Read Ninia Yali EZRA 6 Bible Online

EZRA 6 - Ninia Yali bible

EZRA 6

¹Niren surat airoho mondotuhukmu re, at Raja Darius anyo ele mingming fam de di wene su wene fahet lisu baloho kerajaan fam etma endam et foruk katfag on o Babel foroho latfag on etmano fam herarukwag ulug hweag-esebag.

²Famen de wene ai fahet on baleg angge anyo re o Babel en hweahabag fug, ite o Media en kota Ahmeta ai wereg ma hweahabag. Wene ebere ahap on fam baleg angge yinggiloho wereg ma re, ele diroho baleg latfag,

³“At Kores Raja inatsireg melal-enepuk katsi li tahun keram on anyo fam de, O TUHAN Obam Yerusalem anyo ap homi en mezbah wurukwag ulug wene melaleg wilipsi. Ne, o ai wutuk kwit de, emberim fil yatdoho witil lahakup ale re 27 meter ne nunggulig anggweroho re 27 meter en.

⁴Obahat de diroho wiruhup: Helep sap henahan folug de emberimmu re e on sap misig foruk kamuhup. Ne, yabuk etma duruk on fahet de uang kerajaan fam wereg on omano en oko wiruhup.

⁵Ne, o TUHAN Obam wirigmu Yerusalem anyo en di angge su angge emas mel perak mel fam hilinggig angge at Raja Nebukadnezar en hohouk dulug o Babel watfag angge etma ohore, nikangge keram obalma welatfagmu feik lahup,” ulug baloho wereg ma hweahabag.

⁶Airoho hweahabagdeg de at Darius en lisu baloho onggo mondotuk kwit de diroho ebag, “Hat Tatnai o propinsi Efrat barat fil enobahet gubernur unduhuk welahen on nim, hat Syetar-Boznai nim, hit ap yabuk o propinsi Efrat barat fam etma leho wereg lit duruk kahep on inim fam nele uruk kahi ai. It ap homi Yahudi on ai hiren diroho suroho ulug it fam debesouk fug,

⁷ne o TUHAN Obam wituk on ai oho kwe bal-enebuk fug. It ap homi Yahudi on fahet gubernur wereg on anyo mel, it ap homi Yahudi on enowesi melal-enepuk on mel, en o TUHAN Obam ai obalma wurukwagdoho hinil feiyek.

⁸Wene su inim de, nori hiren it ap homi ai o wituk mu let-enebuhup ulug wene henobam foruk kahi. Ne, hiren de diroho enebuhup: O ai wurukwag ulug uang de it ap homi propinsi Efrat barat on en kwenang onggo ulug negara fahet on etma feik waharuk on anyo fam en walug de, it ap homi etma fam anunuroho lisil la fug angge onggo og-esauk kamuhup.

⁹Airoho enepuk kwit de, it imam o Yerusalem on etmano en, nit de su angge anggoloreg lahe ulug uruk angge, sapi ket yohombuk on hag, domba yohombuk on hag, domba omalik waroho Allah bohol fam along wereg ahun anyo og-utuk on ulug hag, gandum mel, mayu mel, anggur mel zaitun ahalue hag, de henapeleg-am fug angge nukoho hundig-hundig it og-esauk kamuhup.

¹⁰Iren wam Allah bohol fam leho wereg on anyo enda ahayeg hauk aleroho waroho og-ereheg, an nobahet inim, an nomaliki enobahet inim, fanoap nobahaukwag ulug heng eheg, duruk kamagdoho re, mundoho ai enebiyug neg.

¹¹Ap homi wene melaleg su sahaloho foruk on de diroho debeseruk kamuhup, at obam en lang owag misig sanogdoho walug ambiang kabukdoho re ap anyo ebe fam hwak deberukmu ahakofolog duruk karuhu. Ne, at obam anyo re molulukdoho embesehupmu re ap homi en siag-siag angge hwik dik laukmu debehup, ulug an den wene melaleg su hit henobam uruk kahi.

