airoho feseik watfagdeg de it ap homi Israel on anyo enobam Samaria lebag.

¹⁶It ap homi Edom enap anyo re o Yehuda bin kwik watfagdeg de ap homi humdoho het-eneplug lil lauk en de, at Raja Ahas en de an let-nabik manu ulug, raja Asyur ahun Tiglat-Pileser anyo fam yonggo mondotfag.

¹⁸At Raja Ahas anyo en de TUHAN apelehapdoho embeseheg, ap homi holduk on nong-hongdoho melal-enebeheg, duruk ale en de it ap homi Yehuda on wereg ma etmano TUHAN en anggin-fanggin mondorik watfag.

¹⁹Ne, etali em de o it ap homi Yehuda on weregman il apma selatan fil omano mel, o kota mo lahaik waharuk fil en dom indip kwe wereg on omano mel, fam bin kwik watfagdeg de, iren de o kota Bet-Semes mel, Ayalon mel, Gederot mel, Sokho mel, Timna mel, Gomzo mel, o kota aluluk kwe o bumbuk dot-doron welatfag on etmano mel, hwelag kwik watfagdeg de, etma yugdoho welatfag.

²⁰Airoho wereg ma re raja Asyur on aire hun Ahas let dimin ulug de fug ite at obam angginap kwelapmin ulug watfag.

²¹Airoho wahail lauk en de at Ahas anyo en nangginik-nangginik de o TUHAN Obam wirigmu etmano emas wereg on mel, at raja obam etmano en mel, it ap homi enowesi melal-enepuk on etmano en on mel, wasireg at raja Asyur on anyo og-etfag famen de, aren og-etfag angge eta fahet de raja Asyur on ai en de ebe angge hag deg latfag fug.

²²Airoho deg ma re etali em di ale su ale duk ale mun anggolo deg li etare at hun Ahas anyo en de TUHAN il hanim siag on neg duruk ale ekenim duruk kwit neg welatfag.

²³Aren boruk kwit de, “O Siria fam kembu dewa wereg on etman de it ap raja Siria on oho let-enepsi angge anyo re an den wam waroho og-irik lamin halug de, an oho let-nabuk alereg lit deg,” ulug bebagdeg de it Siria enap at ebe along elehapdoho fousa enap anyo enanggembu dewa etmano fam wam waroho feik lauk fam de at onggawareg ebe nim it ap homi holduk on nim, alema re feseruk katfag.

²⁴Airoho duruk kwit de, aren de o TUHAN Obam wirigmu anyo en o ilonggo elekwe wereg angge etmano webagdeg de, erap-ferapdoho embeseheg, o TUHAN Obam wirig anyo sok lare feheg, debagdeg de it ap homi Yerusalem on wereg kwe mundoho etmano aren wam kembu fahet waroho yaldukmu ulug mezbah witil lebag.

²⁵O it ap homi Yehuda on wereg ma etma kota kwe inim, o bumbuk dotdeg kwe inim de it ap homi enunggul unuk amu on dagma on enanggembu dewa omano fahet apne weheg, amben fano angge yal-ereheg, durukmu ulug witil lebag. Aren airoho duruk katfag ai fam de it ambu-ombasi enakni TUHAN Allah anyo en olok nobam foukwag ulug duruk katfag.

²⁶At Ahas en duruk katfag ale amun on mel, aren melal-enepuk katfag ale mel, de mundoho buku it raja Yehuda on mel, Israel on mel, en duruk katfag ale bilinggoho baleg on anyo fam baleg wereg.

²⁷ At Ahas ebe waratfag ma re o Yerusalem salfag famen de it ap raja sal-enepuk katfag ma etmano salfag fug. At obalma re at amloho Hizkia anyo raja inatfag.