Read Ninia Yali 2 TAWARIKH 31 Bible Online

2 TAWARIKH 31 - Ninia Yali bible

2 TAWARIKH 31

¹Soni Paskah eserukoho kabog-debag on anyo mundoho debelug de, it ap homi anyo enebe abirangge o it ap homi Yehuda on wereg kwe kota etmano lebagdeg de ap en kembu ahut ilitdeg wiroho unduhuk febag angge anyo erap-ferap debeheg, kembu hwe on Dewi Asyera ilitdeg anyo dukom-dakom eseheg, wam kembu fahet waroho yaldukmu mezbah omano welelenggen eseheg, kembu apne wauk kwe etmano mun moluluk eseheg, debag. Ai higitdoho re o amu kwe it ap homi Yehuda on wereg kwe inim, wilayah it Benyamin on wereg kwe etmano inim, Efraim, Manasye wereg kwe inim, airoho neg dil lebagdeg de, it enebe enobam domog lebag.

²At Raja Hizkia en de it ap imam mel, Lewi enap mel, eneyabuk yohwandoho wereg ale higitdoho feseil lebag. It yabuk yohwan esebag on aire ebe su: Iren wam TUHAN enda ahayeg howag ulug waroho yaleheg, wam TUHAN fanoap nenobahaukwag ulug heng duruk kwit waroho yaleheg, o TUHAN Obam wirigmu etmano wene kabog-durukmu yabuk deheg, o TUHAN Obam ilonggo kwe etmano en TUHAN motdoho dang deheg, duruk kamag ulug yohwan-esebag.

³ Ne, it ai en wam waroho hubet yalduk on ulug mel, hupmu yalduk on ulug mel, nukoho Sabat anyo fam waroho og-utuk on ulug mel, Bigalem Keron enam atuk mu TUHAN mot-duruk kwit waroho yalduk on ulug mel, TUHAN awene melaleg fam baleg wereg aleroho nukoho lohon omano fam kabog-duruk kwit yalduk on ulug mel, at raja en wam endetuk on omano og-esebag.

⁴ Aren og-esebag on etma wereg kweleg de, it ap imam omano mel, it Lewi enap mel de, yabuk TUHAN Obam wirigmu etmano TUHAN awene melaleg fam baleg wereg hagdoho, enenda ai on fam neg yugdoho duruk kamagdoho re, di angge su angge it fahet enunuk wareg on omano walug kabog-dik wamag ulug at raja en it ap homi Yerusalem wereg on omano fam wene unduhuk febag.

⁵Wene anyo airoho unduhuk febag ma re it ap homi Israel on etmano en de it imam og-esauk on ulug[13] de it enengge terigu mel, anggur mel, zaitun ahalue mel, kin ahalue mel, kwenang fam anggen yihig balfag on amu on omano mel, en keram on etmano walug waheg, iren nikale it enengge on en famen soho en on anyo it fahet-dauk kwit de, num on[14] anyo neg walug waheg, debag.

⁶It ap homi Yehuda on wereg kwe kota etma welatfag on etmano mundoho en de it enowam sapi mel, domba mel, en num on anyo inim, di angge su angge feik lauk on ulug febag on humdoho etmano inim, de walug TUHAN akit og-irik watfag.

⁷Airoho walug waharukmu re, iren febag angge anyo re bigalem henahaneg on fam walug waharuk ale indip debagdeg de, walug waharuk men neg de bigalem sabiron fam aik lebag.

⁸Di angge su angge og-esauk on ulug febag on anyo mun hum-hamdoho walug waharuk ale en de at Raja Hizkia mel, autsi pegawai mel en de TUHAN unuk leho feheg, At omaliki it ap homi Israel on anyo mot-enebeheg, debag.

