Read Ninia Yali EZRA 1 Bible Online

EZRA 1 - Ninia Yali bible

EZRA 1

¹ TUHAN en duhuk ale ulug Nabi Yeremia fene en ebag ale anyo TUHAN en dimin ulug de, at Kores anyo it ap homi Persia on fahet raja inatfagdeg melal-enepuk li em tahun keram on anyo fam de, at Kores en wene melaleg eke baloho wilibukwag ulug TUHAN en endama debag. Wene melaleg anyo it ap homi o aren melal-enepuk kwe wereg on etmano fam hweag-esaukmu holukwag ulug melaloho wilipfag on de ele diroho ebag,

² “An Kores it ap homi Persia on[1] enobahet raja unduhuk welahi on anyo en nawene melaleg de su. At TUHAN Allah ebe boholma leho wereg on anyo en, di ap homi su ap homi o kwenangma suma wereg on enobahet nalong wereg lit leho welamag ulug an raja unduhuk nobahasireg, de O At Obam it ap homi Yehuda on wereg ma Yerusalem anyo wurukwag ulug unduhuk nobahasi.

³We At TUHAN Allah en neg hit At omaliki on aire mundoho hwal-henepuk kweleg henobam Yerusalem etma lahupdeg o TUHAN it ap homi Israel on enakni Allah o Yerusalem etma wereg on anyo Obam ai wirik lakiyug.

⁴Hit henebe hele waroho waharuhupdeg welahepma suman hit ap homi Allah omaliki welahep on anyo misig eke en, ‘Nobam laukmu fahet let nelep aho,’ boruk halug de, it ap homi o foma fil wereg on etman at ai let-hauk kamag. Iren de ap ai perak, emas mel, siburu kwemangge mel, asum enggan walug lauk on fahet wam sum enggan harulug lauk on mel, O TUHAN Obam Yerusalem anyo fahet ulug foruk on mel, og-utuk kamuhup,” ulug wene wilipfag.

⁵Wene airoho wilipi laukem de it ap kepala enunggul unuk Yehuda on mel, Benyamin on mel, it imam mel, Lewi enap mel, enobam lowag ulug Allah en enendama debag on etmano re, nenobam Yerusalem lahukdeg TUHAN Obam anyo wirik lahuk ulug fik-fouk duruk katfag.

⁶Fouk durukmu re it ap homi enaluluk kwe wereg on etmano en de di angge su angge no perak, emas, mel, fam wirig angge omano mel, siburu kwemangge fahet ulug mel, no enasum enggan lahaplug walug lauk on mel, enangge di angge su angge fomane mel, O TUHAN Obam anyo fahet ulug febag on mel, let-enepfag.

⁷At Kores en de waruk mel, mangkuk mel, atam o Yerusalem TUHAN Obam wirigmu etmano en no etma fam duruk katfag angge, famen at Raja Nebukadnezar en delfagdeg walug aren anggembu dewa omano fahet walug lebagdeg o kembu apne waukmu etmano febag on etmano oho wilibi fesik watfag.

⁸Etmano fahet dukwag ulug de at Raja Kores anyo en de hun Mitredat kerajaan fam etma bendahara welatfag ahun anyo en dukwag ulug og-etfag ma, at Mitredat anyo en de di angge su angge etmano unuk bal heheg de hun Sesbazar o Yehuda fam etma gubernur unduhuk latfag ahun anyo fahet febag.

⁹Di angge su angge ai unuk bal heheg febag on de ebe su: on fam hilinggig anggeobahet duruk kwit neg wauk katfag anggere — 30 en on fam hilinggig anggeobahet duruk kwit neg wauk katfag anggere — 1.000 en amu on de — 29 en doronon fam hilinggig anggere — 30 en doronfam hilinggig on de — 410 en Nin foma amu on de — 1.000 en

¹¹Emas et perak et nin amu on etmat seberoho abiranggere 5.400 en mondotfag. No etma abiranggere at Sesbazar anyo o Babel sabu hetdoho welatfag ma etmano en hun at inim, it ap homi fomane inim, o Yerusalem lauk kwit walug lebag.