Read Ninia Yali 2 TAWARIKH 8 Bible Online

2 TAWARIKH 8 - Ninia Yali bible

2 TAWARIKH 8

¹Salomo en de O TUHAN Obam inim, at raja onggwareg ebe wereg ma inim de 20 tahun fam witfag.

²Raja Hiram en o kota og-etfag ma omano oho nikangge witfagdeg it ap homi Israel on etma welamag ulug hweag-esebag.

³Aren de o Hamat mel, Zoba mel, deleheg,

⁴o leimu eke kota unuk Tadmor anyo omamne debeheg, debagdeg de di angge su angge foukdoho wereg ma ulug o Hamat etma witfag.

⁵O kota Bet-Horon emberim fil on mel, Bet-Horon apma fil on mel, de fak angge omamne humon fam nikangge o kota sokole mel e ninggulig hum angge dag buroho witfag.

⁶Ai en de aren nikangge o kota Baalat anyo nikangge wireheg, o kota mundoho di angge su angge foukdoho forukmu etmano wireheg, kota wam sapi en lisulug laukmu dog yapil lauk katfag angge kereta mel, wam kuda mel, indip wereg ma anyo wireheg, debag. Aren o Yerusalem kwe mel, Libanon kwe mel, wilayah at apma welatfag kwe mel, wuruhuk ulug enda wenggelfag on anyo mundoho witil lebag.

⁷It ap homi enunggul unuk Kanaan on enambiangma en ondoho on, Het enap, Amori enap, Feris enap, Hewi enap, Yebus enap mel, it Israel enap en o kwenang etma fam kwik lauk kwit mundoho enowatfag fug on omano re at Salomo en ele omamne fam hweag-esauk kweleg yabuk duruk kamag ulug kwelap-enepfag. Iren ondohoma on de ketia huli en de it Israel on enamingming angge atuk kwit neg wereg.

⁹It ap homi Israel on de yabuk ele omamne fam dukwag ulug hweag-esa fug anggere ite ap sehen foroho on leho on welaheg, it enowesi perwira atlug welaheg, kereta emberimmu kulug dog apil lauk on anyo melal-enepuk kamag ulug welaheg, ne it kuda emberimmu lauk kamag ulug tentara welaheg dukwag ulug fesebag.

¹⁰Ne, it ap yabuk enele omamne fam melal-enepuk kweleg di wireheg, su wireheg, duruk omano hag duruk kwit welatfag enap ai fahet hwal-enepuk kamag ulug de ap enebe pegawai 250 en fesebag.

¹¹At Salomo en enda wenggel-hauk kwit de, “It ap homi Israel on enowe Raja Daud welatfag kwe mundoho etma re, Peti Sali anyo foroho latsi mu obale mun enegma anggere, an nohwe re Daud obam olma oma welatmisi fug,” ulug wenggelfagdeg de at Salomo en ohwe hun raja Mesir on ahaloho oho latfag on anyo o Daud obam kota etmano en walug de o aren ohwe ai fahet witsimu etmano feik lebag.

¹² At Musa en wene melaleg balfag on anyo fam higitdoho re nukoho lohon etano deg aleroho wam watuk kamuhup ulug ebag ma re: Nukoho Sabat salim fahet inim, nukoho Bigalem Keron enam atuk mu fahet inim, nukoho tahun misig fam misig salim kabog-duruk katfag on fahet inim, nukoho Roti Fituk Angge Fam Wirig Eleg angge nauk salim fahet inim, Nukoho Anggen Yihig Balduk salim fahet inim, Nukoho O Sabo fahet inim, At Salomo en o TUHAN Obam olohotma etano TUHAN fahet waroho yal-utuk mu mezbah witfag angge fam anyo wam waroho yal-etfag.

¹⁴Airoho debebagdeg de at akni Daud en wene melaleg hweag-etfag aleroho re it ap imam omano en yabuk nukoho hundig-hundig duruk on fahet inim, it ap Lewi enap en suni fam TUHAN unuk mot-deheg, it imam en wene kabog-duruk kwit durukmu omano let-enebeheg, duruk kamag ulug yohwandoho fesebag. Ne, ai en de at Daud Allah amingming angge anyo en wene diroho suroho ulug ebag ale higitdoho re it ap o TUHAN Obam wirig on anyo fam kahaleg wereg on ulug anyo re o sokole kwik lauk ale etano domog yohwan heheg feseil lebag.

¹⁵It imam etmano en inim, it Lewi enap en inim o sum anggen forukmu gudang anyo fahet diroho duruk kamuhup ulug at Daud en enegdoho hweag-esebag on anyo re iren mun higitdoho furebelug duruk katfag.

¹⁶Airoho debag huli ai en de at Salomo en o wuruhuk ale ulug wenggelfag on anyo, helep oboule ket febag lien, o TUHAN Obam anyo ebe mundoho witfag huli aire mun fanoroho witfag.

¹⁷Airoho debebagdeg de at Salomo anyo o Edom en ik laut unggul durukmu, o unuk Agaba kapal etma kwik waharukmu o kota wirig latfag on o Ezion-Geber mel, Elot mel, etma fam lebag.

¹⁸At airoho lebagdeg durukmu re hun Raja Hiram anyo en de at Hiram onggwareg autsi en kapal walug noruk on mel, it kapal ai fam wereg lit dil noruk ale mun enoluk-benoluk deg enap mel, akit mondorik watfag. Mondorik watfag ma re at Salomo autsi mel de o Ofir lebagdeg de etman emas anggin de 15.000 kilogram deg angge walug Salomo akit watfag.