Read Ninia Yali 2 TAWARIKH 36 Bible Online

2 TAWARIKH 36 - Ninia Yali bible

2 TAWARIKH 36

¹At Yosia anyo waratfag ma at obalmangge re it ap homi Yehuda on en at Yoahas anyo momaloho o Yerusalem fam etma raja welamag ulug unduhuk febag.

²At Yoahas ebere umur 23 tahun deg kweleg raja it ap homi Yehuda on fahet inatfagdeg de bigalem henahan neg o Yerusalem fam etma melal-enepuk katfag.

³ At Yoahas ebere raja Mesir on Nekho anyo en de sebeloho feil lauk kwit de, hetdoho walug de o Mesir lebagdeg de it ap homi Yehuda on anyo ohore at fam onggo perak on anggin 3.400 kilogram en deg angge nim, emas on anggin 34 kilogram en deg angge nim, foukwag ulug hweag-esebag. Airoho hweag-esalug de, aren de hun Yoahas are Elyakim anyo unuk ahamdoho Yoyakim soale folug de, raja unduhuk febag. Ne, at Yoahas de hetdoho walug de o Mesir lebag.

⁵ At Yoyakim de ebe umur 25 tahun wereg kweleg raja it ap homi Yehuda on enobahet inatfagdeg de, o Yerusalem fam etma 11 tahun unduhuk wereg lit melal-enepuk katfag. Aren de akni TUHAN Allah anyo fam siag duruk katfag.

⁶ Airoho durukmu re at raja Babel on Nebukadnezar anyo o it ap homi Yehuda on wereg ma etmano hwelag kwik watfagdeg de, at Yoyakim anyo senetlug enggik sabu hetdoho walug de o Babel lebag.

⁷At Nebukadnezar en de di angge su angge mun fano on o TUHAN Obam wirigmu wereg on omano et fomane hwelalug lebagdeg de at onggwareg ebe wereg ma o Babel etmano feik lebag.

⁸At Yoyakim en duruk katfag ale amu on inim, aren obabut mun siag on deheg, kwasikdoho doho deheg, duruk katfag ale nim de, buku it raja Yehuda mel, Israel mel, fam unduhuk latfag enap en duruk katfag ale dindiloho baleg on anyo fam mundoho baloho febag ma wereg. At obalma re at amloho Yoyakhin anyo raja inatfag.

⁹At Yoyakhin ebere umur 18 tahun deg li it ap homi Yehuda on enobahet raja inatfagdeg de, aren o Yerusalem fam etma bigalem henahan hunduko nukoho numen inim melal-enepuk katfag. Aren oho nikale TUHAN fam siag duruk katfag.

¹⁰ Tahun keron aham duruk li em de at Raja Nebukadnezar en de Yoyakhin anyo sabu hetdoho walug o Babel lauk kwit de, o TUHAN Obam wirigmu di angge su angge mun fano angge wereg on etmano et walug lebag. At Nebukadnezar en de at Zedekia Yoyakin owe[19] anyo it ap homi Yehuda on mel, Yerusalem on mel, enobahet raja unduhuk febag.

¹¹ At Zedekia ebere umur 21 tahun deg li em it ap homi Yehuda on enobahet raja inatfagdeg de o Yerusalem fam etma 11 tahun unduhuk lit melal-enepuk katfag.

¹²At ebere Nabi Yeremia en TUHAN en eheik ale ulug hweag-irik waharuk katfag on anyo higitdoho duk eleg angge deheg, at ebe enda sebele faha da fug angge deheg, duruk kwit de, aren akni TUHAN Allah fam siag duruk katfag.

¹³ At Raja Nebukadnezar en de at Zedekia limi duruk kwit de, “Hat hobam dipdoho duruk karuhuk, ulug Allah unuk fam hombuk balin,” ulug hweag-etfag. Famen de at Zedekia anyo en de at Nebukadnezar ele sahale folug duruk katfag. At Zedekia en ohore asiag omano embeselug sombandoho TUHAN akit wam fug anggere, aren it ap homi Israel on enakni TUHAN Allah anyo fam enda mun omamnereg lit duruk katfag.

