Read Ninia Yali 2 TAWARIKH 34 Bible Online

2 TAWARIKH 34 - Ninia Yali bible

2 TAWARIKH 34

¹ At Yosia re ebe umur 8 tahun deg kweleg, it ap homi Yehuda on enobahet raja inatfagdeg de o Yerusalem fam etma 31 tahun unduhuk wereg lit melal-enepuk katfag.

²Aren de at ambu Raja Daud en obabut duruk katfag aleroho duruk kwit de, Allah wene melaleg wereg on anyo abirangge holoho neg duruk katfag. Aren de TUHAN endama ahayeg hauk ale neg duruk katfag.

³At Yosia ebe mun owan angge en, raja inatfagdeg anyo 8 tahun en melal-enepuk katfagdeg de, 4 tahun ombolim on fam de at Yosia anyo en de kembu wutuk kwe mel, kembu hwe on Dewi Asyera anyo ahut ilitdeg wereg on mel, kembu foma amu on mel, omano mun erap-ferapdoho debeseil lebag. Ai debelug de, aren de ambu hun Raja Daud en apne wauk katfag on Allah anyo apne wauk ale indip debag.

⁴ At Yosia autsi en de kembu ahut ilitdeg omano welelenggendoho lahabe febagdeg de, iren ai debebag angge apuhuno omano re it ap kembu etma fahet wam waroho yalik lauk katfag on waratfag ma sal-enepfag kwe enemig kwe etmano folik lebag. Baal fahet ulug mezbah wirig on mel, amben fano angge dupa anyo yaldukmu ulug mezbah wirig on anyo mel, de mundoho meiyal-esebag.

⁵ Ai debelug de it ap imam hwal enap kembu etma fahet duruk kwit welatfag on etma enowag siling omano re at Yosia en de mezbah omano emberimmu yalfag. Airoho debag ai fam de aren it ap homi Yehuda on mel, Yerusalem on mel, anyo TUHAN apne wa aleregdoho debesebag.

⁶Ai debag higitdoho re o kota mel, daerah mun siag atil lebag kwe wilayah Manasye on mel, Efraim on mel, Simeon on mel, wereg latfag kwe etmano mel, it Naftali on welatfag kwe mel, etmano huli airoho neg dil lebag.

⁷At Yosia en de it Kerajaan Utara fil welatfag on en kembu obahet mezbah wirig latfag on mel, Asyera anyo ahut ilitdeg latfag on mel, de mundoho erap esebagdeg de, mezbah mel, kembu ilitdeg mel, amben angge yalduk katfag ma mezbah anyo mel mundoho anyo re irik-erapdoho debebag. Airoho debelug neg at anyo o Yerusalem watfag.

⁸At Yosia en de o TUHAN Obam wirigmu nim, o it ap homi Yehuda on wereg kwe etmano inim, kembu apne wauk kwe etmano mundoho elehapdoho febagdeg de, at Yosia ebe raja inatfagdeg anyo melal-enepuk men neg de tahun 18 on fam wereg li em de, o TUHAN Obam wirig anyo buhun-dukwag ulug de, ap enebe henahan mon-enepfag. Ap henahan mon-enepfag on etare, hun Azalya amloho Safan anyo ha, o Yerusalem fam etma gubernur unduhuk latfag ahun Maaseya anyo ha, hun Yoahas amloho Yoah pegawai leho on welatfag ahun anyo ha, mon-enepfag.

⁹It Lewi enap o TUHAN Obam wirigmu anyo sokolma kahaleg welatfag enap omano en de, it ap homi Efraim on mel, Manasye on mel, it ap homi Kerajaan Utara fil welatfag on en mel, it ap homi Yehuda, Benyamin, on en mel, it ap homi Yerusalem on en mel, uang febagma iren kabog-debag angge etmano hun Imam Agung Hilkia anyo og-irik watfag.

¹⁰At og-irik watfag ma re at Hilkia en de uang omano re, it ap henahan etano TUHAN Obam anyo buhun-durukmu il welamag ulug ap enebe henahan unduhuk fesebag enap etano og-esebag. It Og-esebag ma re, iren de uang anyo oko re,

¹¹it ap raja Yehuda enap omano en o TUHAN Obam anyo siag atuk kamag ulug embesebagdeg welatfag on etmano buhun-dukoho, it o e fam wutuk enap mel, o ebe wutuk enap mel, en helep mel, e mel, hundurukwag ulug it tukang omano og-esowag ulug enenggikmu febag.

