Read Ninia Yali 2 TAWARIKH 30 Bible Online

2 TAWARIKH 30 - Ninia Yali bible

2 TAWARIKH 30

¹ It ap imam etmano enebe eneko fahat-debag on de mun dot deg ma, it ap homi oho owan humdoho o Yerusalem kabog-dik waharuk eleg ale en de, it ap homi anyo en soni Paskah esetuk on anyo re bigalem keram on fam esetfag fug. Ai fam de at Raja Hizkia inim, it autsi pegawai inim, it ap homi o Yerusalem fam etma welatfag on inim, en de soni Paskah aire bigalem bireneg on fam eseruhuk ulug de wene enele misig seberoho matfagdeg, ai neg de fano duhuk ulug enahayeg bebag. Ai bolug de at raja en it ap homi mundoho omano o Yerusalem TUHAN Obam wirigmu etmano kabog-dik watlug, at Musa en wene melaleg anyo fam eneg aleroho wereg ale anyo higitdoho soni Paskah esereheg, ap homi Israel on enakni TUHAN Allah anyo along bolug apne weheg, dik wamag ulug de yonggo febag. Ne, aren yonggo febag kwe aire, it ap homi Israel on wereg kwe mundoho inim, it ap homi Yehuda on wereg kwe mundoho inim, ai en it Manasye, Efraim enap inim, it ap homi enunggul unuk Israel on wereg (...)

⁶Airoho yonggo feil lauk kwit de, at raja wene melaleg fam de surat baleg anyo walug it ap homi Israel on wereg kwe inim, it Yehuda on wereg kwe inim autsi pegawai omano yonggo angge mon-enepfag. Iren surat walug lebag on ai fam de ele diroho baleg latfag: “Hit ap homi Israel on nomaliki! Hit de it ap homi Asyur on enenggik omamne fam en lil atlug wilibik waharuhup on anyo, At TUHAN en nikangge hit let-henepuk kamagdoho re, ketia re it Abraham, Ishak, Yakub mel, en apne wauk katfag on henakni TUHAN Allah anyo obahet neg duruk kamuhup en sombandoho manik.

⁷Hit de it henamulik Israel on foma en it enakni TUHAN Allah anyo fam dipdoho duk eleg angge duruk en TUHAN en unggum anggin anggoloroho enobam fesi ale anyo re hiren hinil hauhup.

⁸Anggere iren enunggul owag omamne atlug duruk katswa ai hagdoho duruk ale embeselug de, TUHAN ele holoho neg duruk kamuhuk en de, At olok wereg on ai lohon sayongno ukwagdoho re, At obam wene kabog-dukohon manik. O Yerusalem TUHAN Obam wirigmu, At TUHAN Allah onggwareg en li mundoho-mundoho fahet eneko fahat dasimu etmano manu.

⁹Hiren At akit sombandoho waharuk halug de, hit henakni TUHAN Allah aire mun fanoreg lit enda hundig enepuk on deg ma Aren hit og-henebuhu. Ne, hiren sombandoho At TUHAN obahet neg duruk halug de, it henori-henerekwi omano hele wat-eneplug lasi famen ohore, it ap homi og-eneplug lasi on omano en enenda esauk kwit de, henobam nikangge lakiek, ulug hweag-esahupmu nikangge henekit wamuhup,” ulug baleg latfag.

¹⁰Airoho baleg angge anyo it mon-enepfag on etmano en walug o kota it wilayah enunggul unuk Efraim on wereg kwe nim, Manasye on wereg kwe nim, lebagdeg de emberimmu utara fil mag etlema wilayah it enunggul unuk Zebulon on wereg ma lebagdeg de it ap homi omano en de bilip enepuk kwit de, unda yag enepuk katfag.

¹¹Famen de it fomane enunggul unuk Asyer on mel, Manasye on mel, Zebulon on mel, o Yerusalem waharuk ale enenda on oho welatfag.

¹²At raja nim it autsi pegawai nim en wene melaloho wilipfag on anyo, higitdoho deheg, it ap homi en enenda dik-demdoho on fam TUHAN ele holoho deheg, dukwag ulug de At Allah en de it ap homi Yehuda fam welatfag on omano enenda misig seberebag.

¹³Bigalem bireneg on fam de, ap homi enebe hum-hamdoho Nukoho Roti Fituk Angge Fam Wirig Eleg on nauk salim ulug kabog-duruk katfag on anyo fahet kabog-dukoho lit o Yerusalem kabog-dik watfag.

¹⁴It anyo kabog-dik watfagdeg iren de o Yerusalem etma kembu dewa obahet wam waroho yaleheg, amben fano angge duruk katfag ma mezbah omano mundoho hambohobagdeg de o Lembah Kidron etmano hwik dik lebag.

