Read Ninia Yali 2 TAWARIKH 33 Bible Online

2 TAWARIKH 33 - Ninia Yali bible

2 TAWARIKH 33

¹At Manasye re ebe umur 12 tahun deg li it ap homi Yehuda on fahet raja inatfagdeg de o Yerusalem fam etma 55 tahun wereg lit melal-enepuk katfag.

² At inatfagdeg wereg lit de, it ap homi Israel on o kwenang ai fam owan kwik lauk kweleg ap homi enunggul unuk Kanaan enap wereg ma TUHAN en muko wilibi febag enap etmano enobabut kwasikdoho duruk katfag ale omanoroho duruk kwit de, aren TUHAN il hanim siag on neg duruk katfag.

³Ap homi en kembu mot-duruk katfag kwe mel, kembu Baal obahet duruk kwit wam waroho yalduk katfag angge mezbah-mezbah omano mel, at akni Hizkia en mun erap-ferapdoho hwik-esebag on omano re aren nikangge wireheg, kembu hwe on Dewi Asyera anyo ahut ilitdeg wireheg, sohwal-anggen apne weheg, duruk katfag.

⁴ At TUHAN en uruk kwit de, O Yerusalem etma re li mundoho-mundoho etma An nobahet neg duruk kamuhupmu welaruhu, ulug ebag famen de, at Manasye en de o TUHAN Obam wirigmu etmano kembu dewa omano fahet wam waroho yaldukmu mezbah witil lebag.

⁵O TUHAN Obam wirig on anyo olohotma foma-foma etano re sohwalanggen fahet wam waroho yal-utuk mu ulug mezbah anyo witfag.

⁶At onggwareg omaliki ohore yal angge yalduk on ulug de o Lembah Hinom etmano waroho yalik lebag. Nikale aren neg de it hwal-enap en duruk ale omano deheg, hein og-angge hein weheg, ap homi waratfag on enaheime fam hweag-nomag ulug hein og-enebik laheg, duruk katfag. Aren airoho neg duruk katfag ai fam de mundoho TUHAN olokap kwelabe foruk katfag.

⁷ At TUHAN en TUHAN Obam wirigmu anyo fahet it Daud mel, Salomo mel fam uruk kwit de, “It ap homi enunggul unuk Israel on wereg kwe wilayah 12 etmano sahalimu en de o An Nobam Yerusalem ai, An nobahet li mundoho-mundoho etma kabog-duruk kamuhupmu ulug yug deberihikdeg momale ferihik.

⁸It An nomaliki Israel on anyo en lahe An nawene melaleg wereg on anyo holoho deheg, wene diroho diyug suroho diyug ulug An namingming angge Musa anyo en it og-esebag on anyo furebelug deheg, duruk halug de, o kwenang An den it enambu-enombasi fam og-esauihik mu oman muko wilip-enebik lowag ulug embesehuk fug,” ulug hweag-esebag. Famen de aren de kembu ahut ilitdeg anyo walug TUHAN obam wirigmu etmano feik kwebag.

⁹At Manasye en dil ale famen de it ap homi Yehuda on oho, it ap homi enunggul unuk enap o Kanaan fam etma wereg ma, it TUHAN omaliki anyo o ai fam kwik lauk kwit TUHAN en muko wilibi fesebag on anyo en siag duruk katfag on ai re horog maben hag famen de iren neg de mun siag humon duruk katfag.

¹⁰Airoho neg durukmu re TUHAN en it ap homi Yehuda on mel, at Manasye mel, it duruk ale anyo fahet hweag-esauk katfag, famen de it anyo holuk eleg angge neg duruk katfag.

¹¹Ai fam de o it ap homi Yehuda on wereg ma etmano bin kwik wamag ulug de TUHAN en it Asyur on tentara enakni panglima anyo mondorik watfag ma re, at Manasye anyo kwandi fam hwenaloho senetil lauk kwit de sabu hetdoho walug de o Babel lebag.

¹²Airoho walug feik lebag ma obam anggin fanggindoho wereg lit de, aren TUHAN Allah fam enda sebe ulug, Aren let-nabukwag ulug somban ebag.

