Read Ninia Yali 2 TAWARIKH 35 Bible Online

2 TAWARIKH 35 - Ninia Yali bible

2 TAWARIKH 35

¹At Yosia en de TUHAN along bolug leho foruk kwit ulug de, o Yerusalem fam etmano soni Paskah anyo esetfag. Nukoho ai salim kabog-duruk on fahet de tanggal 14 fam bigalem misig wereg kweleg wam domba watfag.

²Airoho dukoho re at Yosia en de it ap imam o TUHAN Obam wirigmu etmano yabuk dukwag ulug yohwandoho og-esauk kwit de, “Yabuk de fanoroho neg diyug,” ulug komoroho hweag-esebag.

³At Yosia en it ap Lewi on TUHAN obahet ulug eneko fahat dausa on nim, it Israel on fahet hweag-esauk on guru welatfag on nim, fam hweag-esauk kwit de, diroho hweag-esebag, “Peti TUHAN en Sali wene wareg angge yohwareg on mun amu eneg on aire, hiren ekema hihiloho feheg, ekema hihiloho feheg, dil la fug. We o TUHAN Obahet hun Daud amloho Raja Salomo anyo en witfag ma etma feik kwiyug. Hiren de At henakni TUHAN Allah anyo obahet yabuk deheg, At omaliki ap homi enunggul unuk Israel on anyo enobahet yabuk deheg, diyug.

⁴ At hun Raja Daud inim, at amloho Raja Salomo inim en henebe yohwandoho henobahakeg, heneyabuk huli heheg og-heseheg, henepswa ale anyo higitdoho dul ulug o TUHAN Obam etma fik-fouk deg wereg lamuk.

⁵Hit henebe kabogdeg welahep on ai en, o TUHAN Obam etmano it ap homi Israel on kabog heheg waharuk on omano domog let-enepuk kamuhup en de, hiren fanoroho hwaliyug.

⁶It ap homi Israel on fomane en de At TUHAN en wene melaleg Musa fene en og-nesebag ale anyo higitdoho dukwagdoho re, wam TUHAN obahet waroho foruk on hiren wep debeheg, hit henonggwareg henebe an de TUHAN apne wamin en deg lahi, ulug fouk dobahat deheg, diyug. Ne, hiren de domba Paskah esetuk on anyo oho waruhup anggere,” ulug hweag-esebag.

⁷At Raja Yosia en de it ap homi soni Paskah eserukoho kabog-dik watfag on anyo en wam waroho Paskah dukwag ulug de, aren wam onggwareg en on domba 30.000 en nim, domba omalik mel, kambing sauwe on mel, sapi yohombuk on 3.000 en mel, og-esebag.

⁸Ne, it Yosia autsi pegawai omano en oho re it ap Lewi enap mel, imam mel, it ap holduk on mel, fahet wam kabogdoho og-esebag. It pegawai o TUHAN Obam anyo fam yabuk dukwag ulug fesebag enap de, Imam Agung Hilkia anyo ha, Zakharia ha, Yehiel ha. It enebe henahan etano en de wam domba omalik mel, kambing ket sauwe on mel, de 2.600 en nim, sapi yohombuk on 300 en nim, soni anyo esetuk kwit warukwag ulug it imam etmano og-esebag.

⁹Ne, it Lewi enap enowesi melal-enepuk on hun Konanya, Semaya, at are Netaneel, Hasabya, Yeiel, Yozabad ha, etano en de wam domba omalik inim, kambing ket sauwe on nim de 5.000 en nim, sapi yohombuk on de 500 en nim Paskah esetuk mu anyo waroho eserukwag ulug it Lewi enap etmano og-esebag.

¹⁰Airoho mundoho debelug de, at raja en melal-enepfag hagdoho re, it imam inim, it Lewi enap enebe kabog heheg, deg latfag on etmano nim, de Paskah anyo eserukoho re enobale hundomog hwilil lebag.

¹¹Airoho debelug de, iren wam Paskah fahet duruk kwit esetuk on omano watil lebag ma re it ap Lewi enap en de wam omano ahap nonggoldil lauk kweleg de it imam etmano en de wam mep omano okore mezbah anyo fene hilildil lebag.

¹²Wam waroho TUHAN og-utuk ale fahet wene melaleg buku Musa wene melaleg fam baleg on anyo higitdoho dukwag ulug de, it ap homi etma kabog-dik watfag on etmano, it misig heheg, enahain elekwe domog wam waroho yal angge yalukwag ulug de, wam misig heheg, og-isil lebag.

¹³ Airoho debagdeg de, wene melaleg fam wereg ale higitdoho re, it ap Lewi enap en de wam Paskah fahet on omano indokma werareheg, wam amu eneko febag on omano kuali, belanga, periuk fam esereheg, debagdeg de wam baleg omano re folo-folo it ap homi etmano yohwan-enepil lebag.

