Read Ninia Yali NEHEMIA 11 Bible Online

NEHEMIA 11 - Ninia Yali bible

NEHEMIA 11

¹Airoho uswareg de it ap homi melal-enepuk on etmano o Yerusalem yugdoho welatswa. Ne, it ap homi etmano en de it enehain elekwe en enebe wenako num en fam deg on etmano en enenggik wal halug eneg atuk on neg de misig heheg o kota Yerusalem mun eneg on ai fam welamuhup en ulug duswa. Ne, it enenggik wal hauk men eneg atuk eleg on halug de o kota amu kwe welamuhup uswama welatswa.

²Ne, it enesahalimu etmano en de foma o Yerusalem welamul fano uswa ma airoho uswa on ai fahet it ap homi en mot-enepswa.

³O kota amu kwe etma fam de it ap homi Israel on mel, imam mel, Lewi enap mel, it ap o TUHAN Obam olma etmano yabuk duruk enap mel, ne it hun Salomo obahet yabuk duruk katswa on etmano enambiangma on mel, it enobam kota domog en de it enanggwenang enonggwareg en on fam welatswa

⁴Ne, it ap homi enunggul unuk Benyamin on mel Yehuda on mel en wenako fomane re o Yerusalem welatswa. Ne, it etan o etma welatswa on enunuk baleg de su: It enunggul unuk Yehuda on en welatswa on de enebe su: Hun Ataya at Uzia amloho hun Zakharia omba welatswa. Ne, it at ombasi on en fomane su: Hun Amarya, Sefaca, Mahalaleel, Peres, Yehuda. Ne, it enunggul unuk on ai en enebe abirangge seberoho re 468 en welatswa, ne ap enebe re mun enalong deg lit hebeleg enap neg welatswa. Maaseya hun Barukh amloho hun Kolhoze omba ai welatswa. Ne, at ai ombasi en fomane re su: Hazaya, Adaya, Yoyarib, Zakharia, Syela, Yehuda.

⁷It enunggul unuk Benyamin on en welatswa on de enebe su: Salu hun Mesulam amloho, hun Yoed omba ai. At ai ombasi on en fomane su: Pedaya, Kolaya, Maaseya, Itiel nim Yesaya nim. Gabai nim Salai nim oho. It etare at Salu ai amepsi[17] horogdoho on. It enebe abirangge re 928 en wereg ma at Yoed

⁹hun Zikhri amloho anyo mel, at apma wereg on anyo mel, ne at Yehuda hun Hasenua amloho anyo ha en melal-enepuk katswa.

¹⁰It imam enap anyo en welatswa on de su: Hun Yedaya at Yoarib amloho hun Yakhin omba ai eke welatsi. Ne, at Seraya hun Hilkia amloho at Mesulam omba ai eke welatsi. At ai en ombasi enebe fomane re: Zadok, Merayot, Ahitub, it enebe Imam Agung welatswa enap eta.

¹²It enebe abirangge seberoho re 822 en wereg lit it enebe TUHAN Obam wirigmu etma yabuk imam on duruk katswa. Eke at Adaya hun Yeroham amloho at Pelalya omba ai welatsi. At ai on en ombasi fomane re: Amzi, Zakharia, Pasyhur, Malkia nim.

¹³It enunggul unuk ai on en ap neg enahain elekwe domog fahet welatswa on seberoho re enebe 242 en. Eke Amasai hun Asareel amloho at Ahzai omba ai welatswa. At ombasi en fomane re: Mesilemot nim de Imer nim.

¹⁴It enunggul unuk au on fam en ap enowesi hebel-bebel on neg welatswa on de enebe 128 en. It ai melal-enepuk katsi on de at Zabdiel hun Gedolim[18] ai welatsi.

¹⁵Ap Lewi enap en welatswa on: Hun Semaya at Hasub amloho hun Azrikam omba ai. At ombasi en fomane re: Hasabya nim Buni nim. It hun Sabetai mel, Yozabad mel etare ap Lewi enap en ap leho enap yabuk o TUHAN Obam wirigmu en dag fil duruk on fahet seneg latswa enap. Eke re at Matanya hun Mikha amloho at Zabdi omba, hun Asaf ambiangma on ai welatswa. At aire ap homi en suni urukmu melal-enebeheg, somban Allah dang durukmu melal-enebeheg, duruk katsi ahun At Bakbukya aire at Matanya ai apma wereg lit yabuk duruk katsi on. Eke Abda hun Samual amloho at Galal omba at Yedutun ambiangma en ondoho on ai eke welatsi. It ap etman enebe abirangge re 284 en welatswa.

¹⁹Ap Sokole kwik laukmu etmano kahaleg welatswa on de: Akub mel, Talmon mel, it enori mel welatswa. It ai enebe seberoho re 172 en welatswa.

²⁰Ap homi Israel on mel, it imam mel, ap Lewi enap fomane alongdoho re, o Yehuda kwenang fam etman it enobam kota domog di kwe su kwe welatswa.

²¹It ap TUHAN Obam wirigmu yabuk duruk katswa on etma re o kota Yerusalem fam en o bumbuk eke unuk Ofel ai fam etma welatswa. Airoho wereg lit it enebe re hun Ziha nim Gispa nim en melal-enepuk kweleg yabuk duruk katswa.

²²It ap Lewi enap o Yerusalem welatswa on etmano en yabuk durukmu inil welatswa on de hun Uzi at Bani amloho hun Hasabya omba ai. At on en ombasi fomane re: Matanya mel Mikha mel. At aire it enunggul unuk Asaf enap o TUHAN Obam wirigmu wene kabog-dukohoma musik hwalduk katswa on inim hundig latswa.

²³It ap musik o TUHAN Obam wirigmu etmano nukoho hundig-hundig dik kuruk on fahet de wene melaleg at raja en fesimu welatswa aleroho eke kweheg, eke kweheg, duruk katswa.

²⁴Hun Petahya at Mesezabeel, unggul unuk Yehuda on en unggul unuk agdoho Zera on aire it ap homi Israel on enobahet o Persia fam etma at raja ebe wereg ma welatswa.

²⁵Ap homi humdoho re o kota it eneyabuk wereg kwe etmano horogdoho welatswa. It ap homi enunggul unuk Yehuda on fomane re enebe o Bersyeba il apma fil etma nim de o Lembah Hinom il emberim fil etma nim welatswa. It airoho wereg lit enebe welatswa kwe o kota re su: Kiryat-Araba, Dibon, Yekabzeel, Yesua, Molada, Bet-Pelet, Hazar-Zual, Bersyeba, Ziklag, Mekhona, En-Rimon, Zora, Yarmut, Zanoah, Adulam, Azeka, Lakhis nim fam etma welatswa.

³¹Ne, it ap enunggul unuk Benyamin on fomane re o kota fomane welatswa on de su: O Geba, Mikhmas, Ai, Betel, nim o sili dotdeg kwe horogdoho etma nim fene welatswa,

³²ai en o Anatot, Nob, Ananya,

³³Hazor, Rama, Gitaim,

³⁴Hadid, Zeboim, Nebalat,

³⁵Lod, Ono, ai en o Lembah Tukang kwe etma mel welatswa.

³⁶It ap Lewi enap esan foma it Yehuda on enobam fene welatswa on etmano ap Benyamin on nim welamag ulug hweag-esaswa.