Read Ninia Yali NEHEMIA 13 Bible Online

NEHEMIA 13 - Ninia Yali bible

NEHEMIA 13

¹ Wene melaleg Musa en hweag-esebag on anyo bilingguruk men de wene eke diroho ulug baleg latsi mu hauhuk, ‘It ap homi Moab on mel Amon on mel de, ap homi Israel on o Mesir en wilibik watfagdeg kwe fam laukmu it ap enunggul unuk biren etan siburu mel, ik mel, nowag ulug og-esebag fug.

² Ne, eta neg fug famen de eke iren boruk kwit de at Bileam en ap homi Israel on hururung enebukwag ulug onggo balfag, famen de nit nenakni Allah en de hururung anyo ahamdoho re fanoap nenobaharuk katfag. Anggere, it ap homi enunggul unuk eta on de it Allah omaliki on nim seberuhup fug.’ Ulug baleg latsi.

³Airoho baleg on urukmu ap homi etmano en enesanggo holswareg de, it ap homi bohon etmano ap homi Israel on enesahalimu en eneko feseswa.

⁴Ne, ai owan am fug kweleg de, at Imam Elyasib o TUHAN Obam ilonggoma etmano en nauk angge kabog-dik kuruk on etmano hwalduk kamag ulug unduhuk fousa on anyo re at Tobia inim fano hundig latsi.

⁵Airoho deg latsi mu re at Elyasib en de o anyo ambe humon misig eke di angge su angge gandum mel, kemenyan mel, o TUHAN Obam wirigmu etman duruk angge mel, it ap imam og-esauk on enobahet forukmu ulug mel, gandum mel, anggur ahaik, zaitun ahalue mel numen on ulug forukmu mel, ne it ap Lewi on mel, musik duruk on mel, o TUHAN Obam wirigmu sokole kwik lauk on anyo kahaleg wereg enap enobahet forukmu fahet ulug mel foukdoho foruhuk famen de at Tobia anyo fam og-itsi.

⁶Ne, airoho atsi ale aire an o Yerusalem en nareng elegma atsi. Aire an nebe at Artahsasta[22] raja Babel on raja inatfagdeg weregman neg de tahun 32 on wereg kweleg an den at raja fam atsi ale etmano olukdoho hweag-itmin ulug o Babel lauihikmen duswa. Airoho lauihikdeg de il horog eke hag welatlug hat nikangge,

⁷o Yerusalem lamihin ulug hweag-netfag ma waharuk men airoho deg latsi. An nebe o suma aik waharihikdeg duruk men de at Elyasib en hun Tobia fam o TUHAN Obam wirigmu etmano ambe eke og-itsi on anyo hauihikdeg de youk lauihik.

⁸Airoho dirihik deg an mun nolok hum atsi mu re at Tobia asum anggen omano hamboko hwik-hwak esa wilibik waharihik.

⁹Airoho debelug de an den o ambe ai buhun-duruk kwit de sali baliek ulug hweag-esauihik. Airoho diek ulug hweag-esalug de mundoho dil lauk em an den de di angge su angge Allah obahet folug og-utuk angge kemenyan mel, o TUHAN Obam ai en duruk angge mel etmano obalma kwelapihik.

¹⁰ Anyo debelug duruk men de, it ap Lewi enap mel, it musik duruk enap mel, ap homi en it nauk on fahet og-esa waharuk eleg en de, o Yerusalem embeselug it eneyabuk domog lausa on deg ma esauihik.

¹¹Airoho deg en de an den it ap enowesi kaindeg omano fam de, ‘O TUHAN Obam su hesama leiyareg oma nunggwelug,’ ulug bet-enepihik. Ai en de an den it ap Lewi enap mel, it musik duruk enap mel etmano wol-enepihik deg de nikangge yabuk duruk kamek ulug hweag-esauihik.

¹² Airoho dirihik mu neg de it ap homi Israel on en de gandum mel, anggur mel, zaitun ahalue mel, numen on foruk on etmano foruk ale indip dusareg de walug de di angge su angge nauk on foukdoho forukmu etmano walug waharuk katswa.

¹³Airoho walug waharukmu re an den de it o ambe di angge su angge forukmu etma hwalduk kamag ulug de, hun Imam Selemya mel, hun Zadok Wene melaleg enggat ahun anyo mel, ap Lewi on Pedaya anyo mel, feserihik. Ne, at Hanan hun Zakur amloho hun Matanya omba anyo re it let-enepuk kamag ulug hweag-itihik. It ap etare higitdoho neg duruk kam alereg, ne iren enori yabuk misig ale duruk on fam di angge su angge etma higitdoho neg yohwan-esauk kam alereg ai an noluk deg ma hweag-esauihik.

¹⁴Nakni Allah, an den Hat Hobam au fahet mel, ne o ai fam yabuk duruk ale fahet mel dihi on etma fahet fu-nobahin, ulug hweag-itihik.

¹⁵ Li eta fam an nil esauk men de ap homi Yehuda on en nukoho Sabat anyo fam ap homi fomane anggur ahaik berelduk katswa. Ne, it amu on foma re gandum mel anggur mel, anggur anggen mel, e ara anggen mel, di on su on amu on mel de enangge keledai emberimmu lahaplug de o Yerusalem walug waharuk katswa. Airoho duruk katswa ma re an den uruk kwit de, ‘O Yerusalem fam suma hiren onggo balduk kamuhup fug,’ ulug ili irihik.

