Read Ninia Yali 2 TAWARIKH 6 Bible Online

2 TAWARIKH 6 - Ninia Yali bible

2 TAWARIKH 6

¹Airoho deg kweleg etano at Raja Salomo en somban uruk kwit de, “TUHAN nakni, Hat de anggulog heik on fam wereg alere mun hambono.

²Ketiare o mun humon Hat hebe mundoho-mundoho welaruhunmu wirihi ai,” ulug somban ebag.

³Airoho somban ebagdeg de at raja anyo alukwe endenoho it ap holduk on anyo wereg fil atfagdeg, Allah en it ap homi anyo enobam fanoap debesoukwag ulug heng-ebag.

⁴ Aren heng uruk kwit de, diroho ebag, “TUHAN nakni, harew uruk kwit, An nomaliki o Mesir en og-eneplug wilibik waharihik lien ketia huli re, o it ap homi Israel on wereg ma etma o An nobahet wuruhupdeg An nobam wene kabog-duruk kamuhupmu re deta, ulug An den o kota misig eke momale ferihik fug, ne it ap homi An nomaliki melal-enepuk kamag ulug oho ap misig eke momale ferihik fug. Famen de ketia An den o Yerusalem anyo An nobam wene kabog-durukmu momale-ferihik. An nomaliki etma melal-enepuk karuhun ulug de hat Daud momal-hapihik, ulug endam TUHAN Haren an nakni Daud fam airoho sali hweag-itihin. Ne, Haren airoho sali hweag-itihin on anyo mundoho dip-deberihin mu, it ap homi Israel on enakni TUHAN Allah motdeg neg welamin!” ulug ebag.

⁵

⁶

⁷Airoho ebagdeg en nikangge at Salomo en uruk kwit de, “An nakni Daud en de o ap homi Israel on enakni TUHAN Allah anyo fam wene kabog-durukmu fahet wuruhuk ulug wenggelsi.

⁸Famen de TUHAN en at obam uruk kwit de, Hat hendama duhuk ulug berihin ale aire fano neg.

⁹Famen de O An nobahet on aire haren wiruhun de fug, ite hat hamloho en wit-nabuhu ulug hweag-itsi.

¹⁰Airoho hweag-itsi on anyo, an nakni obalmangge it ap homi Israel on fahet raja inatihik, ne an den neg o ap homi Israel on enakni TUHAN Allah fam wene kabog-durukmu anyo wirihi. Anggere At TUHAN en sali isi on anyo dip-debeheik.

¹¹Peti Sali anyo ilonggoma helep Allah nim it ap homi At omaliki Israel on nim sali wat-wat atfag on anyo yohwareg angge anyo welamag ulug de, O TUHAN Obam ilonggoma etma fouk deberihik,” ulug hweag-esebag.

¹²At Salomo en de o TUHAN Obam wirigmu en oluluk bul etano e bela perunggu on fam de, unggul ilihig inim, nunggulig inim de, 2,2 meter, ne lahabeg leko witfag on de 1,3 meter witfag. Airoho wiri febagdeg de it ap homi kabog-debag on anyo inil hanim Salomo e bela anyo fam lahabagdeg de, alukwe mezbah anyo furoho inatfag. At unduhukmu re it ap homi mundoho en inil hauk katfag. It inil kumureg kweleg etano at elenggen dimirebelug, enggik birenet leko bohol fil earoho lahabeg lit, aren somban uruk kwit de,

¹³

¹⁴“Nakni it ap homi Israel on enakni TUHAN Allah! Hat hag eke bohol fam inim kwenangma inim wereg fug! Haren sali irihin on anyo dip-debeheg, it ap homi Hat homaliki enenda abirangge fam hele holoho deheg, dipdoho deheg, durukmu Hat henda hundig-enepuk kahen ale anyo unug-neseheg, dirihin.

