Read Ninia Yali EZRA 5 Bible Online

EZRA 5 - Ninia Yali bible

EZRA 5

¹ Eta li em de ap nabi enebe biren angge, hun Hagai nim, Zakharia hun Ido amloho nim etano Allah wene it ap homi Israel on enakni anyo unuk fam ap homi Yahudi on o Yehuda fam wereg on mel, o Yerusalem fam wereg on mel, fam wene hweag-esauk katfag.

² Airoho hweag-esaukmu re it ap nabi biren etano en uruk ale anyo hol halug de, hun Sealtiel amloho Zerubabel anyo ha, hun Yozadak amloho Yesua anyo ha, o TUHAN Obam Yerusalem anyo it ap nabi biren etano nim letdoho wutuk katfag.

³Famen de at gubernur propinsi Efrat barat anyo nim, Syetar-Boznai nim, at ori nim, folo-folo o Yerusalem watfagdeg it ap homi Yahudi on etmano hein og-esauk kwit de, “Hit de san hweag-heseheikma O Wene kabog-durukmu au wireheg, di on su on fouk debeheg, duruk kahep?” ulug hweag-nesebag.

⁴Ne, iren[10] de ap it o TUHAN Obam anyo wutuk mu let-enepuk on etano enunuk oho hein og-esebag.

⁵Famen de it ap homi Yahudi on enowesi melal-enepuk on etano At Allah en furebeseruk kwit, enalong baloho fahat enusugmu re it ap o Persia fam yabuk duruk enap etano en de, at Darius fam surat monde folug onggo hweag-nesa fug kweleg de niren fetag-fetag dul fug ulug embesebag.

⁶Deg latfag ale anyo fahet iren at raja fam wene mondotfag on de su,

⁷“Nenowe Raja Darius, hebe hakol eleg angge neg wereg lit melal-enepuk kahenma, surat hakit mondorik waharuk kahe!

⁸Nenakni hun hat oho holuk amag, nit de o Propinsi Yehuda anyo fam lauhukdeg kumu esauk men de, o TUHAN Allah Mun Humon Obam anyo, nikangge obalma helep humon fam wireheg, fak lehet omano e nim sapli heheg, wireheg, duruk katswa. Yabuk ebere mun fik-furoho durukmu re bale fouk eleg angge hundig-hundig duruk.

⁹Airoho duruk katswa ma re niren it ap homi enunggul unuk ai on enowesi melal-enepuk on omano fam hein og-esauk kwit de, ‘O Wene Kabog duruk obam aire nikangge wurukwag ulug de san hweag-hesasimu wireheg, fik-fouk debeheg, duruk kahep?’ ulug hein og-esauhuk.

¹⁰Ai en it ap enebe yabuk durukmu melal-enepuk on eta oho re sa-sa ulug enunuk oko nenakni hat hobam hweag-humuhuk en ulug hein og-enepuhuk.

¹¹Airoho hein og-enepuhuk men de iren onggo uruk kwit de, ‘Nit de Allah bohol kwenang inim mun onggwareg ahun on anyo amingming angge, tahun deng-deng angge duruhuk on etmano fam it ap homi Israel on fahet raja mun leho on welatfag on anyo en o TUHAN Obam su witfagdeg fik-fouk debebag on anyo niren nikangge wutuk kahe.

¹² Famen de it nit nenambusi-nenombasi en de Allah At bohol fam along leho wereg ahun anyo olokap kwelabe foruk katfag ma re, Aren it enebe hun Nebukadnezar raja Babel on it Kasdim on en enambiangma on ai enggik omamne fam og-etfag. Og-etfag ma re aren o anyo siahap-biahapdoho debelug de, ap homi nit nenunggul unuk on omano og-eneplug o Babel lebag.

¹³ Ai en de o Babel fam etma at Kores raja inatsireg de, aren melal-enepuk li em tahun keram on anyo fam wene welaleg wilipuk kwit de, O TUHAN Obam ai nikangge wirik lakiek ulug hweag-nesasi.

¹⁴Airoho debelug de di angge su angge emas mel, perak mel, O TUHAN Obam wirigmu en duruk katfag angge famen, at Nebukadnezar en o Yerusalem en walug lebagdeg o Babel kembu obam kwelabe feik lebag angge etmano oho wilip-nesa wahasi. Di angge su angge aire at Raja Kores en de o Yehuda fam suma gubernur eke unduhuk febag on hun Sesbazar anyo og-itsi.

¹⁵At Raja en hweag-utuk kwit de, ‘Di on su on etma re o TUHAN Obam Yerusalem anyo wiri folug de, obalma o TUHAN Obam wirigmu etma feiyug,’ ulug isi.

¹⁶Ai isimu re at Sesbazar anyo o Yerusalem suma wahasireg de o TUHAN Obam au fahet helep oboule feik wahasi. Anyo fesi huli en de o wutuk ale aure wutuk kwit neg welahe famen de, owan fotog duruk kahe fug,’ uswa.

¹⁷Aireg ma re hun haren fano boruk kahen halug de, at Raja Kores en o Yerusalem etma o TUHAN Obam ai nikangge wurukwag ulug ai demdoho wene melaloho wilipsimen a, eleg a? ulug nenoluk amagdoho re, wene di on su on fahet atam lisu bal-heheg kerajaan Babel fam foruk katfag on etmano fam loarukwagdoho hweag-esakiyug ulug niren, wene hobam foruk kahe. Ai en de wene ai fahet nenakni haren kongdoho uhun ale aire folo hweag-nesakiyug,” ulug mondorik lauhuk.