Read Ninia Yali 2 TAWARIKH 29 Bible Online

2 TAWARIKH 29 - Ninia Yali bible

2 TAWARIKH 29

¹At Hizkia anyo re ebe umur 25 tahun deg kweleg it ap homi Yehuda on enobahet raja inatfagdeg de, o Yerusalem fam etma 29 tahun wereg lit melal-enepuk katfag. Hun Hizkia ai isinga re hun Zakharia ahaloho hwe Abia anyo.

²At Hizkia ambu hun Raja Daud anyo en duruk katfag hagdoho re, at Hizkia en oho TUHAN endama ahayeg boruk ale neg duruk katfag.

³At Hizkia raja inatfagdeg melal-enepuk katfag li em tahun keram on anyo fam bigalem misig wereg kweleg de, at Hizkia en de TUHAN Obam wirig anyo sok husebagdeg de buhun diek ulug ap homi hweag-esebag.

⁴It imam mel, it Lewi enap mel, de o TUHAN Obam wirigmu en ambe olohotma lilimol baleg on anyo fam kabog-dik manik ulug hweag-esebag ma, it anyo kabog-dik watfag ma re,

⁵aren etman it inim ele matuk katfag. Aren uruk kwit de, “Nit nenamulik en de TUHAN Allah fam dipdoho duk eleg angge deheg, At TUHAN enda ahayeg bouk fug ale neg deheg, duruk katswa. Airoho duruk kwit de, iren At anyo furebouk fug angge deheg, At ebe wereg ma anyo hesama leirebeheg, duruk katswa.

⁶Iren de TUHAN Obam wirigmu anyo amben fano angge yaluk fug angge deheg, Allah it ap homi Israel on en apne wauk katswa on anyo obahet wam waroho yal-om fug angge welaheg, o ilonggoma lampu anyo nahul eseheg, o TUHAN Obam anyo sok omano mundoho latil laheg, duruk katswa.

⁷Ai fam de TUHAN olok en it ap homi Yehuda on mel, Yerusalem on mel, unggum enobam fesesi. Nit nenaknisi weim fam en waratil lebag ma re, nit nenomaliki nim nenohwesi nim hele wat-eneplug lausa.

⁸Ne, At TUHAN en airoho duswa on ai fam de ap homi mundoho youk laswareg de enamelmel en duswa ale anyo re hit oho henoluk deg.

⁹Anggere hit ap Lewi on de, it henambu-henombasi enakni TUHAN Allah anyo Obam Wirig horoho eneko feheg, di angge su angge mun alemat atfag on etma oko wilibi feseheg, duhup en de, hit henebe TUHAN obahet eneko fahat dakiek.

¹⁰At TUHAN Allah en nit nenobam eke nim olok nenobahauk nore, ketiare an den it ap homi Israel on enakni TUHAN Allah anyo nim sali watuk kahi ai.

¹¹Nomaliki o, hit de TUHAN obahet wene kabog deheg, At obahet neg deheg, amben fano angge anyo yaleheg, it ap homi holduk on wene kabog-durukmu melal-enebeheg, duruk kamag ulug At TUHAN en hit momal-henepsimu re, hihildil-hahaldil la fug,” ulug hweag-esebag.

¹²Ai salim it Lewi enap kabog-dik watfag on de eneb su: Unggul unuk Kehat on fam en de: Hun Amasai amloho Mahat anyo ha, hun Azarya amloho Yoel anyo ha Unggul unuk Merari on fam en de: Hun Kish amloho Abdi anyo ha, hun Yehaleleel amloho Azarya anyo ha Unggul unuk Gerson on fam en de: Hun Zima amloho Yoah anyo ha, hun Yoah amloho Eden anyo ha Unggul unuk Elisafan on en de: Hun Yeiel ha Simri ha Unggul unuk Asaf on en de: Zakharia ha, Matanya ha Unggul unuk Heman on en de: Yehiel ha, Simei ha Unggul unuk Yedutun on en de: Semaya ha, Uziel ha eta kabog-dik watfag.

