Read Ninia Yali 2 TAWARIKH 32 Bible Online

2 TAWARIKH 32 - Ninia Yali bible

2 TAWARIKH 32

¹At Raja Hizkia en TUHAN fam dipdoho duruk kwit wereg ale anyo mundoho debebagdeg weregman de, at raja Asyur on hun Sanherib anyo en de o it ap homi Yehuda on wereg ma kota elehet fak omamne on fam oho kwe etmano mundoho del damin ulug de, o ebe mundoho walinggik watfagdeg de autsi tentara esan lohwaleg anyo fam de delik kwiek ulug hweag-esebag.

²At Sanherib en O Yerusalem hwelag kimin ulug duruk katfag ale anyo at Hizkia mundoho oluk atfagdeg de,

³it ap Asyur enap etma o Yerusalem horogma kwik watlug ik nano ulug de, at inim, autsi it sehen foroho on enowesi perwira omano inim, en de ik o kota ai fam wirig atuk on etmano mundoho latul ulug melal-enepfag. Ai ulug de, aren ik o kota dag fil wilibik lauk on omano larukwag ulug de, ap homi humdoho enayonggo fesebag.

⁵Airoho debebagdeg de, o kota anyo omamnereg welamag ulug de at raja anyo en fak lehet anyo buhun deheg, hwenama ap kahalegma ulug emberimmu wireheg, fak dag fil en wireheg, debag. Ai debelug de, aren de o kota Yerusalem keram welatfag ma etmano en mo lahaik waharuk fil kwenang kabogdoho lahabeg on fam fak humon wirig on anyo buhun deheg, inggisim inim, dog mapnu angge inim, humdoho wirukwag ulug hweag-eseheg, debag.

⁶Airoho debebagdeg de ap on neg o kota fam etmano wereg on anyo enobahet kepala hagdoho welamag ulug de ap tentara enowesi perwira omano unduhuk feseil lebag. Unduhuk feselug de, it anyo sokole kota kwik lauk on wereg fil etmano kwenang ohoma kabog-dik wamag ulug hweag-esebag ma re, it anyo kabog-dik watfag ma, aren it hweag-esauk kwit de,

⁷“At raja Asyur on ai ibil de omamne we maben hag deg famen de nit ninibil de mundoho nenomamne hum deg anggere, at raja Asyur on ai mel, autsi tentara esan lohwaleg ai fam mel, henakol bouk fug. Hit de henenda dip-debelug de, wirik amuk.

⁸At fil omamne wereg aire ap homi enomamne fam deg famen de, nit let nenebukwag ulug inim, nenobahet weim yabukwag ulug inim, de At nenakni TUHAN Allah wereg anggere,” ulug hweag-esebag. It enakni raja ele uruk ale anyo enesanggo holfagdeg de, it ap homi anyo mundoho enambong se atfag.

⁹Airoho debagdeg il eke welatlug de at Sanherib inim autsi tentara esan lohwaleg inim o Lakhis wereg lit de, aren hun Hizkia nim, omaliki Yehuda enap holduk on o Yerusalem fam wereg on omano fam inim wene aren diroho eheik ulug, hweag-esa lakiek, ulug ap yonggo mon-enebik waharuk kwit de diroho ebag,

¹⁰“An Sanherib o Asyur fam raja unduhuk welahi on anyo en hein og-hesauk kahi, o Yerusalem de mundoho ap heneselei on en labo henepil kwik waharuk kweleg oma re, nunggwelug henambong se angge welahep?

¹¹It enenggik omamne fam en de, nit nenakni TUHAN Allah en loloho wilibi nenobahamisi, ulug at Hizkia en hweag-hesauk en welahep a? Aren de hit henesiburu mel, henahaik mel, obok en waramag ulug hesama lin hesahu en uruk. Anggere, aren aire hit lal-henepuk anggere at fam dip-deberuk eleg.

¹²Aren neg TUHAN obahet wam waroho yaldukmu mezbah omano molulukdoho embeseheg, wene kabog-durukmu etmano siaho feheg, debebagdeg we mezbah misig on fam amben fano angge anyo yaleheg, wene kabog deheg, duruk kamek,” ulug ap homi Yehuda on mel, Yerusalem on mel, hweag-hesebag.

¹³Hweag-esalug de, uruk kwit, “Raja Asyur on enggik omamne apma en de, it ap homi enunggul unuk amu on enenggembu dewa en oho loloho eke wilibi fesebag ale eke wereg fug. Hit de an den inim, an nambu-nombasi en inim, it ap homi enunggul unuk amun on fam duruk katuhuk alere mun henapeleg a?

¹⁴It sa mel en eke debag on eke wereg? Hit henanggembu dewa ai en de hit loloho wilibi henobahauk fug alereg!

¹⁵Raja Asyur on enggik omamne on apman de it enunggul unuk amu on enanggembu dewa en eke loloho wilibi fesebag ale eke wereg fug. Anggere hiroho henanggembu dewa ai en loloho wilibi henobahauk fug alereg. Hit henakni raja ai en lal-henebeheg, morueap kwelap henebeheg, dukwag ulug duruk kam fug. Aren uruk on etma fam demdoho bolug duruk kam fug!” ulug mondotfag.

¹⁶At raja Asyur on autsi mon-enepfag ma lebag on etmano en, de enele amu on et hum ale uruk kwit de, TUHAN Allah unuk siaho feheg, At TUHAN amingming angge Hizkia anyo unuk siaho feheg, duruk katfag.

