Read Ninia Yali EZRA 7 Bible Online

EZRA 7 - Ninia Yali bible

EZRA 7

¹Anyo debelug tahun-tahun angge welatfagdeg en de, o Persia fam etmano at Artahsasta anyo raja unduhuk wereg lit melal-enepuk li em de ap misig eke unuk de Ezra hun Harun Imam Agung anyo ambiangma on welatfag. Ne, at welatfag ale ai it endag-ail watfag ale fahet ambiang fil en indip fil de diroho: Ezra Seraya Azarya Hilkia

²Salum Zadok Ahitub

³Amarya Azarya Merayot

⁴Zerahya Uzi Buki

⁵Abisua Pinehas Eleazar Harun Imam Agung it enowe leho on anyo.

⁶At Ezra ebere di ale su ale mundoho oluk neg deg lit de, wene melaleg it ap homi Israel on enakni TUHAN Allah en at Musa fene en og-esebag on anyo aren humdoho oluk deg latfag. At akni TUHAN Allah anyo en Ezra ebe fam fanoap deberukmu atlug de aren raja fam heng uruk angge anyo raja en higitdoho og-utuk katfag. At Artahsasta raja inatfagdeg melal-enepuk katfag lien de tahun sabiron wereg kweleg, at Ezra anyo ap homi Israel on esan lohwaleg angge it imam humdoho inim, it Lewi enap inim, it suni wilipuk enap inim, it o TUHAN Obam wirigmu etmano en sokole fam kahaleg on inim, it yabuk duruk enap inim, seberoho o Babel en de Yerusalem laul ulug watfag.

⁸Bigalem misig wereg kweleg tanggal misig fam it ap homi anyo o Babel embeselug wilibik watfagdeg de, Allah en let-enepil waharukmu atlug de, it anyo bigalem foab on fam tanggal misig wereg kweleg o Yerusalem kwik watfag.

¹⁰At Ezra anyo re TUHAN awene melaleg anyo fik-furoho kumureheg, wene melaleg anyo ebe deheg, wene melaleg mel, diroho diyug suroho diyug ulug wereg ale mel, etmano ap homi enunggul unuk Israel on anyo hweag-eseheg, duruk katmin ulug enda abirangge dugwi debelug duruk katfag.

¹¹At Raja Artahsasta en surat eneg angge baloho hun Ezra ebe imam unduhuk lit Wene melaleg fahet mun enggat deg latfag ahun anyo fam og-etfag on anyo re su,

¹²“An Raja Artahsasta en de hat Imam Ezra Allah bohol[12] fam along wereg ahun anyo Awene melaleg holuk-boluk hahun anyo surat su bal-hutuk kahi.

¹³It ap imam mel, it Lewi enap mel, ap homi Israel on o an den melal-enepuk kahi kwe suma wereg on fomane mel, o Yerusalem lahuk enenda boruk halug de, hat hinim lahup en ulug an den wene melaleg su wilibi foruk kahi.

¹⁴An nim it ap an komo napuk on enebe sabiren nim en hat o Yerusalem mel, it ap homi Yehuda on wereg ma mel, lakin ulug mon-hapuk kahe aire, it ap homi en wene melaleg TUHAN en hat hobam febag on anyo demdoho holoho duruk a, eleg a? ulug hil hwal-esa lakin ulug mon-hapuk kahi ai.

¹⁵Nit an ninim it ap an komo napuk on nim en de Allah o Yerusalem wereg on, it ap homi Israel on enakni Allah ai fahet niren emas inim perak inim, su foruk kahe anggere walug lakin.

¹⁶Hun haren o Babel kwe abirangge suman emas mel, perak mel, kabog dauihin on etma mel, it ap homi enunggul unuk Israel on en mel, it imam-imam en mel, it enakni TUHAN Allah Obam o Yerusalem anyo fahet kabog-duswa on etma mel, mundoho hwelalug lakin.