¹⁶Ne, it ap Tirus enap fomane o Yerusalem wereg on etmano en de ikan mel, di angge su angge amu on mel, nukoho Sabat salim ap homi Yahudi on fam onggo wahuk en ulug walug waharuk katswa.

¹⁷Airoho duruk katswa ma re an den it ap Yehuda on melal-enepuk on etmano bet-enepihikdeg an den uruk kwit de, “Yaho, hiren nukoho Sabat anyo emere fehepdeg duruk kahep oma re siag duruk kahe fug ulug henape bokdoho welahep a?

¹⁸Siag aireg on oma duruk en At Allah en nit nenombasi unggum og-esalug o kota su molulukdoho febag. Famen de hiren nikangge Allah olok eke nim dopno deboukwag behepdeg nukoho sabat ai emetuk kahep a?” ulug hweag-esauihik.

¹⁹Ai fam de an den melale feseruk kwit de, ‘Nukoho Sabat anyo indip duruk li em, nukoho foab hup ai fam de, o hupmu[23] re sokole o kota kwik waharuk on etma mundoho latil lahup. Ne, nukoho Sabat ai mundoho eleg aik la fugmen, nukoho Sabat ai hupanggo huli etma re sok husuk fug.’ Ulug hweag-esauihik. Airoho hweag-esalug de it an nautsi fomane re it ap homi en di angge su angge onggo balduk on walug o kota fam kwik wam no ulug kahaleg welamag ulug o sokole kwe etmano feseil lauihik.

²⁰Famen de eke li em de it ap onggo balduk enap mel, onggo hundutuk enap mel, de o nukoho foab salim anyo hup de elehet fak lehet anyo dag fil etma nohoruk katswa.

²¹Airoho nohorukmu an den it fam hweag-esauk kwit de, “Hit de we alemaroho etma nangno duruk kwit weregman o hubet sekan deberuk kahep. Ne, hiren ekenim airoho duruk kamuhup halug de an den henebuhuk ale wereg anggere hahup!” ulug irihik. Airoho irihik anyo li en de iren nukoho Sabat fam eke waharuk katswa fug.

²²Airoho debelug de an den it ap Lewi on etmano it enebe buhundoho sali balug de, ap homi nukoho Sabat eberoho duruk kamuhup en de ap sokole fene kahaleg welamag ulug hweag-esauihik. Airoho hweag-esalug an den somban uruk kwit de, “Nakni Allah, an den eke ai dihi on ai fahet mel ebet neakin. Ne, Haren henda hundig humon anyo fam henda neakin,” ulug somban irihik.

²³ Li eta fam de an den eke esauk men de ap homi Yahudi on enebe humdoho enohwesi homi enunggul unuk Asdod on mel, Amon on mel, Moab on mel, og-enepswa.

²⁴Ma re it enomaliki on fomane re Yahudi enele furebouk fug angge re enele enunggul unuk Asdod on enele mel, ap homi amu on enele mel uruk katswa.

²⁵Airoho uruk katswa ma re an den it bet-enepihikdeg de hururung debeserihik. Ne, it foma re enebe yeik enowatihikdeg enoruk anggen lit-esauihik. Airoho debeselug an den it fam uruk kwit de, ‘Nit nenebe nim nit nenomaliki nim ap homi amu on nim hesangge besangge og-og atuk kamuhuk fug, ulug Allah unuk yiko hombuk baliek,’ ulug hweag-esauihik.

²⁶ An den uruk kwit de, “At Raja Salomo en de siag de su on debag fug no a? Debag neg. O kwenangma suma ap raja wereg on de at Salomo leho welatfag on ai hagdoho eke wereg fug. Allah en de at fam enda hundig boruk katfag, airoho boruk kwit de at ebe ap homi Israel on enobahet raja welamag ulug unduhuk febag. Famen de at ebe homi enunggul unuk amu on en enda wauk katfag fam siag debag.

²⁷Hit de henambong seroho Allah ele sahalduhupdeg homi enunggul unuk amu on og-enepuhup. Aire mundoho kwasik humon duruhup!” ulug hweag-esauihik.

²⁸ At Yoyada aire hun Imam Agung Elyasib anyo amloho, famen de at Yoyada ai amloho misig ekere at Sanbalat obam kota Bet-Horon on anyo eyamal atsi. Ai fam de at Yoyada anyo o Yerusalem welatmihin fug ulug muko wilibi feserihik.

²⁹Airoho dirihikdeg an den somban uruk kwit de, “Nakni Allah, ap homi etman yabuk unggul unuk imam on anyo serame feheg, ne Haren it imam on nim ap Lewi on nim wene sali wareg on anyo siahapdoho feheg, duruk ale ai fahet wenggel-hakin, nakni,” ulug somban irihik.

³⁰Airoho irihikdeg an den ap homi ununggul unuk bohon anyo airoho mundoho horoho wilip-enepihik. An den de it ap imam enap mel Lewi enap mel en duruk kamuhup ale ulug melaloho ferihik mu re, it enemu domog de eneyabuk domog-domog duruk katswa.

³¹Ne, eke an den de eke e mezbah wiroho feik waharuk kamag ulug melale feseheg, ne ap homi en kwenang fam en anggen yihig keram on baleg walug feik waharuk kamag ulug hweag-eseheg, dirihik. Airoho dirihikdeg an den fotogdoho somban uruk kwit de, “Nakni Allah, abirangge oma fahet ebet halug de Haren fanoap nobahain,” ulug somban irihik.