¹³

¹⁴

¹⁵Airoho kabog-dik watfagdeg de iren de enori fomane nim kabog-enepfagdeg de enebe mundoho eneko fahat debag. Airoho debelug de, At TUHAN awene malelag fam baleg wereg aleroho re, at raja en melal-enepfag ma re it anyo kwik lebagdeg de TUHAN Obam anyo horuruk katfag. O ai ilonggoma etman mundoho alemat atfag on omano re walug de sokolma lilimol balegma etmano feik wilibik watfagdeg de, etman de it ap Lewi enap anyo en walug de o kota dag fil o Lembah Kidron etma feik lebag.

¹⁶

¹⁷Bigalem misig wereg kweleg tanggal satu fam de yabuk ai duruk ale indip debagdeg de, o TUHAN Obam wirig anyo abirangge inim, olohotma o wene kabog-durukmu ilonggo healoho wirig on anyo nim de tanggal 8 fam mundoho horebag. Airoho debagdeg en de nukoho ligin en eke fam de o anyo abirangge horebagdeg de tanggal 16 fam de mundoho fotog debag.

¹⁸Airoho debebagdeg de it ap Lewi enap anyo en de Raja Hizkia fam olukap duruk kwit de, “Nit de o TUHAN Obam ilonggoman wam waroho yalduk angge mezbah anyo nim, roti unuk wareg werako feik waharukmu meja anyo nim, di angge su angge ilonggoma etma duruk kamag ulug wereg angge etmano nim, o TUHAN Obam ebe abirangge nim, mundoho horehe.

¹⁹Hun Raja Ahas en melal-enepuk li em etano TUHAN ele bulip debelug di angge su angge oko wilipfag angge etmano oho niren obalma feik wahe. Ne, di angge su angge duruk angge etma re niren TUHAN obahet ulug eneko fehereg de yal angge yaldukmu mezbah wirig anyo weregman olohotma eta fehe,” ulug hweag-irik kwebag.

²⁰Airoho hweag-etfag ma re at Raja Hizkia anyo anunu-banunu ale duruk ale anyo embeselug de, it ap homi enowesi kain-kain anyo hondog-esalug de inim o TUHAN Obam wirigmu anyo lebag.

²¹Airoho lauk kwit anyo re, iren de wam it raja ahain elekwe mel, it ap homi Yehuda on mundoho enesiag elehapdoho foukwag ulug on fahet inim, TUHAN Obam anyo mun eneko foruk on fahet ulug inim de, wam sapi yohombuk on sabiren inim, domba yohombuk on sabiren inim, domba omalik sabiren inim, kambing yohombuk on sabiren inim, walug lebag. Walug lebagdeg de it imam omano fam raja en de wam etmano waroho yal angge yalduk on mezbah wirigmu etmano yalukwag ulug mingming enepfag.

²²Airoho ebag ma re sapi omano watfagdeg de it imam en de amep omano okore wam waroho yalduk angge mezbah anyo fene hililfag. Iren de domba sabiren etano nim, domba omalik sabiren etano nim ohore airoho neg debag.

²³Airoho debebagdeg de fotogdoho re iren wam kambing etano walug de, it ap homi anyo mel, at raja mel, somban urukmu lebagdeg de it enebe abirangge anyo en de enenggik kambing etmano anduhunmu sebele feil lebag.

²⁴Airoho debelug de at raja en melal-enepuk kwit de, it ap homi Israel on mundoho fahet wam enesiag elehap dukwag ulug on nim, wam waroho yal angge yalduk on nim waruhup ulug hweag-esebag ma re, anyo higitdoho, kambing etmano watfagdeg de amep de it imam omano en it ap homi abirangge enesiag elehapdoho ulug de mezbah wirig fam anyo hilili febag.

