Read Ninia Yali NEHEMIA 2 Bible Online

NEHEMIA 2 - Ninia Yali bible

NEHEMIA 2

¹Airoho somban irihikdeg en bigalem niren wenaharuk kahe aleroho ohwan welatlug bigalem eke unuk de Nisan ai fam, nenggik eke salim de at Raja Artahsasta asiburu naukmu an norohole hesiloho wereg lit de at ahaik anggur ahaik hwenanggoho og-itihik. An den norohole airoho hesiloho duruk katihik fug famen de ai salim neg airoho dirihik.

²Airoho dirihik ai en de at raja en hein og-neauk kwit de, “Hat hebe ouk deg lahen fug famen hape songdoho deg lahen aire nunggwelug. Hendama siag ale eke wereg en dehen a?” ulug hein og-neasi. Airoho hein og-neasimu an nebe youk lauihikdeg,

³ onggo hweag-utuk kwit de, “Hat hebe re raja neg mundoho-mundoho welaruhun nakni. An nobam kota nombasi enebe sal-enepfag ma omano ketia meiyaleg wereg. Ne, elehet fak lehet sokole hilinggig wereg on etmano luluhun-lalahandoho indok fousa ma mundoho siag deg wereg kweleg nobam fanoroho welahi ha fug alereg,” ulug hweag-itihik.

⁴Airoho irihikmen de at raja hein og-neauk kwit de, “Aireg halug de hat hendama keroho duk alereg behen?” isi. Airoho isimu re nendaman de Allah boholma along wereg on anyo fam somban uruk kwit de,

⁵raja fam diroho hweag-itihik, “An hamingming angge en hweag-hitmin ale ai haren holug lahe, ‘fano’ bemihin halug de o kota Yehuda kwenang fam etma an hamingming angge nombasi enebe sal-enepfag ma meiyaleg wereg on etma leko wirik lowag ulug monde-nobahain, nakni,” ulug hweag-itihik.

⁶Airoho hweag-itihik mu at ebe ohwe aluluk hwerieg wereg lit holsireg, de, ‘Yu o fano lahun,’ ulug hweag-nitsireg hweag-nutuk kwit de, “O etma nukoho nunggwenam welaruhun deg en fobik nikangge waruhun?” ulug hein og-neasimu, an den de tanggal di fam lahukdeg welatlug de waruhuk ulug tanggal wenaho ferihik on anyo hweag-itihik.

⁷Airoho hweag-itihikdeg ap gubernur propinsi it ap homi Babel on en uruk kwit de, Ik Efrat foma fil on[3] uruk on etman an o Yehuda waharuk men it eke en an nanggobokwe bal-nabuk eleg angge koloroho waruhuk en ulug de it enobahet surat eke og-nomag ulug heng-dirihik.

⁸Ne, at raja aohwei hwalduk katsi on ap unuk Asaf ai en de e elehet fak lehet TUHAN Obam wirig latsi on etmano aluluk kwe sokole hilingguruk on fahet mel, o kota fam elehet fak lehet wauk on fahet mel, o an nebe wereg ma wituk on fahet mel, mininggoho nobahaukwag ulug de at obahet surat eke og-nomag ulug hweag-itihik mu, TUHAN en let neasi ai fam de raja en de an den heng irihik angge etmano abirangge debesireg og-nitsi.

⁹Airoho og-nitsireg de at autsi ap tentara enowesi on eke mel, tentara wam kuda fam lauk on eke mel, an og-naplug wamag ulug mingming-enepsimu re an ninim o propinsi it Babel on en Ik Efrat foma fil etleman de suma fil higitdoho waharuhuk. Waharuhukdeg de surat raja en og-nitsi on etano it gubernur etmano og-esauihik.

¹⁰Famen de at Sanbalat obam Bet-Horon on ai mel at Tobia unggul unuk Amon on pemerintah enobahet yabuk duruk katsi on ai mel fam ap homi en de, at Nehemia anyo ap homi Israel on let-esamin ulug wahareg duruk ulug urukmu holswareg de enahumu ahe lahasi.

¹¹It airoho atswa wereg kweleg an anyo waharihikdeg de o Yerusalem mundoho aik waharihikdeg de kel wat-dauk kwit de nukoho henahan welatihik.