¹²Wene melaleg su it ap raja-raja en oho, it ap homi enunggul unuk eke on en oho, enambong seroho sahaloho embeseheg, ne o TUHAN Obam wirig o Yerusalem ai moluluk dul ulug deheg, duhup on aire we At Allah en o Yerusalem At ebe apne waukmu ulug momaloho fahat debag on anyo en neg elehapdoho feseruk kamag. An Darius en wene melaleg su henobam foruk kahi. Anggere mun finik-fanoroho neg diyug,” ulug balfag.

¹³Airoho balfag ma re at Raja Darius en wene melale febag ale anyo re, at Tatnai gubernur o Efrat barat fam welatfag ahun anyo nim, Syetar-Boznai inim, it ori etmano nim, en mun fik-furebelug higitdoho neg debag.

¹⁴ Airoho durukmu it nabi hun Hagai mel, Zakharia mel, en letdoho durukmu re, it ap raja o Persia fam etma welatfag enap mel, Raja Artahsasta mel, Raja Darius mel, Kores mel, At Allah it ap homi Israel on enakni anyo mel, en wene melaleg ebag ale anyo higitdoho re it ap homi Yahudi on enowesi melal-enepuk on etmano en o TUHAN Obam anyo witil lauk kwit de, o wituk katfag on anyo folo-foloroho neg witfag.

¹⁵Ne, o TUHAN Obam ebe anyo re at Raja Darius inatfagdeg melal-enepuk katfag on anyo tahun folfalik angge wereg kweleg, tanggal 3 bigalem it Yahudi on en wenaharuk katfag on de unuk Adar ai fam neg de mundoho wit-atfag.

¹⁶Airoho wit-atfag ma re it ap homi Israel on mel, it imam mel, it Lewi enap mel, it ap homi hele waroho hwik-enebik lebag on anyo mundoho mel, de enahayeg fam o TUHAN Obam wirig anyo sok husuruk kwit kabog-debag.

¹⁷Airoho duruk salim aire iren TUHAN obahet wam sapi yohombuk on 100 en inim, domba yohombuk on 200 en nim, domba omalik de 400 en nim, og-etfag. Ne, it enesiag elehap dukwag ulug TUHAN heng uruk kwit wam waroho yalduk kwit de, wam kambing yohombuk ebe nesanggo en, it Israel on enunggul unuk deg ale etanoroho, enunggul unuk misig fahet misig heheg, waroho yalfag.

¹⁸Ai en de at Musa wene melaleg buku fam baleg wereg ale anyo higitdoho re, it ap o TUHAN Obam olma yabuk duruk on fahet de it ap imam omano nim, it Lewi enap nim eneyabuk deg aleroho neg feseil lebag.

¹⁹ Tahun ombolim on anyo tanggal 14 bigalem misig wereg kweleg de it ap homi hele wareneplug lebagman enobam watfag on anyo soni Paskah esetfag.

²⁰It ap imam mel, Lewi enap mel, enebe mundoho horoho eneko fahat debagdeg de it enebe horeg on neg welatfag. Ai en de it ap Lewi enap anyo en de wam soni Paskah ai fahet inim, it imam enobahet inim, it enonggwareg fahet inim, it ap homi hele wareg hwik-enebik lebagman watfag enap anyo fahet inim, watfag.

²¹Airoho watfagdeg de wam omano re it ap homi Israel on hele wareg hwik-enebik lebagman enobam watfag on etmano inim, it ap homi o etma welatfag on famen de, iren siag neg duruk kwit wereg ale anyo embeselug, it ap homi Israel on enakni TUHAN Allah anyo fam neg kabog-duruk kamul ulug watfag on etmano inim, en nebag.

²²It ap homi Israel on anyo en enobam watlug o TUHAN Obam anyo wutuk mu let-esahu angge ulug TUHAN at raja Asyur[11] on endama debag ma, it fam enda fano atfag ale ai fahet de it mundoho enahayeg neg bebag. Ne, iren de nukoho sabiren enahayeg fam neg Nukoho Roti Fituk angge fam weraho fug on nauk salim anyo ebetuk kwit kabog-duruk katfag.