¹⁵Ai debebag ma re it imam mel, Lewi enap mel, enebe alemat atfag on anyo re mundoho enenggali atfag ma re, iren TUHAN Obam wirigmu etmano wam waroho yaldul angge ulug de enebe eneko horoho fahat debag. Airoho dobahat debag ma re it ap homi anyo en de bigalem anyo on wereg kweleg tanggal 14 fam de soni Paskah fahet ulug domba humdoho waroho feik watfag.

¹⁶Feik watfagdeg de wene melaleg buku hun Musa en baloho febag on anyo fam wereg ale higitdoho re o TUHAN Obam wirigmu anyo enobale higitdoho enemu domog hwilil lebag. Ne, wam watfag on etmano amep de it Lewi enap en de it imam omano fam og-esebag ma re, iren de mezbah wirig angge fene anyo hilil esebag.

¹⁷It ap homi humdoho etma kabog-dik lebag on aire enebe oan ene fahat da fug angge lebag ma re, domba Paskah fahet anyo waroho feik la fug alereg en de, it ap Lewi enap en it enobahet watfagdeg de TUHAN obahet feik lebag.

¹⁸It fomane fahet de airoho debag famen de it enunggul unuk Efraim enap, Manasye enap, Isakhar enap, Zebulon enap, enebe oan eneko fahat da fug angge watfagdeg de, iren Paskah anyo duruk ale fahet awene melaleg wereg ale anyo higitdoho debag fug. Ai fam de Raja Hizkia en it enobahet somban uruk kwit de,

¹⁹“Nenakni TUHAN Allah it nenamulik en hapne wauk katswa on, it ap sure enebe owan eneko fahat da fug angge wahesareg en, Hat hobam enenda enebe abirangge fam kabog-durukmu, Hat henda fano neg duruk kahen on anyo en it enesiag hapelehapdoho fesein,” ulug somban ebag.

²⁰Airoho somban ebag ma re At TUHAN en de Hizkia en somban ebag on anyo esanggo holfagdeg de, ap homi anyo enobam unggum og-esebag fug.

²¹Nukoho Roti Fituk Angge Fam Wirig Eleg on nauk salim ulug anyo ebetuk kwit o Yerusalem kabog-debagdeg anyo re nukoho sabiren ai fam it ap homi anyo enahayegdoho duruk katfag. Airoho kabog-duruk kwit omano re nukoho hundig-hundig it ap Lewi on nim, it imam inim, enenda dik-demdoho fam TUHAN mot-duruk katfag.

²²Airoho duruk kwit de, it ap Lewi enap aire, wene kabog-durukmu melal-enepuk ale fahet mun enoluk humdeg en de at Hizkia en it mot-enepuk katfag. Nukoho sabiren anyo fam it enambu-enombasi enakni TUHAN Allah anyo dang duruk kwit ulug wam waroho og-ereheg, iren nukoho anyo fahet ebetuk kwit osoko nenggeg duruk katfagdeg en de,

²³it enebe abirangge anyo en de nukoho sabiren eke nim aldap bireneg om eke kabog-duruk kamuhuk ulug enele misig seberoho kong-debag. Airoho ebagdeg de it anyo enenda enahayeg fam kabog-duruk katfag.

²⁴Airoho kabog-durukmu re, it ap homi anyo wam watuk on ulug mel, ne waroho it nauk on ulug mel, de Raja Hizkia en de sapi yohombuk on 1.000 en inim, domba 7.000 en nim, og-esebag. It pegawai Hizkia autsi etmano en de sapi yohombuk on de 1.000 en nim, domba 10.000 en nim, og-esebag. Eta li em de it ap imam enebe logdoho eneko fahat debag.

²⁵Airoho durukmu re it ap homi Yehuda on mel, imam mel, it Lewi enap mel, it ap homi utara fil en wambik watfag on mel, it enebe bohon famen it ap homi Israel on wereg kwe mel, Yehuda on wereg kwe mel, enesahalimu yugdoho welatfag on mel, mundoho enahayeg hebag.

²⁶At hun Daud amloho Salomo anyo welatfag huli en angge wene aireg on eke o Yerusalem fam etma atuk katfag fugmen de ai salim neg de o Yerusalem fam etma mun anggiluk neg atfag.

²⁷It ap imam etmano nim, it Lewi enap nim en de, it ap homi omano fahet TUHAN en fanoap debesoukwag ulug ulug heng ebag ma re At Allah ebe wereg ma boholma etmano en esanggo holfagdeg de, iren heng ebag angge anyo webag.