Read Ninia Yali 2 TAWARIKH 7 Bible Online

2 TAWARIKH 7 - Ninia Yali bible

2 TAWARIKH 7

¹ Raja Salomo anyo en mundoho somban ebagdeg duruk men de, indok boholma en wambik waharuk kwit, wam TUHAN obahet waroho yaldukmu febag on omano mundoho han nebag. Ne, TUHAN ombagbag seleg anyo re o TUHAN Obam wirig anyo fam hopo-ik watfag ma re,

²it imam omano o ilonggoma kwik la fug ale atfag.

³ Indok bohol fam en wambik waheg, TUHAN seleg ombagbag anyo TUHAN Obam wirig anyo fam hopo-ik waheg, durukmu it ap homi mundoho anyo en inil hebagdeg de, iren enelenggen enorohole belabeg sahan debelug de, At TUHAN mun fano on en enda hundig mundoho-mundoho nenepuk kwit wereg ma, ulug TUHAN mot-debag.

⁴Anyo mundoho debagdeg de at Raja Salomo inim, it ap homi holduk on mundoho anyo inim en de TUHAN obahet wam waroho og-etfag.

⁵Wam iren waroho og-etfag on aire, wam anggerang owam fahet de at Salomo en wam sapi 22.000 en og-etfag, ne domba re 120.000 en og-etfag. O wene kabog-durukmu anyo TUHAN og-utuk kwit, at Salomo inim, it ap homi holduk on inim de airoho debag ai.

⁶Airoho durukmu re it imam anyo re enobale it fahet ene febag ma etano unduhuk latfag; It enorohole furoho re it ap Lewi on de, at Daud en airoho duruk kamuhup ulug ebag aleroho re, enambinggong Raja Daud en hilinggebag on etmano kong-duruk kwit, suni re, “TUHAN enda hundig nenepuk on aire mundoho welaruhu on o i,” ulug uruk kwit TUHAN mot-duruk katfag. Ne, it ap homi holduk on omano enebe mundoho unduhuk wereg kweleg imam omano re bohweap trompet anyo fururuk katfag.

⁷At Salomo en mezbah perunggu on fam witfag on anyo re obale dotdegma wam abirangge etmano eta neg yaluk ale onggog atfag ma re, o wene kabog-durukmu witfag on anyo en ambe olohotma on lilimol anyo re at Salomo en TUHAN obahet eneko fesebag. Airoho og-etfagdeg de, aren gandum wam amuk mel yalduk on ulug omano mel, TUHAN enda ahayeg howag ulug yalduk on ulug omano mel, TUHAN en fanoap nenobahaukwag ulug heng duruk kwit yalduk on mel etma yal-etfag.

⁸Airoho debagdeg de anyo li em neg at Salomo inim, ap homi Israel on mundoho inim, Nukoho O Sabo anyo fahet nukoho sabiren kabog-debag. Nukoho ai fahet kabog-dukoho re it ap homi enebe o Hamat Kwe laukmu utara fil mag etlemano en de o Mesir huli-hulimu selatan fil erahamuno huli en kabog-dik watfag ma re ap homi enebe kabog humdeg latfag.

⁹Kabog dik watfagdeg de nukoho sabiren de mezbah TUHAN obahet witfag on anyo fahet kabog-duruk katfag, ne nukoho sabiren eke re Nukoho O Sabo anyo fahet kabog-duruk katfagdeg de, nukoho fotogdoho salim de, it debag on anyo mundoho sok latuk kwit hagdoho kabog-debag,

¹⁰Likia re tanggal 23 bulan sabit on wereg li re it ap homi omano enobam lowag ulug at Salomo en hweag-esebag ma, enobam lebag. Ne, iren de At TUHAN en At omaliki ap homi enunggul unuk Israel on fam inim, at Daud fam inim, Salomo fam inim, mun fano ale neg debag ai fam de, enahayeg beil lebag.

¹¹At Salomo en o wuruhuk ale ulug wenggelfag ale anyo higitdoho, o TUHAN Obam anyo mel, at raja onggwareg wereg anyo mel, ambiangma mun fanoroho neg wiri-febag ma re,

¹²o hup anggo nikangge TUHAN Salomo akit enam-aik watfagdeg, TUHAN en hweag-utuk kwit de, “Haren somban ehen on aire An mundoho nesanggo holihi, ne o sure eneko An nobahet wam di angge su angge waroho yal-nirik waharukmu ulug An hwilihi.

¹³It ap homi An nomaliki su siag duruk ale en An den lahe osit belabik wam fug angge welaheg, eneyabukmu yaho angge etma mundoho eleg amag ulug bulue mondorik waheg, ouk amben sangdoho wauk on mondorik waheg, duruk en,

¹⁴it An nomaliki An nunuk yiko uruk on etma enenda sebele fahat deheg, enesiag embeseheg, dulug somban An nakit ik waharuk halug de, boholma en iren uruk on ai An nesanggo holduk karuhuk. Holug de An den it enesiag napelehapdoho feseheg, it enobam enanggwenang fam di angge su angge mun werehap debeheg, duhuk.

¹⁵O An nobam su fahet An den fureberuk kwit welaheg, suman somban uruk on an nesanggo holeg laheg, duruk karuhuk.

¹⁶O suma re An den, It ap homi en wene li mundoho-mundoho fahet kabog-duruk kamuhupmu, ulug momaldihikdeg eneko ferihik mu re, mundoho aire An den duruk karuhuk. Li mundoho-mundoho etma fam de An den fureberuk kaheg, hwalduk kaheg, duruk karuhuk.

¹⁷At hakni Daud en duruk katsi hagdoho, haroho, An nenda boruk ale neg deheg, An nawene melaleg diroho diyug suroho diyug ulug An den irihik on anyo holoho deheg, duruk karuhun halug de,

¹⁸ An den hat hakni Daud fam sali warutuk kwit, Hat hambiangma on de hundig-hundig it ap homi Israel on fahet raja inatuk kamuhup, ulug waritihik on anyo dipdoho debehuk.

¹⁹Famen de hat inim it ap homi homaliki holduk on etma inim, An nawene melaleg wereg on anyo sahaloho embeselug kembu fam en allah ap debelug apne wauk on omano fam apne wauk kamuhup halug de,

²⁰o kwenang hit og-hesauihik mu su en hit henebe wilibi henobahakuk. Ne, o wene An nobahet kabog-duruk kamuhupmu ulug An den katukdoho ferihik mu su embeselug lahuk. Airoho duhukmu re o di kwe su kwe en de o su fahet unuk siahapdoho feheg, unda yako belabeheg, duruk kamuhup.

²¹Ketiare O wene kabog-durukmu su fahet de mun along bolug leho foruk, famen de eta li em ap homi kwe etmano lauk on en inil halug de, Yaho, o su mel, kwenang suma mel, fam aure TUHAN en de nunggwelug debag? ulug yande-fouk duruk kamuhup.

²²Airoho yande-fouk durukmu re ap en uruk kwit de, Iren enakni TUHAN Allah enambu-enombasi o Mesir en og-eneplug wilibik wahasi on anyo embeseswareg, iren ilah kembu on omano fam hele holoho duruk kamuhuk, ulug sali watswareg apne wag lauk en. Ai fam de anggin on su TUHAN en it fam feik wahasi su, uruk kamuhup,” ulug hweag-etfag.