¹²Ap o siag atfagma buhun-duruk katfag enap etare mun bekitdoho neg duruk katfag enap. It enebe yabuk durukmu melal-enepuk kamag ulug de it ap Lewi on enebe ohwan angge kepala unduhuk fesebag. It Lewi enap etare: It enunggul unuk Merari on en de, Yahat nim, Obaja nim, ne it enunggul unuk Kehat on en de, Zakharia nim, Mesulam inim, eta unduhuk fesebag. It ap lewi enap en binggong watuk ale mun enoluk-benoluk enap omano re,

¹³ap homi en o angge selmahalug waharuk on nim, it ap enenggikmuap duruk on etmano yabuk di kwe su kwe durukmu inim, di on su on fahet wenako unuk lisu baleheg, duruk on fahet inim, sokolma kahaleg lamag ulug on inim, fahet inil kahal-enusug lit welamag ulug unduhuk fesebag.

¹⁴Airoho debeselug de at Hilkia en de uang kabog-debag angge anyo obalma forohoma etmano en wilibi feik waharuk men de, buku TUHAN awene melaleg baleg, At Allah en wene melaleg diroho diyug suroho diyug ulug baloho at Musa og-etfag on anyo wereg ma hweahasi.

¹⁵Hweaho febagdeg de, at Hilkia en Safan fam uruk kwit de, “Buku TUHAN awene melaleg anyo an den o TUHAN Obam wirigmu sumano en hweahaki,” ulug hweag-etfag. Ai ulug de buku anyo at Safan enggikmu og-etfag.

¹⁶Og-etfagma re at Safan en buku anyo enggikmu walug de at raja akit lebagdeg uruk kwit de, “Nit de nenakni hun haren melal-nenepihin ale anyoroho re mundoho duruhuk.

¹⁷Uang o TUHAN Obam wirigmu wereg on anyo re mundoho wauhukdeg de it yabuk duruk enap mel, it inil kahal-enusug lit wereg on nim og-esauhuk,” ulug hweag-etfag.

¹⁸Airoho ebagdeg en de eke nim dopnoroho uruk kwit de, “Buku sure at Hilkia en an og-nereheik angge,” ulug de buku anyo at raja olohotman bilinggebag.

¹⁹Bilinggebag on anyo at raja en esanggo holsireg de, mun enda hesilduk en de asum dinil-denel esebagdeg welatfag.

²⁰Airoho dulug de at raja en it Hilkia ha, hun Safan amloho Ahikam anyo ha, hun Mikha amloho Abdon[16] anyo ha, negara ai fam fahet lisu balduk katfag on Safan anyo ha, at raja onggwareg along baloho lauk on Asaya anyo ha, fam uruk kwit de,

²¹“It nenambu-nenombasi en de wene melaleg diroho diyug suroho diyug ulug buku su fam baleg ale anyo higitdoho duruk katswa fug mu re TUHAN en olok nit nenobam foruk katsi. Anggere, hiren de an nobahet nim, it ap homi Israel on mel, Yehuda on mel, fahet inim, de buku su fam de keroho baleg? ulug TUHAN hein wag lakiek,” ulug mingming-enepfag.

²²Airoho mingming enepfagmu re, it Hilkia ha, Ahikam ha, Abdon ha, Safan ha, Asaya ha, etano re, wene ebe diroho wereg anyo hweag-nesowag ulug de, nabi homi on eke unuk de Hulda ai akit lebag. Hwe ai ahun de unuk Salum hun Tikwa amloho, hun Harhas[17] omba anyo. At ebere nabi o Yerusalem ket bang debag ma etma wereg lit de, o TUHAN Obam wirigmu wene kabog-durukmu etmano fahet sum it etma wene kabog-duruk kwit wan-duruk on fahet hwalduk katfag ohwe akit lebag. At hwe Hulda anyo en de iren diroho suroho ulug ebag ale etmano esanggo holfagdeg de,