¹³Airoho somban ebag on anyo At Allah en esanggo holfagdeg de, at Manasye anyo eke nim melal-enepuk kamag ulug de O Yerusalem nikangge mondorik watfag. Anyo atfag ale ai fam en de, TUHAN aire demdoho Allah, ulug at Manasye anyo endama dip-debebag.

¹⁴Airoho debagdeg de fobik en de at Manasye en de o kota Daud obam anyo en timur fil elehet fak dag fil on anyo ekenim yatdoho emberimmu witfag. Aren de obale eke misigmu ik Gihon eleruk horogdoho donggoma etano en indip debagdeg de lahabil de ilihig de utara fil sokole lohon eke unuk Pintu Gerbang Ikan uruk katfag ma ai fam en de, o kota ebe fil de o Ofel urukmu etma huli feik watfag. O it ap homi Yehuda on wereg kwe en iren elehet omane on oho latfag kwe etma re ap panglima misig heheg, feseil lebag.

¹⁵Aren de ap homi enunggul unuk amu on en enanggembu dewa ahut ilitdeg omano mel, kembu amu on o TUHAN Obam wirigmu feik kwebag on omano mel, oko wilibi feseheg, kembu obahet wam waroho yalduk angge mezbah wirig o TUHAN Obam wirigmen dukmu wereg latfag on mel, o Yerusalem fam etman amu kwe welatfag on mel, mun moluluk-malalakdoho debeseheg, debagdeg de abirangge omano walug o kota dag fil wilibik lebagdeg hwik dik lebag.

¹⁶Airoho debelug, aren de TUHAN obahet duruk kwit wam waroho yal-utuk mu mezbah anyo buhun-debagdeg de, etmano wam saliwam mel, TUHAN dang duruk kwit ulug on mel, waroho yalfag. Airoho duruk kwit de, it ap homi Yehuda on mundoho omano en TUHAN Allah it ap homi Israel on enakni anyo fam obahet dukwag ulug hweag-esebag.

¹⁷It ap homi en de obale amumu omano oho wam waroho yalduk katfag famen de, mundoho etma re TUHAN obahet neg duruk katfag.

¹⁸At Manasye en duruk katfag ale foma inim, TUHAN Allah fam somban uruk katfag ale inim, it ap homi Israel on enakni TUHAN Allah anyo unuk fam it nabi en diroho suroho ulug hweag-irik waharuk katfag on inim, mundoho re, buku it ap raja Israel on en duruk katfag ale dindiloho baleg on anyo fam baleg wereg.

¹⁹Aroho at Manasye en somban ebag ma TUHAN en onggo hweag-etfag ale mel, at ebe enda aham duk elegma asig duruk katfag ale fahet mel, kembu mot-duruk kwe mel, kembu hwe on Dewi Asyera ahut ilitdeg witfag on mel, aren kembu apne wauk katfag on mel, etmano mundoho re, buku it nabi en duruk katfag ale dindiloho baleg on anyo fam mundoho baloho febag.

²⁰At Manasye ebe waratfag ma re at ebe welatfag ma o it ap raja weregma ulug wirigmu etmano salfag. Sale folug de at amloho Amon anyo raja at obalma aik lahabag.

²¹At Amon de ebe umur 22 tahun deg li it ap homi Yehuda on fahet raja inatfagdeg de, o Yerusalem fam etma tahun biren fam melal-enepuk katfag.

²²At akni en duruk katfag hagdoho re at inim kembu akni en apne wauk katfag on omano apne weheg, kembu etmano enobahet wam waroho yal-enebeheg, duruk fam de aren TUHAN il hanim siag duruk katfag.

²³Famen de at akni en de enda sebele fahat dalug sombandoho TUHAN akit waharuk katfag hagdoho duk fug angge siag neg alongdoho duruk katfag ai fam neg de at akni en duruk katfag on nim ahamdeg welatfag.

²⁴Airoho duruk kwit wereg ma re at Raja Amon autsi pegawai omano en abug baldil lauk kwit de, at ebe obam ilonggoma etmano weregman warik kwebag.

²⁵Famen de it ap homi Yehuda on wilipuk kwit de, it ap Raja Amon watfag on etano binggi enowatfagdeg de, at raja amloho Yosia anyo raja unduhuk febag.