Read Ninia Yali EZRA 10 Bible Online

EZRA 10 - Ninia Yali bible

EZRA 10

¹Ai ulug at Ezra anyo TUHAN Obam olohotma etano en enesiag fagdoho oba yatuk kwit somban uruk kweleg de, it ap homi Israel on anyo enebe humdoho, ap et, homi et, omalik doron et, kabog-dik watfagdeg de at ebe maseroho bul kwelabeg lit de oba enele hum fam yatuk katfag.

²Airoho yatuk mu re at hun Yehiel unggul unuk Elam on amloho Sekhanya anyo en Ezra fam uruk kwit de, “Niren ap homi enunggul unuk dagma on nim og-og atuhuk ai fam de TUHAN fam siag duruhuk, famen de it ap homi Israel on fahet de duk ale eke wereg.

³Nit de haren komo ale hweag-nesamihin on mel, it Allah wene melaleg hweag-nesauk on anyo along bolug duruk enap en mel, komo nenepluhup on etma niren higitdoho neg deheg, At Allah en wene melaleg diroho diyug suroho diyug ulug wereg on anyo holoho deheg, duhuk en de, homi etma enomalik et angge muko wilip-enebul ulug, Allah il hanim hombuk balukohon.

⁴Ebere haren neg airoho nenepil lamihin, ne nit de hat durukmu let-hapul, anggere hele wat-warale uk fug, we hele ningdoho neg uruk men mundoho elehap debeiyug,” ulug hweag-nitsi.

⁵Airoho isimu re at Ezra en it homi dagma on etmano enomalik nim muko wilibi fesemin ulug on anyo indip disireg aren it imam on kepala mel, it Lewi enap mel, it ap homi Israel on en fomane mel, fam de at Sekhanya en eheik on dul ulug hombuk baliek, ulug hweag-esauihik.

⁶Airoho hweag-esauihik mu re it anyo mundoho hombuk balswareg de at Ezra anyo o TUHAN Obam olohotma etmano en lebagdeg de hun Elyasib amloho Yohanan wereg ma etmano kwik lebagdeg de, it ap homi hele waroho hwik-enebik lebag on anyo en debag ale ai fahet wenggelduk kwit de endama mun siag duruk en de siburu mel, ik mel, na fug angge etma hup[16] nohoruk katfag.

⁷Airoho dulug de it ap homi hele waroho hwik-enebik lebagman enobam watfag on etmano o Yerusalem kabog-dik wamag ulug de wene eke unduhuk folug lisu baloho it ap homi Yerusalem on mel, Yehuda on mel, wereg kwe etmano mondotuk kwit de,

⁸nukoho henahan eiya fam neg ap misig eke waruhu fug on aire angge di angge su angge mundoho del dalug de at aire ap homi niron wereg fug bohup. Ulug de lisu baleg anyo it holduk on enowesi melal-enepuk on etmano en eneg angge enenggik ahalue folug mondotfag.

⁹Bigalem soho angge tanggal 20 wereg kweleg nukoho henahan welatfagdeg anyo re it ap neg o it Benyamin on wereg kwe en inim, it Yehuda on wereg kwe en inim, o Yerusalem kabog-dik, watfagdeg de o TUHAN Obam wirigmu bumbukmu etmano kabog-dik watfag. Kabog dik watfag man de eta li em de osit humon wamburuk kweleg famen de wene ai mun leho on fahet kabog-debag ma ne osit en oho o hol neg atfag ma re ap homi enebe homombuk ilik hauk kwit wereg latfag.

¹⁰Airoho wereg ma re at Ezra anyo inatfagdeg de it enobam ele uruk katfag. Ne, aren uruk kwit de, “Hiren homi enunggul unuk dagma on og-enepuhup ai fam de hiren ap homi Israel on fam siag eke nim dopno deberuhup deg hit mun siag duruhup.

¹¹Aireg ma re At TUHAN Allah nit nenambu-nenombasi en apne wauk katswa on ai fam henesiag fag-dulug de, At endama ahayeg boruk ale on neg duruk kamek. It ap homi dagma on en nit nenanggwenang su fam wereg on etma re minggit dalug de, henohwesi enunggul unuk dagma on famen og-enepuhup on etma re muko wilibi feseiyug,” ulug hweag-esebag.

¹²Airoho ebag ma re it ap homi etmano en enele fano fam de, “Nit de haren komo nenebehen ai hagdoho neg dul,” ebag.

¹³Airoho ebagdeg en iren eke uruk kwit de, “Ai famen de nit nenebe suma kabog-dik wahe on de humdeg, ne osit ohore mun humon naukmu re nit nenebe osit fam dagma unduhuk lam fug ale nenepuk. Nenesiag ai fam de nit nenebe humdoho en duruhukmu re, wene su nukoho misig, biren fam ulug elehap duk fug alereg.

