Read Ninia Yali EZRA 4 Bible Online

EZRA 4 - Ninia Yali bible

EZRA 4

¹It ap homi Yehuda on mel, Benyamin on mel, eneselei on etmano en holduk men de, ‘It ap homi sabu hetdoho hwik enebik lebag on anyo watfagdeg o it ap homi Israel enakni TUHAN Allah Obam anyo wutuk,’ urukmu enesanggo holfag.

² Ai fam de iren hun Zerubabel inim, it ap homi enunggul unuk domog omano fahet kepala welatfag on omano inim, fam uruk kwit de, “Nit de hun Esar-Hadon raja Asyur on anyo en og-neneplug o suma wahasi huli en niren Allah obam wam waroho yal-utuk kahema re, nenori hiren duruk kahep hagdoho, nit inim nenori hit henakni Allah ai fam wene kabog-duruk kamuhuk en de, o TUHAN Obam nininim wurukohon fano iek,” ulug wene hweag-esebag.

³Famen de at Zerubabel inim, Yesua inim, it kepala domog welatfag on anyo inim en wene onggo uruk kwit de, “Nit de hun Kores raja Persia fam wereg on anyo en wene melaleg hweag-nesebag ale higitdoho o nenemu wuruhuk. Ne, nit nenakni TUHAN Allah obahet Obam wuruhuk on aire hiren let-neneplep ulug nit anggoloreg lahe fug,” ulug ebag.

⁴Airoho ebag ma re it ap homi o atam en etma welatfag on anyo en de o wutuk on anyo bale foukwag ulug de it ap homi Yahudi on etmano enakolap kwelap-enebeheg, koap enebeheg, duruk katfag.

⁵It Yahudi on en yabuk duhuk ulug wene melalfagdeg duruk katfag on ai suhwi amag ulug de, it ap homi omano en de ap Pemerintah Persia fam yabuk lehoma duruk on omano onggo bal-enebik lauk katfag. At Kores raja wereg kweleg anyo airoho neg duruk men de at Darius[6] raja inatfag.

⁶ At Ahasyweros raja inatfagdeg melal-enepuk li em de it ap homi Yerusalem wereg on mel, Yehuda on mel, eneselei on omano en de surat eke wene enobam dopno esauk kwit balfag.

⁷Ai hagdoho re at Artahsasta o Persia fam Kaisar unduhuk wereg lit melal-enepuk li em oho, it hun Bilsam mel, Mitredat mel, Tabeel mel, it enori fomane mel, en nikale surat raja fam balfag. Iren surat ebere it Aram[7] enele fam balfag ma re bilinggukoho[8] re eke en aham duruk kweleg bilingguruk katfag.

⁸Ekere it hun Gubernur Rehum nim, o Propinsi ai fahet lisu balduk on welatfag on hun Simsai anyo nim, it enori foma wene katukdoho bilingguruk enap hakim omano mel, it ap yabuk o Persia ai apma wereg lit duruk enap, o Erekh mel, Babel mel, Susan mel, o Elam kwenang fam mel, welatfag on etmano en mel,

¹⁰it ap homi enunggul unuk amu on at Asnapar Mun Leho on anyo en mun feleleng eneplug lebagdeg o kota Samaria mel, o kota-kota Ik Efrat en mo obuk uruk fil Propinsi su on fam welamek ulug hweag-esebag enap omano en inim, enele seberoho maho folug de, surat eke o Yerusalem deg ale fahet baloho hun Artahsasta akit mondorik lebag.

¹¹Surat ai fam de elere diroho baleg latfag, “Hun Raja Artahsasta nenakni, nit hamingming angge o Efrat en foma mo obuk uruk fil welahe on anyo en, dang hapuk kahe.

¹²Hun nenakni hat holuk amag, it ap homi Yahudi on hun haren melal-enepuk kahenman wilayah amu kwe etmano embeselug o Yerusalem aik lausareg ketia wereg lit o kota mun siag on hun hat hele sahaloho neg duruk on anyo obalma wurukoho duruk. Elehet fak lehet de iren mundoho wutswa anggere, horog ketia neg mun fotog dukohoreg.