¹⁵Haren an nakni Daud fam sali waritihin on anyo mundoho dip-deberihin mu, an den yoho dihi ale su ohore Haren sali waritihn on ai neg.

¹⁶ An nakni fam haren sali warutuk kwit de, Hat hambiangma ondoho on en, haren duruk kahen hagdoho, An nawene melaleg anyo holoho neg duruk halug de, li mundoho-mundoho etma ap misig eke hat hambiangma on enit ap homi Israel on enobahet raja unduhuk wereg lit melal-enepuk karuhu, ulug hweag-itihin. It ap homi Israel on enakni TUHAN Allah, nakni, ketiare Haren hamingming angge an nakni Daud ai fam sali waritihin on mundoho etma dip debein.

¹⁷

¹⁸ Famen de, nakni Allah, Hat de ap homi enesahalimu o kwenangma suma demdoho welahen halereg a? Mun eleg. Bohol abirangge ohore Hat wereg lama obale higitdeg fug, ne o wene kabog-durukmu ulug an den wirihi on sure mun ebenaheg dot deg!

¹⁹TUHAN Allah nakni o, an de Hat hamingming angge! Famen de an den somban ihi on nim, heng habihi on nim hol-naplug onggo dipdoho nobahain.

²⁰ Haren o Hat fam wene kabog-durukmu ulug momale ferihin on au, nukoho inim, hup angge inim, hwalduk kamuk. Niren o su fil aik watlug somban hobam urukmu, Hat hebe bohol fam welahenma etman hesanggo hol-halug, an ninim, ne it ap homi Israel on Hat homaliki au inim, nenesiag hapelehapdoho nenobaharuk kamuk.

²¹

²²Ap eke hare amu on fam siag dehen ulug, obam hekip halug lahe at anyo en siag deheik fug ulug hombuk balukoho Hat hobam olman mezbah wereg ma eiya watlug ik waharuk halug de,

²³TUHAN nakni Hat hebe boholma etma wereg lit hol halug, nit hamingming angge nenawene ai kong-nesakiyug. It fano duruk on halug de lole feseruk kwit de, it siag duruk on halug de unggum og-esakiyug.

²⁴It Hat homaliki oma enesiag duruk onggo it enaselei on en enalong elehapdoho feserukmu, it enenda wat-dalug nikangge Hat nit nenakni TUHAN ulug leho hobahaukoho, Hat hobam wirigmu su watlug nenesiag hapelehapdoho nenobahain ulug somban uruk halug,

²⁵Hat hebe boholman hesanggo hol-enebiyug. Haren de it homaliki su enesiag hapelehapdoho feselug de, nikangge sombandoho og-eneplug o kwenang it inim, it enombasi inim og-esauihin mu suma og-eneplug manu.

²⁶Nenakni TUHAN boholma on, it homaliki su en Hat hobam kwasikdoho durukmu, unggum it enobam Haren osit bela-esa waharuk fug mu, it enesiag duruk on anyo fam en enenda aham dulug, Hat nenakni TUHAN ulug leho hobahaukoho Hat hakit hobam wirigmu suma watlug somban uruk halug de, Haren hol-enepuk kamuk.

²⁷Hole feselug de it Hat hamingming angge Israel enap ai enesiag elehapdoho feseruk kamuk. Ne, iren demdoho on neg duruk kamag ulug mamul-enebiyug. Nenakni TUHAN, it airoho debeselug neg de, o kwenang it homaliki su mundoho-mundoho enangge aruhu ulug og-esauihin on kwenang su fam osit belap-esa manu.