¹⁴Anggere wene su fahet nit Allah en olok nenobam fohu aire fug anggere, it ap nenowesi melal-nenepuk on neg de wene ai balduk kwit o Yerusalem suma welamag. Ne, nit nenobam kota etman ap nenohwesi dagma homi og-enusug halug de, nukoho ene fohup aleroho it nenowesi melal-nenepuk on mel, it o kota etma domog ap hakim wene katukdoho balduk on wereg on etmano mel, seberoho wamuhuk en de, airoho diek ulug hweag-nesakiek,” ebag.

¹⁵Ai ebag ma re wene airoho ehesa on aire fano neg bolug ap eke an nenda anggin behi ulug ebag fug, famen de at Yonatan hun Asael amloho anyo ha, Yahzeya hun Tikwa amloho anyo ha, neg de it ap Lewi on enebe biren, Mesulam nim Sabetai nim etano en enendama kwelapfag ma re, airoho deheha fug alereg ulug ebag.

¹⁶It ap homi hele waroho feseik lebagman watfag on etmano en de wene duhuk ale ulug ebag on anyo higitdoho duruk ale en de, at Imam Ezra en de ap homi enunggul unuk domog etmano en kepala momal-enepil[17] lebagdeg de it enunuk bal-heheg febag. Airebelug de bigalem 10 on fam tanggal misig wereg kweleg wene anyo bilinggukoho kabog-debag.

¹⁷Kabog debagdeg duruk men neg de bigalem henahan ombolim on fam neg de it ap en homi enunggul unuk dagma on og-enepfag on anyo mundoho enewene bilinggoho elehap dil lebag.

¹⁸It enohwesi homi enunggul unuk dag fil on og-enusug latfag on anyo enunuk baleg de su: It ap imam de enunggul unuk domog heheg baleg: Enunggul unuk Yesua on ori nim, Yozadak omaliki: Maaseya, Eliezer, Yarib, Gedalya inim.

¹⁹Iren de, nit nenohwesi embesehuk ulug enameg fag-debagdeg de, it enesiag elehapdoho ulug de domba yohombuk eke waroho yalfag.

²⁰Enunggul unuk Imer on en de: Hanani nim Zebaja nim.

²¹Enunggul unuk Harim on en de: Maaseya, Elia, Semaya, Yehiel, Uzia nim.

²²Unggul unuk Pasyhur on en de: Elyoenai, Maaseya, Ismael, Netaneel, Yozabad, Elasa nim.

²³It ap Lewi on en de: Yozabad, Simei, Kelaya, (unuk eke Kelita uruk katfag), Petahya, Yuda, Eliezer nim.

²⁴It suni wilipuk on en de: Elyasib It o TUHAN Obam wirig on kurukmu sokolma kahaleg wereg on en de: Salum, Telem, Uri nim.

²⁵It ap homi Israel on foman de: Unggul unuk Paros en de: Ramya, Yezia, Malkia, Miyamin, Eleazar, Malkia, Benaya inim.

²⁶Unggul unuk Elam on en de: Matanya, Zakharia, Yehiel, Abdi, Yeremot, Elia inim.

²⁷Unggul unuk Zatu on en de: Elyoenai, Elyasib, Matanya, Yeremot, Zabad, Aziza nim.

²⁸Unggul unuk Bebai on en de: Yohanan, Hananya, Zabai, Atlai inim.

²⁹Unggul unuk Bani on en de: Mesulam, Malukh, Adaya, Yasub, Seal, Yeramot nim.

³⁰Unggul unuk Pahat-Moab on en de: Adna, Kelal, Benaya, Maaseya, Matanya, Bezaleel, Binui, Manasye.

³¹Unggul unuk Harim on en de: Eliezer, Yisia, Malkia, Semaya, Simeon, Benyamin, Malukh, Semarya nim.

³³Unggul unuk Hasum on en de: Matnai, Matata, Zabad, Elifelet, Yeremai, Manasye, Simei nim.

³⁴Unggul unuk Bani on en de: Maadai, Amram, Uel, Benaya, Bedeya, Keluhu, Wanya, Meremot, Elyasib, Matanya, Matnai, Yaasai nim.

³⁸Unggul unuk Binui on en de: Simei, Selemya, Natan, Adaya, Makhnadbai, Sasai, Sarai, Azareel, Selemya, Semarya, Salum, Amarya, Yusuf nim.

⁴³Unggul unuk Nebo on en de: Yeiel, Matica, Zabad, Zebina, Yadai, Yoel, Benaya.

⁴⁴It ap enebe mundoho ai en de homi enunggul unuk dag fil on og-enepfag ma re, homi omano mundoho fotog isil lebagdeg de enomaliki inim muko wilibi fesebag.