¹³Ne, iren kota ai demdoho wiri fohupdeg elehet fak ai mel mundoho unduhuk fohup dehen a, it ap homi ai en kwenang onggo foruk on anyo feik waharuk ale enerim duhup lit deg, ne airoho duhupmen de uang kerajaan su fam kwik waharuk kwit neg wereg on ai doraik lahu lit deg.

¹⁴Nenakni nit de hun haren nenepuk kahen ale fahet humdeg ma re, hun hat hibil maben aruhu mu hahuk aire nenerim en ulug wene mondorik wahe anggere,

¹⁵hun hat hombasi en lisu baloho foruk katfag on omano fam kumu howag ulug hweag-esakiyug. Lisu ebe baloho wereg on ai fam en neg de, o kota Yerusalem enap etma re o endam et angge mun enele sahalduk kwit it raja mel, it o propinsi fam enunuk bogdeg unduhuk wereg latfag on etmano mel, hundig siahapdoho neg feseruk katfag ale ai baleg laruhu mu holuk aruhu. Ap homi o ai fam wereg on etma re melal-enebuk ale et mun nong-hong deg. Ai fam de o kota ai mun al bereloho siag atfag ai.

¹⁶Aireg ma re, niren boruk kwit de, iren lahe o kota nikangge wireheg, ne elehet fak omano mundoho undureheg, duhup halug de hun haren it ap homi propinsi Efrat Barat fil wereg on aure hwal-enebuk fug ale aruhu ai demdoho boruk kahe,” ulug mondotfag.

¹⁷Airoho mondotfag ma re at raja en de onggo diroho su baloho mondorik watfag, “Hun Gubernur Rehum inim, it propinsi etma fahet lisu balduk on Simsai inim, hit henori foma o Samaria mel, o kota amu kwe, propinsi Efrat Barat [9] fam welahep on etmano, dang henepuk kahi.

¹⁸Nori hiren surat baloho monde nobahaik waharuhup on aire mundoho aham duswareg an nil hanim bilinggusa.

¹⁹Airoho bilinggusama re, an nele amingming fam de mundoho indip hera-dukwag ulug hweag-esauihik mu, hera duruk men de, demdoho it ap homi Yerusalem on aire o endam et angge ap raja unduhuk welatswa on etmano enalong wereg on anyo enenda osoko debeseheg, ne ap homi iron aire enebe humdoho en enele sahale feheg, wene siag on kwelabeheg, duruk katswa ale anyo enam atsi.

²⁰Endam etma ap raja mun leho on etma unduhuk wereg lit o propinsi Efrat barat fil on anyo it enomamne apma wereg ma iren kwenang onggo feheg, nit it enapma welahereg ulug raja fam onggo feik laheg, duruk katfag.

²¹Aireg ma re o kota ai nikangge obalma wiruk fug angge weregman neg an den wene melaleg amu on eke wilibuhuk huli en aruhu en de, it ap ai en yabuk duruk on ai embesoukwagdoho ulug wene melaleg wilibi feiyug.

²²An nibil hum ale maben ahi hano re an den diek ulug melale henobahaki on sure folo-foloroho neg diyug!” ulug mondorik watfag.

²³At Artahsasta en surat mondotfag on anyo it Rehum mel, Simsai mel, it enori omano mel, fam biling-esebag ma re, it ap anyo o Yerusalem lebagdeg de, it ap homi Yahudi on en o kota nikangge wutuk katfag on anyo enomamne fam bogap enebik lebag.

²⁴ Bogap debebag ma re o TUHAN Obam witul ulug wituk on anyo re embeselug weregman neg de at Darius it ap homi Persia on fahet raja inatfagdeg melal-enepuk men neg tahun bireneg on atfag.