Read Ninia Yali EZRA 9 Bible Online

EZRA 9 - Ninia Yali bible

EZRA 9

¹Anyo mundoho debelug de, it ap homi Israel on enowesi kaindeg foma an nakit watfagdeg, an hweag-nutuk kwit de, ‘It ap homi Israel on mel, ap Lewi on mel, de enebe ap homi enunggul unuk amu on nit welahe kwe oman maseroho wereg on, enunggul unuk Amon enap, Moab enap, Mesir enap, Kanaan enap, Het enap, Feris enap, Yebus enap, Amori enap, fam en eneko fahat-da fug angge neg duruk. It ap Imam mel, it Lewi enap mel famen ohore airoho neg duruk. Airoho duruk kwit de iren de ap homi enunggul unuk enap etman duruk kwit mun siag ale duruk on omano hagdoho neg duruk.

²It ap Yahudi on en de homi enunggul unuk dag fil on og-enepukmu re, TUHAN omaliki ebe on anyo re mundoho emet atswa ma fano on eke wereg fug. Indip aireg on ai duruk ale re it ap enowesi kain on mel, it ap homi Israel on en yabuk lehoma duruk on mel, en dag duswa.’

³Airoho hweag-nutuk on anyo nesanggo holdihik deg de nobam si isimu re nasum dilip-dalapdoho embeseheg, noruk mel nombanisong mel filoho embeseheg, dirihik deg nenda wat-dauk kwit hwerieg latihik.

⁴An nebe airoho neg hwerieg weregman neg de wam hupmu waroho yalduk on anyo fam aik wahasi. Ai en it ap homi anyo an wereg ma etano mase-nobahaik wahausareg de, it ap homi Israel on enakni Allah en it ap homi hele waroho feseik lebagman watfag on ai enesiag wereg on ai fam debesehuk ulug wereg ale anyo enenda wenggel-hausareg de it enakol neg atsi.

⁵An anyo it ap homi wam hupmu waroho yalduk on anyo yalukoho duruk li etano, nenda hesilduk en hwerieg latihik mu etano en nasum deneleg angge etano bugdoho inatihikdeg de, an nelenggen dimiroho yaho folug nenggik langdoho nakni TUHAN Allah fam lahabe ferihik.

⁶Airoho lahabe folug an den uruk kwit de, “Nakni Allah, nit nenesiag de nenunggul fam kabog-kabog angge lahabegma emberim de bohol bal haukmu re, an den Hat hil hanim nunggul leko fu hea alere nenggali napuk.

⁷O endam it nenambu-nenombasi welatfag huli en angge ketia huli nit Hat homaliki en Hat hobam siag neg duruk kahema, ai fam de it ap raja-raja dagma on en de nit nenowesi raja-raja mel, imam mel, enalong elehapdoho feseruk katfag. Nit nenebe nenowareheg, herag-nenebeheg, hele waroho og-neneplug laheg, ketia deg lahe su hagdoho nit ap homi en enal belesim waroho nenobahakeg, duruk katfag.

⁸Famen de, nenakni TUHAN Allah, ketia Haren nit nenobam henda fano atihindeg, o mun enegma suma enakol eleg angge mun fanoroho neg welamag ulug, niron fomane ap enapma enamingming angge atlug weregman fiselaroho nenobaharihindeg nenoluk keron welamag ulug og nesauihin.

⁹Nit ap homi enapma enamingming anggeroho wereg kweleg Hat nenobahalug lauk katihin fug. It ap raja Persia fam welatfag on etmano en nit nenelaheg nesalug, o Hat hobam meiyaleg neg kabog laharuk on su wuruhup en lowagdoho hweag-esowag ulug debeserihin. Haren neg nit o ap homi Yehuda on wereg ma inim, it ap homi Yerusalem on wereg ma inim, nenalong baloho welahen.

¹⁰Ai famen de Nenakni TUHAN Allah, ketia re di wene su wene mundoho atfag on ai fam en de niren keroho ehe halereg? Nit de Hat Hawene melaleg,

¹¹it hamingming angge nabi omano fene en og-nesauihin on omano embeselug duruhukmu. Kwenang nit welatuhukmu ai fahet iren hweag-nesauk kwit de, ap homi o ambiang foma en ambiang foma fam wereg on etman mun siag on neg deheg, naleg-halegdoho neg deheg, durukmu re, kwenang aire buhundeg fug, ulug hweag-nesauk katfag.

¹² Niren ap homi etma on nim og-og aheg duruk ale fahet mel, it ap homi etma enenggik werehapdoho debeserukmu it enebe finik-fanoroho welamag ulug let-debeseheg, duhup hayog ulug it nabi etman ili uruk katfag. Airoho hweag-nesauk kwit de, hit lahe nenele holoho duruk halug de, hit henebe henomamne on atuk kwit, hiren henanggwenang ai on fam en anggen yihig baloho nenggeg, li etma mundoho-mundoho hit henomaliki enobam henabinggi angge hagdoho belabe feseheg, duruk kamuhup, ulug hweag-nesauk katfag.

¹³Nenakni Allah o, niren Hat Hawene melaleg anyo sahaloho embeselug duruk kwit nit mundoho siag duruhukmu, Haren unggum nenobam ferihin. Famen de nenakni, unggum nenobam ferihin on aire niren wa ale aire mun anggindoho famen de we horog ha roho nenobam ferihin deg en nin nit nenahap wendat-nenepihin ale ai nenoluk deg.

¹⁴Aireg ma re niren Hat Hawene melaleg anyo embeselug dahandoho duruk kwit ap homi enobabut siag on aire keroho og-enebehe halereg? Niren nikale airoho neg duruk halug de, demdoho Hat mun holok atlug ap misig eke oluk lili fouk eleg angge mun lilibug-lalabag nesehen halereg.

¹⁵Ap homi Israel on enakni TUHAN Allah, nenakni Hat de mun katukdoho neg duruk kahen, famen deg kweleg nit nenoluk welamag ulug nenobaharihin. Ap homi nenesiag et deg kweleg de nit Hat holohotma watlug uk alereg fug kweleg, nit Hat hakit nenesiag fag-dik waharuk kahe, nakni,” ulug somban irihik.