Read Ninia Yali EZRA 3 Bible Online

EZRA 3 - Ninia Yali bible

EZRA 3

¹It ap homi anyo re airoho enobam hwilil lebagdeg de, bigalem sabit angge fam neg de it ap homi Israel on anyo enobam kota domog mundoho yug ail lebag. Yug atfagdeg bigalem anyo tanggal misig wereg kweleg de, at Yesua hun Yozadak amloho nim,

² ori imam fomane omano inim, at Zerubabel hun Sealtiel amloho anyo ori autsi nim, en de it ap homi Israel on enakni Allah en a mezbah anyo nikangge witfag. Airoho debagdeg ai fam de iren wene melaleg diroho diyug suroho diyug ulug melaloho buku at Allah amingming angge Musa anyo en wene melaleg anyo fam baleg ale anyo higitdoho re, mezbah anyo emberimmu wam waroho yaldul ulug o Yerusalem kabog-dik lebag.

³ It anyo en de it ap homi kwenang etma fam welatfag on fahet de enendama enakol boruk kwit en de,[4] iren mezbah wam waroho yaldukmu anyo nikangge atam wirig latfag ma obalma etano witfagdeg de, iren wam waroho hubet inim hupmu inim TUHAN endama ahayeg howag ulug yal utuk ale indip debag.

⁴ Airebelug de iren nikale wene melaleg wereg ale higitdoho re Nukoho O Sabo anyo fahet wene kabogdoho mot-duruk kwit de, nukoho ai fam wam waroho yal-umuhuk ulug foruk katfag on etmano yalfag.

⁵ Ai en de iren nikangge mun fanoroho wam yal angge yaleheg, Nukoho bigalem Keron enam atuk mu mot-duruk kwit wam waroho yaleheg, nukoho amu on fam TUHAN apne waul ulug kabog-duruk katfag on etmano fam kabog-duruk kwit waroho yaleheg, duruk katfag. Ai en de iren wam foma enenda fano en TUHAN obahet waroho yalduk katfag.

⁶O TUHAN Obam ebe owan obalma wutuk eleg kweleg famen de, it ap homi anyo wam TUHAN obahet waroho yalduk ale anyo, bigalem sabit angge tanggal misig wereg kweleg indip debag.

⁷At Kores raja o Persia fam unduhuk latfag ahun anyo en it ap homi Yehuda on en yabuk dukwag ulug hweag-esebag ale higitdoho, it ap homi omano en de ap tukang helep fam wutuk on mel, e fam wutuk on mel, o wutuk mu onggo bal-enebuhuk en ulug de uang kabog deheg, it ap homi o kota Tirus mel Sidon mel, fam wereg on omano fam e lak o Libanon wereg on omano inim degan dul ulug, iren siburu mel, ik nauk on mel, e zaitun ahalue mel, o kota etma fam mondoreheg, debag. Mondotfag ma re e omano walug de ik laut ahum emberim fene en de walug o Yafo wilibik waharuk katfag.

⁸Airoho debelug de it ap homi Israel on o Yerusalem watfag li en tahun bireneg on fam bigalem bireneg on wereg kweleg, iren TUHAN Obam anyo wutuk ale indip debag. Airoho indip debagdeg wutuk mu re it ap Zerubabel mel, Yesua mel, it enori enunggul unuk misig on mel, it imam-imam mel, it Lewi enap mel, we it ap sabu hetdoho feseik lebagman enobam watfag on etmano mundoho re ininim yabuk ai duruk katfag. Ne, it Lewi enap famen enebe umur 20 tahun debagdeg emberim fil deg on anyo re o TUHAN Obam wutuk kwit yabuk duruk on ai fahet inil wereg lit kahaleg lamag ulug fesebag.

⁹Airoho fesebag ma re ap Lewi on hun Yesua anyo mel, at ori autsi omaliki omano mel, hun Kadmiel anyo omaliki (enunggul unuk Hodawya)[5] on etmano mel, O TUHAN Obam wutuk on anyo fahet enebe seberoho kahaleg lit inil welatfag. It ai durukmu re it Lewi enap famen de eke unggul unuk enggikdoho deg on Henadad on anyo mel en let-enepuk katfag.

¹⁰ O TUHAN obam anyo it yabuk wutuk enap omano en helep oboule forukmu re it ap imam omano re enasum yaron jubah anyo wandeg lit de enenggikmu bohweap trompet anyo seneko enobale domog unduhuk latfag. Ne, it ap Lewi on en enunggul unuk Asaf on anyo re waruk bosie on ele doleleng uruk angge ebe doron enenggikmu seneko unduhuk lit de, iren suni TUHAN mot-duruk suni, at Raja Daud wereg li em, suni diroho wilipuk kamuhup ulug awene febag ale higitdoho wilipuk katfag.

¹¹ Ne, it ap homi holduk on humdoho anyo re TUHAN obahet motdeg suni uruk kwit de, suni ele fotogdoho urukmu etano up sahal-fahaloho uruk katfag on de, suni ebe diroho, “TUHAN aire mun fano on deg lit, Aren enda hundig nit ap homi Israel on fam nenepuk on aire mundoho-mundoho welaruhu on,” ulug uruk katfag. It anyo suni airoho uruk kweleg o TUHAN Obam anyo fahet helep oboule anyo mundoho febag ma re it ap homi anyo enahayeg en amit-mit sup uruk katfag.

¹²It ap imam inim, it Lewi enap inim, it ap enunggul unuk enggikdoho on etmano fahet kepala welatfag on inim, en enebe mundoho sobal atfag on etmano en de, o TUHAN Obam atam wirig latfag on anyo inil hauk katfag ma re, iren o TUHAN Obam keron ai fahet helep oboule foruk kweleg de oba enele omamneroho yatuk katfag. Famen de ap homi fomane etma kabog-dik lebag on omano re enaheyeg en enanggiluk duruk katfag,

¹³Ne, it enele hum fam oba yi-ye uruk on de o yitmi-yatman oho holduk katfag. Ai fam de ap oba yatuk on de da, ne it enahayeg en duruk on de da ulug enegdoho ha fug alereg latfag.