Read Ninia Yali 2 TAWARIKH 5 Bible Online

2 TAWARIKH 5 - Ninia Yali bible

2 TAWARIKH 5

¹ At Raja Daud en TUHAN Obam anyo mundoho wiri febagdeg de, ambe eke sum anggen forukmu ulug etmano, perak, emas mel, di angge su angge amu on at Raja Daud en TUHAN obahet febag on omano mel, walug feik kwebag.

² Airoho mundoho debebagdeg de, at Raja Salomo en it ap homi Israel on enowesi enunggul unuk domog melal-enepuk on mel, enunggul unuk anyo famen enggikdoho on omano melal-enepuk on mel, Peti TUHAN en sali wareg wene yohwareg anyo o hun Daud obam kota [5] Sion omano en de walug o TUHAN Obam wirigmu anyo feik laul en, o Yerusalem kabog-dik manik ulug hweag-esebag.

³Airoho hweag-esebag ma re it ap mundoho anyo Nukoho O Sabo wutlug wereg lit ebetuk katfag salim anyo kabog-dik watfag.

⁴It ap homi melal-enepuk enap anyo mundoho kabog-dik watfag ma re, it Lewi enap en Peti Sali anyo walug TUHAN Obam wirigmu feik kuswa.

⁵Ai feik kuruk kwit de, it Lewi enap mel, it imam mel, omano en de, TUHAN Obam Sabo saleg on anyo inim, o sabo ai fam wereg ma duruk katfag angge omano inim mundoho TUHAN Obam wirigmu etmano neg feik lebag.

⁶Airoho feik kuswareg de at Raja Salomo inim, it ap homi holduk on mundoho inim, Peti Sali anyo olohotma kabog-debagdeg de, wam domba mel, sapi mel, mun wenahauk fug aleroho omano TUHAN fahet waroho yalfag.

⁷Ai mundoho debeswareg de it imam omano en de Peti Sali anyo bearulug de, TUHAN Obam wirigmu kuswareg de, o Ambe Mun Along Enegma atluk no kerub ahut ilitdeg wereg ma apma etano feik kusa.

⁸Feik kuswama re it kerub etano enahwerabul en de peti anyo inim, e beahan etano inim wiriloho saleg latfag.

⁹E beahan etare mun yit-yatdeg ma re o dagman de ambiang enameg latfag fug famen de, o Ambe Mun Along Enegma anyo alukwe fil en neg de ambiang enameg latfag. (E etare ketia huli en oho etma wereg.)

¹⁰ Peti Sali ai fam de amu angge eke yohwareg elegma re we helep kahaleg biren angge, it ap homi Israel on o Mesir en Kanaan laul ulug kwema lauk men TUHAN en it inim sali wat-wat atfag on anyo, Dom Sinai fam etano en at Musa en helep eta yohware febag angge welatfag.

¹¹ Iren airoho debeswareg de it imam mundoho etma welatfag on etmano enebe kabogdeg ale domog wene kabog-dul en ulug enebe fik-fouk debag. Ne, it enunggul unuk Lewi on fam en suni wilibeheg, binggong wareheg, duruk katfag on, hun Asaf, Heman, Yedutun mel, it enunggul unuk on mundoho mel, de enasum il sako on fam wirig on wan-debag. Airoho wan-debagdeg de it Lewi enap aire yalduk angge obale mezbah weregman alukwe timur fil etano binggong simbal mel, kecapi mel, seneko unduhuk latfag. It airoho unduhukmu ai ininim de it imam anyo enebe 120 en bohweap trompet fururuk enap inim unduhuk welatfag. It unduhuk wereg lit de suni enele seberoho wilibeheg, binggong trompet mel, simbal mel, binggong amu on mel watuk mu re mun misig sebereg latfag. Ne, iren TUHAN mot-duruk kwit suni enelma wilipuk katfag alere diroho: “TUHAN aire mun fano. Aren enda hundig-nenepuk on aire mundoho-mundoho fahet deg ma, TUHAN motdeg neg welamag,” ulug u(...)