Read Ninia Yali 2 TAWARIKH 4 Bible Online

2 TAWARIKH 4 - Ninia Yali bible

2 TAWARIKH 4

¹ At Raja Salomo en de it yabuk duruk enap omano en waroho yaldukmu obale mezbah anyo no perunggu on fam ebe yaron ilit duruk kwit nunggulig de 9 meter ne lahabeg emberim de 4,5 meter doho wurukwag ulug hweag-esabag.

²Airoho hweag-esebagdeg de aren nikangge waruk kwenang dangge on fam buhundeg angge hag misig eke perunggu fam abung-abangdoho ilit angge higitdoho witfag on de su: Ilonggo ahaug ele anyo re 2,2 meter ne, huli-huli bul wareg latfag on ai re 4,4 meter, ne ebe maseroho kwelabeg latfag on de 13,2 meter.

³Ahap dag kwe maseroho re no sapi ilitdeg biren angge eraroho waruk ebe anyo mel dopno heheg witfag.

⁴Waruk dangge on fam hag wirig angge anyo re wam sapi ebe nesanggo en angge, no perunggu fam wiri febagdeg, ebe henahan de orohole utara fil hwaleg latfag, ne henahan de selatan fil, henahan de barat fil, henahan de timur fil hwaloho wereg ma enanduhunmu hwerie febag.

⁵Waruk kwenang dangge on fam dagdoho wirig on hag aire elahalet wilimdoho witfag alere 75 milimeter. Ne, ahap dag fil de waruk ik esetuk on funuroho wilibig hag deg ma re owil angge ket mumung deg ma hag deg latfag. Waruk ai fam de ik de anggin 60.000 liter en hagdoho deg latfag.

⁶ At Raja Salomo en de waruk olog angge humon neg num en witfagdeg de, foaben de o TUHAN Obam anyo wirigmen selatan fil foruk on fahet, ne foaben eke re utara fil foruk on fahet witfag. Waruk ebere wam waroho yalangge yalukoho lenggat heheg wereg on omano ik horuruk on fahet hilinggebag. Ne, ik waruk dangge on fam hilinggig angge hag fam anyo re it imam omano enebene buhun-dauk on fahet fouk deberuk katfag.

⁷ Ai en de eke lampu owag bosie emas on num en inim, e meja num en inim, wuruhuk ulug wenggelfag ale higitdoho hilinggebag. Airoho hilinggi febagdeg de, lampu owag bosie emas on mel, meja etmano mel de, o TUHAN Obam en ambe logma anyo foaben de hware fil, ne foaben de bekit fil, febag. Ai en ik nauk angge mangkuk emas on ebe 100 en inim hilinggebag.

⁹At Raja Salomo en de it ap imam enobahet ambe olohotma ilonggo fil eke, dag fil eke hilinggebag. Sok ebe ambe biren eta fam eke dulug eke dulug welatfag on aire no perunggu fam dopnoroho witfag.

¹⁰Waruk kwenang dangge on fam dagdoho wirig on hag on anyo re O TUHAN Obam wirigmu en unggut hwareroho fil etma febag.

¹¹Hun Huram it di angge su angge lalduk on fahet kepala anyo, aren Raja Salomo inim sali watfag ale higitdoho, o TUHAN Obam fahet di angge su angge mun fik-fouk debebag. Aren witfag angge aire, kuali mel, sekop mel, mangkuk mel, witfag. Ne, aren witfagdeg mun fik-fouk debebag[4] angge aire ebe su: Huluk humon biren Huluk eta emberimmu hwerie foruk on fahet obabut mangkuk hag angge biren witfag Bosiemanggen on sep hun-hun elang deg angge huluk ai unggulmu henaho latfag. E delima anggen perunggu on fam wirig angge ebe 400 en lang owag unggul fam bosiemanggen elang deg ma etano maseroho birenma ambiroho erareg latfag Kereta num en witfag Baskom olog angge log on num en witfag Waruk dangge on fam dag deg hag angge bejana perunggu on eke bejana anyo leho lamag ulug sapi perunggu on 12 en witfag kuali, sekop, garpu aeg soap hag angge inim witfag <pb(...)

¹⁷Di angge su angge etma re o Sukot dulug Zedera dulug bul o Yordan donggoma etma kwenang lohoum-lohoum durukmu hag etman wurukwag ulug Raja en mingming-enepfag.

¹⁸Di angge su angge aire mun hum-ham deg ma re perunggu ebe anggin kilogram ebe dien hagdoho fam wirehe, ulug ap misig en oho eke enoluk deg latfag fug.

¹⁹Raja Salomo en de o TUHAN Obam anyo fahet duruk angge orohole amu on emas mun buhun on fam wurukwag ulug hweag-esebag. Airoho hweag-esebag ma witfag angge aire ebe su: Wam waroho yaldukmu obale mezbah anyo roti unuk wareg feik waharukmu fahet meja anyo Airoho duhuk ulug wenggelfag higitdoho, o TUHAN Obam Ambe Mun Along Enegma anyo olohotma ombagbag duruk kamag ulug lampu bosie emas mun wirik on fam buhundeg angge ebe inim anyo O ilonggo elekwe alili anggeroho ulug owil angge ilit deg angge etmano mel Lampu omano mel, fa hamboangge omano mel, Lampu hekel nauk on anyo buhun-duruk angge mel, Mangkuk mel Piring amben fano on Dupa anyo yalduk on fehet mel, Piring indok anggen olog duruk on mel, Sok o TUHAN Obam wirigmu kwik lauk on mel, sok eke Ambe Mun Along Enegma anyo kwik laukmu fahet mel de emas fam dopnoroho witfag.