²⁸It Hat homaliki su enobam suma lahe, siburu obok lahakeg, ouk saha eheg, hol ahanhan on en enangge di angge su angge yaho on unggul wareheg, oluk-oluk angge en mel, bulue en mel, baleheg, ite it enaselei on en enowarik waheg, ouk en enowarik waheg, duruk en,

²⁹Hat hobam somban uruk halug de hesanggo hol-enebiyug. Ne, it homaliki Israel on su enesahalimu en eke enenda hesilduk kwit, enenggik earoho lahabeg Hat Hobam wirig fil deg lit somban uruk halug de,

³⁰Hat hebe boholma welahenma etman hesanggo holug enesiag hapelehapdoho feseiyug. Ap homi mundoho enendama deg alere we Hat neg holuk deg ma, it Hat homaliki o kwenang nit nenombasi fam og-esauihin mu su wereg lit, Hat hele holoho deheg, Hat halong bolug nenakoldoho welaheg, duruk kamuhuk en de,

³¹Haren ap homi enemu enobabut duruk ale domog onggo higitdoho debeseruk kamuk.

³²Hat hebe mun leho on welaheg, homamne humon welaheg, ne hundig-hundig let-enebukwag ulug deg laheg, deg lahen on ai fahet o yatman ap bohon misig eke hol-halug, O Hat hobam wirigmu hakit somban imin ulug waharuk halug,

³³Hat hebe boholma welahenma etman, aren somban uruk on ai hol-eneplug, heng-uruk angge ai og-umuk. Airoho duruk fam de, it ap homi mundoho o kwenangma suma wereg on anyo en, it ap homi homaliki Israel on su deg hagdoho Hat enoluk aheg, hele holoho deheg, duruk kamuhup. Ne, o an den hat hobam wene kabog-durukmu ulug witihikmu su enoluk amuhup.

³⁴Ne it Hat homaliki su Haren it henaselei on nim weim yabik lakiek, ulug mingming debeserukmu lalug, it enebe di kwe su kwe wereg lit, iren o kota Haren momaloho ferihin on su nim, ne o an den Hat hobahet witihik on su nim fam enorohole deg lit somban uruk halug de,

³⁵Hat hebe boholma etman it somban uruk on ai hesanggo hol-eneplug, it fil enalongap debeseruk kamuk.

³⁶Ap misig eke siag duruk eleg on eke wereg fug mu, it Hat homaliki Hat hobam siag durukmu, Hat hobam haro en it enaselei on en enalong elehapdoho fesoukwag ulug Hat hil forukmu, it aben dog ambiangma en sen-eneplug o yatma oho, horogma oho feseik laukmu,

³⁷iren somban uruk on ai Haren hol-enepuk kamuk. TUHAN nakni, o it feseik laukmu etman lahe, it enesiag fagdoho embeselug, Nit siag on deheg, kwasikdoho deheg, duruhuk, ulug somban uruk halug de, iren somban uruk on ai hesanggo hol-enebiyug.

³⁸O etma wereg lit it enenda ilonggoma etman dik-demdoho enesiag embeselug, o kota Haren nit nenombasi og-esauihin deg eneko ferihin mu ai fil inim, ne o Hat hobam wene kabog-durukmu an den wit-hitihik on au fil inim, enalukwe yihig lit somban hakit uruk halug de,

³⁹Hat hebe boholma welahenma etman, it somban uruk on ai hesanggo hol-eneplug, henda enebiyug. It homaliki ai enesiag mun hapelehapdoho feseiyug.

⁴⁰Nakni Allah o, ketia o dian niren somban Hat hobam uruk kahe on ai hesanggo holug, fubi-nenobahain.

⁴¹ Nakni TUHAN Allah! Ketiare hebe inatlug, Hat hebe homamne welahen ale anyo ahutdoho Peti Sali ai nim o Hat Hobam su kwik lalug mundoho-mundoho etma welamin. Ne, haren it imam en yabuk duruk on ai fam fanoap debesein, ne Haren it fam fano ale neg debeserukmu it homaliki mundoho enahayeg boruk kamuhup.

⁴²TUHAN Allah nenakni, ap raja Haren momaloho unduhuk ferihin on su embesouk fug. Ne, Haren hamingming angge Daud fam henda hundig deg lit welatihin ale anyo ebet hakin,” ulug somban ebag.