¹⁴Ai on wereg kweleg de, it ap homi Yehuda on enowesi melal-enepuk on omano mel, it imam omano mel, it ap homi holduk on mel, omano en de it ap homi enunggul unuk amu on it horog kwe wereg on en duruk ale omano deheg, kembu apne weheg, duruk kwit de o TUHAN Obam, At TUHAN onggwareg en eneko fahat debag ma anyo alema re foruk katfag.

¹⁵It enambu-enombasi enakni TUHAN Allah anyo en de it fam inim, At obam wirig anyo fam inim enda hundig enepuk kwit de, it omaliki ai enelukap dik lowag ulug hindik-hundig Aren ap amingming angge etmano mon-enebik waharuk katfag.

¹⁶Famen de At TUHAN en ele uruk on etmano bosilikap debelug de it nabi omano unda yag enebeheg, it Allah en mon-enebik waharuk on etmano lal-faldoho feseruk katfag. Airoho duruk ale en de, At TUHAN en it ap homi anyo fam mun olok fesebagdeg de, it enobam unggum fesehuk ulug ebereg welatfag on ai fam it lil atlug la ale eke welatfag fug.

¹⁷ Ai fam de TUHAN en at raja Babel on anyo en it etmano enowarik wamag ulug endama debag ma re, at raja anyo en de it ap homi Yehuda on etmano it enebe sauwe on mel, it ap o TUHAN Obam wirigmu wereg on mel, mundoho enowatfag. At Allah en de it ai abirangge at raja Babel on ai enggikmu og-etfag ma re, sobal on et, sauwe on et, ap et homi et, ouk on et, fano on et, enda esa fug anggere mundoho enowatfag.

¹⁸At raja Babel on ai en de o TUHAN Obam wirigmu di angge su angge wene kabog-duruk kwit wauk angge etmano inim, di angge su angge fano angge wereg on etmano nim, at raja onggwareg en angge etmano inim, it autsi pegawai enengge etmano inim, mundoho del debagdeg de aren hwelalug o Babel lebag.

¹⁹ Aren de elehet fak oho on anyo molulukdoho belabeheg, o kota anyo harep fisatuk kwit de, o TUHAN Obam wirig anyo et yaleheg, at raja obam bumbuk mel, di angge su angge mundoho etma wereg angge etmano mel, yaleheg, debag.

²⁰It ap homi holduk on lil atfag on etmano re feleleng eneplug de, o Babel lebag. Etman de it anyo re at inim, it at ambiangma en endag-atuk katfag on etmano en inim enamingming anggeap eneplug weregman neg de hun raja Persia on en kerajaan anyo fam along atfagdeg omamne welatfag huli ai aik lebag.

²¹ At TUHAN en Nabi Yeremia fene en wene uruk kwit de, “Iren de tahun Sabat [20] anyo fam mot-duk eleg angge neg duruk en de o Yerusalem fam inim Yehuda fam inim etma 70 tahun ai kwenang iringgig laruhu,” ulug ebag ale anyo higitdoho atfag.

²²At TUHAN en duhuk ale ulug Nabi Yeremia fene en ebag ale anyo dimin ulug de, At Kores anyo it ap homi Persia[21] on fahet raja inatfagdeg, melal-enepuk li em tahun keram on fam de, at Kores en wene melaleg eke baloho wilibukwag ulug TUHAN en endama debag ma, wene melaleg anyo it ap homi aren melal-enepuk kwe wereg on etmano melaloho wilipfag on de diroho:

²³ “An Kores it ap homi Persia on enobahet raja unduhuk welahi on anyo en nawene melaleg de su! At TUHAN Allah ebe boholma leho wereg on anyo en di ap homi su ap homi o kwenangma suma wereg on enobahet nalong wereg lit leho welamag ulug an raja unduhuk nobahasireg de, o At Obam o Yerusalem o wilayah Yehuda anyo wurukwag ulug unduhuk nobahasi. Anggere hit Allah omaliki welahep on aire mundoho nikangge o Yerusalem etma lahup! We At TUHAN Allah en neg hwal-henepuk kamag,” ulug melalfag.