Read Ninia Yali NEHEMIA 10 Bible Online

NEHEMIA 10 - Ninia Yali bible

NEHEMIA 10

¹Ai uswa ma it enenggik ahalue fousa on etan keram fousa on de hun Gubernur Nehemia hun Hakhalya amloho anyo. Ne, at ombolim de Zedekia fousa. Ne, it eta enombolim enenggik ahalue fousa on enunuk su:

²It imam on en fousa enap de su: Seraya, Azarya, Yeremia, Pasyhur, Amarya, Malkia, Hatus, Sebanya, Malukh, Harim, Meremot, Obaja, Daniel, Gineton, Barukh, Mesulam, Abia, Miyamin, Maazya, Bilgai, Semaya nim.

⁹It ap Lewi enap en fousa on de su: Yesua hun Azarya amloho anyo ha, Binui it enunggul unuk Henadad on enambiangma on anyo ha, Kadmiel, Sebanya, Hodia, Kelita, Pelaya, Hanan, Mikha, Rehob, Hasabya, Zakur, Serebya, Sebanya, Hodia, Bani, Beninu ha.

¹⁴It ap homi enunggul unuk ai melal-enepuk katswa on en fousa on de su: Paros, Pahat-Moab, Elam, Zatu, Bani, Buni, Azgad, Bebai, Adonia, Bigwai, Adin, At der, Hizkia, Azur, Hodia, Hasum, Bezai, Harif, Anatot, Nebai, Magpias, Mesulam, Hezir, Mesezabeel, Zadok, Yadua, Pelaca, Hanan, Anaya, Hosea, Hananya, Hasub, Halohes, Pilha, Sobek, Rehum, Hasabna, Maaseya, Ahia, Hanan, Anan, Malukh, Harim, Baana nim.

²⁸Airoho duruhukdeg it ap homi etmano en duruk kamuhuk ale ulug uswareg de diroho hombuk balswa, “Nit ap homi Israel on mel, it ap imam mel, ap Lewi enap mel, o TUHAN Obam fahet sokolma kahaleg wereg on mel, it ap binggong kong-duruk on mel, o TUHAN Obam etma yabuk duruk enap mel, nit nenohwesi mel, nenomaliki enebe lohon di ale su ale furebouk alereg on mel, ne it ap homi fomane Allah en wene melaleg anyo holoho neg duruk kamuhuk ulug enebe ap homi bohon nit nenesahali kwe wereg on etmano enesahalimu en eneko fahat dausa on mel,

²⁹nit nenebe abirangge aire it ap nenowesi melal-nenepuk on mel seberuruhuk deg, niren de, nenakni Allah en wene melaleg At amingming angge Musa fene en og-nesasi on anyo en uruk aleroho neg duruk kwit welamuhuk. Ne, niren lahe nenele airoho duruk kamuhuk ulug uruhuk on ai dipdoho duhuk fug halug de we At Allah en neg hururungdoho nenobahaukwag. Wene melaleg mel, wene diroho diyug airoho diyug ulug baleg wereg on mel, duruk kamuhup ale ulug wereg on mel, nenakni TUHAN Allah en hweag-nesasi on etma higitdoho neg duruk kamuhuk,

³⁰ Ai en niren hombuk balduk kwit de it ap homi bohon famen nit nenobam nenesahali kwe wereg on etma nim og-og atuk kamuhuk fug.

³¹ Ne, it ap bohon en lahe it enangge gandum oho ne amu angge oho nukoho sabat salim ane, ne nukoho amu on eneg on fam ane nit nenekit onggo balik waharuk halug de hundutuk kamuhuk fug. Tahun folfalik en welatlug sabit angge fam de niren neneyabuk wutuk kamuhuk fug, ne niren nenombaleg angge wereg on ohore obalma feiyek ulug heng-enepuk kamuhuk fug.

³² Tahun hundig-hundig etma fam de o TUHAN Obam etma duruk angge fahet onggo balduk kamag ulug niren nenangge perak 5 gram en heg kabog-duruk kamuhuk.

³³Niren de o TUHAN Obam olma etmano wene kabog-duruk kwit duruk angge re: roti TUHAN obahet werako meja fam foruk kamuhuk on fahet mel, gandum di salim su salim foruk on mel, wam TUHAN endama ahayeg howag ulug nukoho hundig-hundig waroho og-utuk on mel, di on su on wene eneg ale fahet duruk on mel, wam ap homi Israel on nenesiag elehapdoho foukwag ulug waroho og-utuk on fahet mel, ne o TUHAN Obam wirigmu etma di ale su ale duruk ale fahet wereg on mel fouk deberuk kamuhuk.

³⁴Nit ap homi holduk on mel, ap imam mel, it Lewi enap mel, en de wene melaleg wereg ale higitdoho re, nit nenakni TUHAN Allah Obam wirigmu etman wam di angge su angge waroho yalduk on fahet it enunggul unuk ke on en e wiroho foruk kamuhup ulug tahun hundig-hundig etma fam eneg amag ulug de helep anggen wal-duruk kamuhuk.

³⁵ Tahun hundig-hundig fam de niren gandum anggen keram baleg on mel, nit nenahan anggen yihiruk on en anggen yihilug keram e owag fam en yuhul atuk on mel de TUHAN Obam wirigmu walug waharuk kamuhuk.

³⁶ Ne, wene melaleg wereg ale higitdoho re, nit nenowaliki ap wandeba on de it ap imam en Allah og-omag ulug TUHAN Obam wirigmu walug waharuk kamuhuk. Ne, ai en niren de nenowam sapi omalik oho, domba omalik oho, ite kambing omalik oho, keram endag-atuk on mel walug waharuk kamuhuk.

³⁷ Niren de it ap imam enekit o TUHAN Obam olma etma gandum anggen kirim-keram on bereleg angge nim tahun hundig-hundig etmano fam balduk on mel, ai fomane e anggur ahaik hag mel, zaitun ahalue mel, ne di ahan anggen su ahan anggen mel walug waharuk kamuhuk. Ne, niren neneyabukmu en anggen balug num on foruk on de it ap Lewi enap enekit it enebe o kota yabuk wutuk kwe wereg on en niren foruk angge ondolduk on etmano enekit feik waharuk kamuhuk.

³⁸Famen de it ap imam hun Harun ambiangma on en niren numen on ulug foruk angge etmano kabog-duruk halug de ap Lewi on eke eyogma roho kabog-duruk karuhu. Airoho kabog-dulug de it imam omano en num en on de di angge su angge forukmu wereg ma etmano feik laukmu it ap Lewi enap en de walug o TUHAN Obam etmano en feik lauk kamuhuk.

³⁹Ap homi Israel on mel ap Lewi enap mel en de o TUHAN Obam wirigmu di on su on duruk angge forukmu wereg ma etmano iren hundig-hundig foruk kamuhup angge, gandum mel, anggur mel, zaitun ahalue mel, ambe fam etma feik lauk kamuhuk. Ne, iren feik lauk kamuhupmu etma re it ap imam yabuk duruk kwit wereg on mel, o TUHAN Obam kwik laukmu sokole kahaleg wereg on mel, suni uruk enap mel wereg ma etma foruk kamuhuk. Nit de o nit nenakni TUHAN Obam ai furoho hwalduk kamuhuk eke dahan deberuk kamuhuk fug,” ulug hombuk balswa.