¹²Airoho wereg lit an den de o Yerusalem meiyalswa on anyo fobik nikangge leko wiruhuk en ulug waharihikdeg ulug de ap homi mundoho hweag-esa fug angge welatihik. Welatlug de nenggik eke noholug de o hup andundu noluk atihikdeg de nori enebe biren henahan eke mingming esalug de, wam ambolowag fam lahalug lauk on eke eleg angge, we wam keledai eke anduhunmu hweriako lauk on neg walug de o kota dag fil wilibik lauhuk.

¹³O sekan duk fug angge hupdeg kweleg de o kota embeselug de kobokwe fak lehet oho on sokole unuk Gerbang Lembah uruk on ai fene en wilibik lauhukdeg de o kota foma fil mo obuk uruk fil, ik ambut fil higitdoho sokole hilinggig on unuk Gerbang Sampah uruk kwe, en de sokole unuk Mata Air Mancur ai mel Kolam Raja uruk kwe ai en lauhuk. Lauk kwit de o kota elehet fak lehet siaho fesebag on mel, sokole hilinggig on han yalfag ma mundoho nasi on omano mel ninil hwalik lauhuk.

¹⁴Ninil hwaldil lauhukdeg de o kota foma mo lahaik waharuk higitdoho en bekit de ik eleruk higitdoho sokole hilinggig on unuk de Pintu Gerbang Air soalegman de Kolam Raja wereg ma eta lauhuk. Airoho lauhuk famen de etma kobokwe mundoho langguk debeswa on etmano wereg ma re an wam keledai anduhunmu hweriako lauk katihik on ai la fug ale atsi.

¹⁵Aireg en de Ik Kidron donggoma etma wamburuhuk deg de o hup deg kweleg de o kota elehet fak lehet oho latsi on etmano koholdil-koholdil de kwe maseroho re sokole unuk Pintu Gerbang Lembah anyo fene en de sombandoho o kota kwik waharuhuk.

¹⁶An koholdil lauihik ale anyo re ap imam en oho, ap homi Yahudi on enowesi kain mel en oho, it Pemerintah enobahet duruk on en oho, ap homi mundoho fobik o kota Yerusalem anyo leko wirihuk ulug on en oho, mundoho en de an nebe waharihik hwili en, o kota nil koholdil lauihik hwili etma re, an de diroho duhuk en ulug mel dorangge oho hweag-esauihik fug mu re, an nil hauihik ale mel, ne nendama ebetihik ale mel, etma re it de enapelegdoho welatswa.

¹⁷Famen de an den fobik it fam hweag-esauk kwit de, “O kota Yerusalem de mundoho meiyaloho dak deg at, ne sokole hilinggig on etmano indok en mundoho nebag ma wereg kweleg nenebe fam unggum wereg ma anggin-fanggin hauk kwit welahe ale aure hauk kahep a? Ap homi enendaman mabenap henobaharuk ale au eleg amag ulug de o kota Yerusalem ebe mel, elehet fak lehet oho latfag on au mel meiyalfag on anyo fobik nikangge leko wirukohon,” ulug hweag-esauihik.

¹⁸Airoho hweag-esauihik deg Allah en an let-neasimu re Raja Artahsasta en hweag-nitsi ale etmano hweag-esauihik. Airoho hweag-esauihik mu iren uruk kwit de, “Fano, wiruhuk en de indip dukohon,” ulug uswareg de yabuk anyo wiruhuk en ulug de di angge su angge mundoho fik-fouk duswa.

¹⁹Airoho duswaman de it Sanbalat nim Tobia nim, Gesyem obam Arab on anyo nim en enesanggo holswareg de enebe wahausareg iren unda yag-nenepuk kwit bulip nenepuk kwit de iren diroho uruk katswa, “Hit de nanggindul ulug duruk kahep? Hiren de raja aire nenerim ulug abug balehepdeg duruk kahep a?” ulug uruk katswa.

²⁰Airoho hweag-nesaukmu re an den it fam uruk kwit de, “Allah bohol fam Mun Along wereg on anyo en yabuk aire ambiangma mundoho dukwag ulug nenebuhu. Nit nenebe re Allah amingming angge welahema re nit de wiruhuk en ulug indip senerehereg duruk kahe. Famen de o Yerusalem su re hit akni henap fug, ne hiren on fug. Degma re ap homi en o Yerusalem su fahet abug uruk kwit de hit hininuk eke uruk kamuhup fug,” ulug hweag-esauihik.