²³“Hit de henobam nikangge laluhupdeg de at raja fam de diroho eheik ulug hweag-irik lakiyug: It ap homi Israel on en apne wauk on TUHAN Allah anyo en uruk kwit de,

²⁴It ap homi Yerusalem on nim it mundoho nim en de, An enambolhan lin nealug de, iren wam waroho ap Allah enapeleg on en mot-duruk katswa on omano fam feik laheg, duruk katswa ma, mundoho iren duruk katswa on eta fam An nahummu nolok kwelap napuk katswa ma re, An den Yerusalem on enobam nolok ferihikdeg de, An nolok lahasi on aire mun sebel hihi fug halereg.

²⁵Anggere buku ai fam wipdeg wene balegma at raja obam biling-itsi on ai fam an den Yerusalem fam inim, it ap homi etma wereg on fam inim wipdoho fesehuk.

²⁶Famen de at Raja Yosia fahet neg de, An TUHAN Allah it ap homi Israel on enakni anyo en de wene su obam foruk kahi: Buku ai fam baleg ale anyo bilinggurukmu hat hesanggo holdihin deg,

²⁷haren henda wat-dauk kwit, hendama sebe ulug welatihin. An den de o Yerusalem inim, it ap homi o etma wereg on inim enowaruhuk ulug mun nele wal deberihikdeg welatihik famen de, An den airoho debehuk ulug deg latihik ale anyo hat hesanggo mundoho holdihin deg, fong wat-dauk kwit hagdoho oba yako hasum dinil-denel debelug welatihin. Ai fam de haren somban irihin on aire An mundoho holdihik anggere,

²⁸hat hebe holuk wereg li em etma re unggum ai it ap homi Yerusalem belabik waruhuk fug. Ne, hat hebe ohore mun finik-fanoroho wararuhun en hobahakuk, isi, eheik ulug hweag-umuk,” ulug hweag-esebag. Airoho hweag-isil lauk em de it hun raja en mon-eneik lebag on etano wene anyo walug hweag-irik watfag.

²⁹Airoho hweag-irik lebag ma re at Raja Yosia anyo en de it ap homi Yehuda fam inim Yerusalem fam inim, enowesi melal-enepuk on etmano mundoho wol-enepfagdeg de,

³⁰at inim seberoho re o TUHAN Obam wirigmu etmano lebag. It laukmu aire ininim de it Lewi enap nim, imam nim, it ap homi holduk on mundoho enenggik wereg on enenggik eleg on et mundoho lebag. Lebagdeg de it enalukwema at raja onggwareg obalma[18] etano at raja anyo inatfagdeg de, Buku sali wat-wat atfag angge o TUHAN Obam wirigmen hweahabag angge anyo abirangge ele hum fam bilinggebag. Airoho bilinggulug de, Allah en de buku ai fam sali watuk kwit hiren diroho duruk halug An den diroho henepuk karuhuk ulug, TUHAN inim it omaliki inim sali watfag on anyo buku ai fam mundoho baleg wereg on etmano dip debeheg, At TUHAN awene melaleg wereg on nim, wene diroho diyug suroho diyug ulug ebag ma wereg on nim, anyo nenenda nenebe mundoho abirangge fam duruk kamuhuk ulug eheg, At TUHAN ebe ele holoho neg duruk kamuhuk ulug mel, at raja en TUHAN inim sali watfag.

³¹

³²Ap homi Benyamin on nim ne it amu on nim o Yerusalem wereg on etmano en oho, re, “Wene melaleg ai holoho duruk kamuhuk ulug sali wariek, aire sali it henombasi nim Allah nim watswa on anyo,” ulug hweag-esebag.

³³At Raja Yosia en de kembu mun enahummu aldo on di kwe su kwe wereg on mel, it ap homi Israel on wereg ma wereg latfag on mel, etmano mundoho siahap-biahapdoho febag. Airoho debelug de, aren de ap homi holduk on fam uruk kwit, it enambu-enombasi enakni TUHAN Allah ai fam neg obahet duruk kamag ulug mundoho hweag-esebag. Airoho hweag-esebag ma re at Yosia ebe oluk wereg lire it ap homi anyo re TUHAN fam dipdoho neg duruk katfag.