¹⁷Raja Asyur on anyo TUHAN it ap homi Israel on en apne wauk on anyo ele sahaloho ulug de surat balfag on de ele diroho baleg latfag, “It ap homi enunggul unuk amu on enanggembu dewa etman de an nenggik omamne apman eke lisoho wilip-enepuk fug hag de, at Hizkia anggembu dewa ai en de at omalikisi etma an nenggik omamne apma en loloho wilip-enebuk fug alereg,” ulug balfag.

¹⁸It ap raja Asyur en mon-enepfag ma lebag on etmano en de it enebe koloroho o kota Yerusalem anyo hwelag kuhuk en ulug de, it ap Yerusalem on elehet fak oho on emberim kwe wereg on omano enakolap kwelabeheg, enahayeg wereg on ai surukwag ulug debeheg, duruk kwit de, mundoho etma enele Ibrani eneleroho uruk kwit, hum ngairoho hwiruruk katfag.

¹⁹Iren de ap homi Yerusalem on en Allah apne wauk on anyo re, it ap homi enunggul unuk amu kwe en enanggembu dewa ap enenggik en hilinggi folug apne wauk on hagdeg ulug uruk katfag.

²⁰Airoho uruk ale en de Raja Hizkia inim, Nabi Yesaya hun Amos amloho anyo nim en de TUHAN en let-nenebukwag ulug somban ebag.

²¹Somban ebag ma re nukoho misig salim de, TUHAN en it ap homi Asyur on enowesi perwira ai enowarukwag ulug malaikat misig eke mondorik watfag ma re, mundoho enowarik watfag. It anyo enowatil laukem de hun raja anyo mun enggali hum atfagdeg obam o Asyur omano nikangge lebag. Famen de nukoho misig salim de at amu neg anggembu obam omano kwebagdeg weregman de, at onggwareg omaliki enebe fomane watfagdeg de at ebe karog fam watfag.

²²Airoho atfag ai fam de at Hizkia nim, it ap homi Yerusalem on nim, at Sanherib raja Asyur on anyo mel, it eneselei on fomane anyo mel, enenggik omamne apman TUHAN en loloho wilibi fesebag ai. Ai debeselug de At TUHAN en de it ap homi Yerusalem on anyo enakol eleg angge wongdoho welamag ulug debesebag ma re, it enori negara it horogdoho wereg on en oho lal-enebik wam fug angge neg welatfag.

²³Ai huli en it ap homi enunggul unuk amu on en at raja anyo along bolug unuk leho foruk kwit de, ap homi humdoho o Yerusalem waharuk on en de di angge su angge TUHAN obahet foruk on ulug mel, at Hizkia ahayegdoho og-utuk on ulug mel, walug waharuk katfag.

²⁴Li eta li em de at Hizkia anyo ouk obam atfagdeg de, ouk mun anggin on wauk kwit de at ebe waram alereg latfag. Airoho deg lit deg aren somban ebag ma re, TUHAN en de at ebe aouk fano aruhun ale ulug de eneg ale unug etfag.

²⁵At ebe TUHAN en aouk anyo fano hilinggi febag famen de at awonog atuk kwit de, TUHAN obam dang-debag fug. Ai fam de At TUHAN en it ap homi Yehuda on mel, Yerusalem on mel, fam olok fesebag.

²⁶Famen de it ap homi Yerusalem on anyo mel, at Hizkia mel, TUHAN apma sebe ulug sebele fahat debag ma re, at Hizkia ebe oluk wereg li em de unggum anyo it enobam foruk katfag fug.

²⁷At Raja Hizkia re mun enggik wereg ahun deg ma re, di ap homi su ap homi en along bolug leho foruk katfag. Aren angge di angge su angge, emas, perak, mel helep permata on mel, amben-amben angge mel, dog mapnu angge mel, munangge manangge onggo wereg angge fomane mel, omano forukmu ulug de, obale ambe witil lebag.

²⁸Aren de angge di angge su angge kwenang fam en anggen yihig baleg angge, gandum, anggur, zaitun ahalue hag angge mel, fahet de o gudang sum anggen forukmu etmano witil laheg, wam sapi, domba mel, fahet wam obam humdoho witil laheg, debag.

²⁹At Allah en di angge su angge dungap debebag on etma re humdoho deg ma re aren, o kota oho humdoho witil lebag.

³⁰At Raja Hizkia ai en deg ik Gihon eleruk wilibik waharuk on anyo latfagdeg de, kwenang apmane en hwaloho re o kota Yerusalem anyo ilonggo fil kwelabik lebag ahun. At Hizkia en di ale su ale duruk katfag on etma re ambiangma mundoho atuk neg katfag.

³¹At ebe ouk deg latfag famen mun along on duk fug aleroho fano atfag ale anyo fahet it de, Ai keroho atfag ulug it ap homi Babel on mon-enebik watfagdeg hein wag watfag ma re, At TUHAN en de at enda deg ale abut balmin ulug de, at Hizkia en amu ukwag ulug il febag.

³²At Raja Hizkia en duruk katfag ale fomane mel, aren TUHAN fam enda hundig welatfag ale mel, de buku Allah en wahyu Nabi Yesaya hun Amos amloho anyo og-etfag on anyo baleg on ai fam inim, buku it raja Yehuda on mel, Israel on mel, en duruk katfag ale fahet dindiloho baleg on ai fam inim, baleg wereg.

³³At Hizkia ebe waratfag ma re it raja sal-enepuk katfag ma en kwenang yeheg-yehegma etano salfag. Ne, at ebe waratfag ma aire it ap homi Yehuda on mel, Yerusalem on mel, mundoho en de at ebe along bolug leho foruk kwit salfag. At ebe obalma re at amloho Manasye anyo raja lahabag.