¹⁴It ap Lewi enap aire hup angge et wam omano yal angge yaleheg, wam amug etmano yaleheg, neg duruk katfagdeg de, it anyo en wam it enonggwareg fahet on nim, it ap imam fahet on nim, fouk debag.

¹⁵ It enunggul unuk Lewi on en enunggul unuk aegdoho hun Asaf ambiangma on binggong watuk ale fahet mun enoluk-benoluk enap omano re, at Raja Daud en eneyabuk fesebag aleroho eneyabukmu enobale domog welatfag. It ap ai enunuk de su: Asaf, Heman, Yedutun at ebe nabi famen at raja obahet yabuk duruk katfag on anyo ha. It ap o sokole kurukmu kahaleg wereg on omano fahet ohore it ap Lewi on fomane en let-enepukmu, it eneyabuk wereg ma etmano embeselug la fug angge we etmano en neg Paskah anyo duruk katfag.

¹⁶Nukoho anyo salim de at Raja Yosia en Paskah esetuk ale fahet hweag-esebag aleroho, wam mezbah fam yalduk ale et, di on su on duruk ale et, omano debag.

¹⁷ Ap homi Israel on mundoho etma kabog-dik lebag on anyo re nukoho sabiren ai hunduko soni Paskah anyo esereheg, Soni Roti Fituk Angge Fam Eleg angge wirig on nauk salim ulug on anyo fahet ebetuk kwit, kabog deheg, debag.

¹⁸At Yosia raja inatfag huli en tahun 8 on ai fam, at inim, it imam inim, it Lewi enap inim, it ap homi Yehuda on, Israel on nim, it ap homi Yerusalem on nim, en,

¹⁹Paskah esetfag on aire it ap raja at inam fug li welatfag on etma misig en oho, at Nabi Samuel welatfag huli en oho, eke airoho esetfag fug.

²⁰O TUHAN Obam wirig anyo fahet at Raja Yosia en airoho debagdeg duruk men de, at Nekho raja Mesir on anyo autsi og-eneplug de o Karkemis Ik Efrat horogma etma weim yabuhuk ulug watfag. Airoho waharuk ale en de at Yosia en kwe balmin ulug debag,

²¹famen de at Nekho en Yosia fam wene mondorik waharuk kwit de diroho ebag, “Ap homi Yehuda on enowe raja ao! Weim sure hat fene fahet de fug. An de Allah en mingming-napuk kwit folo-folo din ulug eheikma it naselei on nim weim apul ulug waharuk kahi, ne hat nim yapul en ulug de fug. Allah re an nibil wereg angge re, haren an kwe bal-nabuk fug. Ne, kwe bal-napmihinmen de At Allah en hat mun welelenggen habikohoreg,” ulug mondotfag.

²²Famen de at Yosia re Allah en Raja Nekho fene en ebag ale anyo hole fouk fug anggere, aroho omamne atfagdeg ninim yapmin ulug duruk katfag. Airoho duruk kwit de, at Yosia anyo re yamdalon o Megido donggoreg ma etma lebagdeg de weim yabik lebag.

²³Yabik lebag famen de weim yapukmu anyo en at Raja Yosia anyo dog ware febag. Airoho ware febag ma dog wareg ebe anyo yebil humdeg en de, “Weim yapukmu etmano en og-naplug wilibiek,” ulug amingming angge etmano hweag-esebag.

²⁴Airoho hweag-esebag ma re it amingming angge etmano en de kereta aren on anyo famen hamboko re kereta amu on eke eta welatfag on fam lahabe folug de walug o Yerusalem watfag. Walug watfag man de etmano en waratfag ma re, it ap raja sal-enepuk katfag ma etmano salfag. Ne, at waratfag on anyo fahet de it ap homi Yehuda on mel, Yerusalem on mel, fong watuk kwit welatfag.

²⁵At Yosia waratfag on ai fahet de Nabi Yeremia en oba suni misig eke felalfag ma re, ketia huli en de suni ai at Yosia waratfag on anyo fahet ebetuk li em de ap et, homi et, it ap homi Israel fam etman suni wilipuk enap et, wilipuk kwit neg wereg. Suni aire iren Suni Oba Suni kabogdoho balfag on anyo fam kwelabe febag.

²⁶At Yosia en duruk katfag ale mel, aren TUHAN fam enda hundig deg latfag ale mel, TUHAN awene melaleg wereg on anyo holoho duruk katfag ale mel,

²⁷ele horogdoho re, we aren duruk katfag ale indipmen ambiangma huli anyo re, buku it ap raja Israel on mel, Yehuda on mel, duruk katfag ale dindiloho baleg on anyo fam mundoho bale febag ma wereg.