⁹It imam etmano mel, it Lewi enap etmano mel, fam at raja anyo en de ap homi en walug og-esa watfag angge etmano fahet wene uruk men de,

¹⁰at Imam Agung eke hun Zadok ambiangma on Azarya anyo en uruk kwit de, “At TUHAN en de it ap homi At omaliki anyo fam fanoap debesesimu re, it ap homi holduk on en TUHAN obahet feik laul ulug febag on walug o TUHAN Obam wirigmu suma walug feik watfag huli en angge re, nit nauk on hunikdoho welahe fug, mun alongdoho wereg ma, wereg on ohore ahakoroho wereg,” ebag.

¹¹Airoho ebag ma re at raja wene melaleg fam de, num en on walug watfag on mel, di angge su angge og-esa watfag on etmano mel,

¹²forukmu fahet o TUHAN Obam wirig aluluk kwe etmano gudang di angge su angge forukmu obale witfag. Wiri febagdeg de ap Lewi on misig eke unuk de Konanya ai en hwalduk kamag ulug unduhuk febagdeg de at aut Simei anyo re at let-duruk on ulug febag.

¹³At Raja Hizkia nim, Imam Agung Azarya anyo nim en uswa ale higitdoho re, it biren etano enapma re ap Lewi on enebe 10 en angge yabuk duruk kamuhup ulug fesebag on de: Yehiel, Azarya, Nahat, Asael, Yerimot, Yozabad, Eliel, Yismakhya, Mahat, Benanya ha, fesebag.

¹⁴It ap homi en walug TUHAN obahet feik waharuk katfag angge etmano walug yohwan-enepuk kamag ulug de, at hun Yimna amloho Kore, ap Lewi ahun it O TUHAN Obam wirigmu Sokole Lohon Timur anyo fam kahaleg wereg on fahet kepala welatfag ahun anyo febag.

¹⁵It ap imam wereg ma o kota amu kwe omano re, at Kore letdoho ulug de ap amu on feseil lebag on de su: Eden, Minyamin, Yesua, Semaya, Amarya, Sekhanya mel, fesebag. Airoho fesebag ma iren, nauk angge etmano iren enebe doron et, lohon et, it Lewi enap enebe abirangge eneyabuk wereg ale etano domog higit-hagatdoho yohwan debelug og-esauk katfag.

¹⁶It ap neg enebe umur 30[15] tahun emberim fil deg on nukoho hundig-hundig o TUHAN Obam wirigmu yabuk kweheg, wilibeheg, duruk kamag ulug feseruk katfag on omano oho re, it enebe eneyabuk domog deg aleroho enebe kabogdeg hag nauk on yohwan-esauk katfag.

¹⁷It ap Lewi enap enebe umur 20 tahun en emberim fil deg on omano re eneyabuk deg aleroho, enebe kabogdeg hag enunuk baleg latfag, famen de, it imam neg de it enunggul unuk aegdoho deg ale anyoroho enunuk baleg latfag.

¹⁸It aire TUHAN obahet yabuk eneg on duruk kamag ulug di salim su salim etano fik-fouk deg lit welatfag ma re, it enebere, enohwesi, enomalik mel, ap amu on it enobam etma ininim wereg et, enunuk baleg latfag.

¹⁹It ap imam hun Harun ambiangma on welamuhup kwe ulug o kota ene feil lebag kwe etma nim, o kota etma aluluk horogdoho lei kwe etma nim, enesahali kwe etmano it ap imam enahain elekwe etmano en ap on neg ha, it enunggul unuk Lewi on en enunuk lisu baleg on neg ha, nauk on omano yohwandoho og-esaukmu hwelauk kamag ulug de, ap yohwan-enepuk on feseil lebag.

²⁰At Raja Hizkia en de o it ap homi Yehuda on wereg kwe etmano mundoho wene katukdeg ale on neg deheg, hwenaroho duk eleg angge bekitdoho neg deheg, at akni TUHAN Allah anyo endama ahayeg howag ulug on neg deheg, duruk katfag.

²¹Aren de O TUHAN obam wirig anyo fahet duruk kwit oho, ite TUHAN awene melaleg wereg on anyo fahet duruk kwit oho, aren akni TUHAN Allah anyo fam mun enda hundig deg lit, enda ebe abirangge fam duruk katfag ma re ambiangma mundoho fano ale neg aik lauk katfag.