²⁵Airoho debebagdeg de At TUHAN en Nabi Gad fene en nim, Nabi Natan at raja fahet yabuk duruk katfag on anyo fene en nim, diroho diyug suroho diyug ulug hun Daud hweag-etfag ale anyo higitdoho re, at raja en de it Lewi on anyo TUHAN Obam wirigmu etmano binggong kecapi mel, gambus mel, at Daud en duruk katfag hagdoho watuk kamag ulug fesebag.

²⁶It Imam enap ohore bohweap trompet anyo fururuk kamag ulug etma fesebag.

²⁷Airoho debesebagdeg de, iren wam waroho yalduk on anyo indip dukwag ulug de, at Hizkia en de eneg ale eke debebagmu re, it ap homi anyo re suni TUHAN motdeg suni urukmu re, it ap binggong watuk enap etmano re trompet fureheg, binggong amu-amu on etmano wareheg, duruk katfag.

²⁸It suni wilipuk enap anyo re suni wilipuk kwit wereg kweleg de, it binggong watuk enap anyo re binggong watuk kwit nge wereg ma re at Raja Hizkia nim it ap homi mundoho eta welatfag on nim de TUHAN apma sebe ulug mot duruk kweleg neg de wam waroho yalfag on anyo munmiroho indok en nebag.

²⁹

³⁰It ap homi holduk on enowesi omano nim, at raja inim en de suni at hun Raja Daud en felalfag on mel, hun Nabi Asaf en felalfag on mel, suni TUHAN obahet motdeg suni etmano it ap Lewi on en wilibukwag ulug hweag-esebag ma, it wilipuk kweleg de, it ap mundoho anyo re suni enahayeg fam uruk kwit de, enelenggen dimirebelug Allah apne wauk katfag.

³¹Airoho debagdeg de at Hizkia en uruk kwit de, “Ketiare hit de TUHAN obahet eneko henobahakema re, hiren TUHAN dang duruk hagdoho anyo re hiren wam walug TUHAN Obam wirigmu feik wamluhup,” ulug hweag-esebag. Airoho hweag-esebag ma re it ap homi mundoho etma kabog-dik lebag on etmano en de TUHAN obahet foruk angge etmano walug feik lauk kwit de, iren foma wam enenda enahayeg fam TUHAN Obahet waroho yaleg angge yalduk on ulug et feik lebag.

³²Iren walug lebag anggere, sapi yohombuk on de ebe 70 en nim, domba 100 en nim, domba omalik 200 en nim, walug TUHAN obahet waroho yal angge yal-irik lebag.

³³Iren de ap homi enebe mundoho eta kabog-dik lebag on etmano en nauk on fahet nim, ambine foruk on ulug nim de wam sapi yohombuk on ebe 600 en nim, domba 3.000 en nim, walug lebag.

³⁴Airoho feik lebag ma re it ap Imam enonggwareg en eneko horoho fahat debag on de wam etmano ahap nonggolduk ale fahet enebe mun dotdeg en de, it ap Lewi enap aire di on su on horuruk ale fahet mun dipdoho neg duruk katfag ma re iren let-enepfag. It Lewi enap anyo it imam etmano let-enepuk men neg de it ap imam fomane enonggwareg en enebe horoho ene fahat dalug waharukmu neg de fotog hauk katfag.

³⁵Iren wam waroho yaleg angge yalfag on etmano wereg kweleg famen de, it ap homi kabog-dik lebag on anyo nauk on ulug esetfag on en amug omano oho it imam en TUHAN obahet febag. Iren ohore wam waroho yaleg angge anyo yalduk kwit ambine hililduk on ulug de anggur inim feik lebag. Airoho debagdeg de iren o TUHAN Obam wirigmu anyo wene kabog-duruk ale atfag ai.

³⁶Nukoho il misig fam neg mundoho ai dukwag ulug Allah en let-enepfag ma re it ap homi holduk on omano mel, at Raja Hizkia mel, enendama enahayeg neg atfag.