¹⁷Uang eta fam de henda wenggel-wenggel wam sapi yohombuk on mel, domba yohombuk on mel, domba omalik mel, gandum mel, anggur ahalue mel, hundutlug de, abirangge ai o TUHAN Obam wirigmu Yerusalem mezbah fam etmano yalik lakiyug.

¹⁸Ne, emas mel perak mel, ando wereg halug de, hun hat hakni TUHAN Allah ai enda boruk aleroho, hat inim, hat hori inim en anggoloreg lahep aleroho hwelakiyug.

¹⁹Di angge su angge o Allah Obam Yerusalem anyo en wene kabog-duruk kwit wauk angge ulug hun hat hobam fehe angge aire Allah og-umuk.

²⁰Ne, o TUHAN Obam ai fahet anggolo atuk on etma mundoho fahet de, kerajaan an den melal-enepuk kahimu oma fahet uang foroho on fam etman og-homagdoho heng-enebiyug.

²¹Hit ap o propinsi Efrat barat fil welahep on en uang kerajaan fahet hwalduk kahep on anyo henobam uruk kahi ai, ap Ezra Allah bohol fam along wereg ahun anyo Awene melaleg olug-boluk deg ahun en di angge su angge heng-henepuk halug de, folo-foloroho neg og-utuk kamuk.

²²Og-utuk kamuhup alere diroho su: perak anggin de 3.400 kilogram deg on nim, gandum anggin de 10.000 kilogram huli deg on nim, anggur ahaik de 2.000 liter fam deg on nim, zaitun ahalue re 2.000 liter fam deg on nim, mayu at endareg aleroho nim, og-utuk kamuk.

²³At Allah bohol fam along wereg on anyo Obam anyo fahet di on su on heng uruk angge fik-fouk deberuk kwit de, Aren an nim, it ap an nombolim raja unduhuk lit melal-enepuk kamuhup on etma fam inim, olok enobam fouk no re, henepe hebel-febeldoho neg diyug.

²⁴Kwenang onggo ulug hiren ap imam en mel, Lewi enap mel, it suni uruk enap en mel, it sokole fam kahaleg wereg enap fam mel, it yabuk duruk enap en mel, it ap homi foma o TUHAN Obam anyo fam hunduko duruk on mel, fam de heng enebuk fug.

²⁵Ezra nare, At Allah en hat hobam henda enggat on og-hitsi on ai fam de wenggeloho re it ap o propinsi Efrat barat fam etma hat hakni Allah ai awene melaleg anyo higitdoho duruk kwit wereg on etmano, haren it melal-enepuk on melalduk kamag ulug unduhuk feseheg, it wene ayo wiroho katukdoho balduk on hakim omano unduhuk feseheg, diyug. Ne, namloho haren de it ap homi etma Wene melaleg wereg on ai enapeleg on etma mundoho hweag-esakiyug.

²⁶Ap eke en lahe hat hakni Allah awene melaleg anyo mel, kerajaan fam wene melaleg wereg on anyo mel, holoho duk eleg angge duruk halug de, ap aire unggum obam folug waruhup a, ite hwik-esa lahup a, angge di angge su angge mundoho del dahup ane, ite sabu hetdoho kwelap-enepukmu kwelabe fohup halug de, fano neg,” ulug baloho og-etfag.

²⁷Airoho og-itil lauk em de at Ezra en uruk kwit de, “Nenakni TUHAN en de ap raja anyo endama deberihin mu, o TUHAN Obam Yerusalem wereg on anyo fahet endama besireg durukmu re, TUHAN Allah it nenambusi-nenombasi en apne wauk katfag on ai neg motdeg-motdeg welamuk!

²⁸Ne, Nakni TUHAN Allah en let deg fam de an anyo at raja mel, at komo hweag-utuk on en mel, at autsi yabuk enalong wereg lit duruk enap omano mel, en nobam enahayeg fouswa. Nakni TUHAN Allah en nambong seap napsimu, it ap homi enunggul unuk Israel on anyo enowesi kepala mel enebe humdoho enobam Yerusalem lowag ulug mingming-enepihik,” ulug TUHAN mot-debag.